10 თრილერი მათთვის, ვისაც ვალენტინობა არ აინტერესებს

nugo July 11, 2021

მართალია დღეს ვალენტინობაა, მაგრამ გადავწყვიტეთ, დღევანდელი კოლექცია მიგვეძღვნა ადამიანებისთვის, ვისთვისაც ეს დღე არაფერს ნიშნავს და საღამოს სასიამოვნო გატარებას ეკრანებთან აპირებენ. ამიტომ გთავაზობთ ფილმებს, რომელთა დასასრულიც მოულოდნელი იქნება. და რომლებშიც არაფერი აღმოჩნდება ისე, როგორც ერთი შეხედვით ჩანდა.

თანამოაზრე (2004)

ერთი მხრივ სცენარი ორიგინალურობით არ გამოირჩევა, თუმცა მეორე მხრივ, ტომ კრუზის და ჯემი ფოქსის დუეტის ყურება ძალიან საინტერესო და სასიამოვნოა. ფილმში მოქმედება ძირითადად ტაქსში ვითარდება და სავსეა დიალოგებით. წინ მაიკლ მანის ძალიან კარგი ნამუშევარი გელოდებათ ეფექტური სცენებით, კარგი მსახიობებითა და საინტერესო გზავნილებით. ჯემი ფოქსი ოსკარზე ნომინირებული იყო საუკეთესო მსახიობი კაცისთვის მეორეხარისხოვან როლში.

კლოვერფილდის შესახვევი 10 (2016)

უჩვეულო ფილმი თავისი სპეციფიკით. ფილმმა თავიდანვე მიიქცია მაყურებლის ყურადღება, როდესაც ის მონსტროს გაგრძელებად გამოაცხადეს. ბოლო წლების მანძილზე გადაღებული ფილმებიდან “კლოვერფილდის შესახვევი 10” ერთ-ერთი ყველაზე დასამახსოვრებელია, რომელიც, რა თქმა უნდა, ყველას შეიძლება არ მოეწონოს, მაგრამ თუ გიყვართ ორიგინალური სიუჟეტები და მოულოდნელი დასასრულები, ეს ფილმი ნამდვილად თქვენთვისაა. 2018 წელს გამოვიდა ფილმის მესამე ნაწილიც “ქლოვერფილდის პარადოქსი”.

მემანქანე (2004)

ფილმის მთავარი გმირი, რომელსაც კრისტიან ბეილი ასრულებს, არავის ხვდება შემთხვევით, აქ ყველაფერი ერთმანეთთან არის დაკავშირებული. ფილმის მთავარი ღირსება მისი თავსატეხებით სავსე კარგად დამუშავებული სცენარია, რომელიც მაყურებელს მთელი ფილმის განმავლობაში კითხვებს უჩენს. ასევე უნდა აღინიშნოს კრისტიან ბეილის გარდასახვა, რომელმაც ამ როლისთვის 30 კილოგრამი დაიკლო.

ბუნკერი (2011)

დაბალბიუჯეტიანი, მაგრამ ძალიან საინტერესო თრილერის კარგი მაგალითი. ზედმეტი სისხლიანი სცენები გარეშე, მაგრამ უამრავი გამოცანითა და სიუჟეტის მოულოდნელი განვითარებით, რაც, ალბათ დაგვეთანხმებით, ამ ჟანრის ფილმებში უმნიშვნელოვანესია. ფილმი ბევრ შერეულ ემოციას და საფიქრალს დაგიტოვებთ.

საიდუმლო მათ თვალებში (2010)

არგენტინულ-ესპანური თრილერი, რომელიც ედუარდო საჩერის რომანის მიხედვით არის გადაღებული. ინტრიგა მაყურებელს ფინალამდე არ აძლევს მოდუნების საშუალებას, მოულოდნელი ფინალი კი ნამდვილად გააკვირვებს. ჩახლართული ისტორია მოვლენების არასტანდარტული განთვითარებთაც იქცევს ყურადღებას. ხუან ხოზე კამპანელიას ფილმმა ოსკარი საუკეთესო უცხოენოვანი ფილმისთვის მიიღო.

თავს უშველე (2017)

ამ ჟანრში ერთ-ერთი ყველაზე ემოციური ფილმი დაძაბული მომენტებით. ერთი შეხედვით ფილმის მთავარი თემა რასიზმია, რომელიც ტოლერანტულობისკენ მოგვიწოდებს, მაგრამ ეს ასე სულაც არ არის. უნდა აღინიშნოს ძალიან კარგი სამსახიობო პერფომანსები, განსაკუთრებით კი დენიელ კალუია, რომელიც ოსკარზე იყო ნომინირებული საუკეთესო მსახიობი კაცისთვის. სცენარი უჩვეულო და საინტერესოა, რის დამსახურებითაც ფილმმა ოსკარი საუკეთესო ორიგინალური სცენარისთვის მიიღო.

არავის უთხრა (2008)

ფრანგული დეტექტიური თრილერი ჩახლართული სიუჟეტითა და ინტრიგით. ფილმში მოვლენები ნელ-ნელა ვითარდება, რის გამოც ჰოლივუდურ დინამიკას მიჩვეულ მაყურებელს შეიძლება გაუჭირდეს ფილმის ყურება, მაგრამ მოსაბეზრებელი ამ ფილმზე ნამდვილად არ ითქმის. “არავის უთხრა” ფრანგული კინემატოგრაფიის ერთ-ერთი ღირსეული წარმომადგენელია, რომელიც ევროპული კინოს მოყვარულების ყურადღებას ნამდვილად იმსახურებს.

უხილავი სტუმარი (2017)

ერთი შეხედვით მარტივი ისტორიაა, მაგრამ რეჟისორი გამუდმებით ახერხებს მაყურებლის მოტყუებას. როგორც კი იფიქრებთ, რომ ყველაფერში გაერკვიეთ, მეორე სცენაში თქვენი თეორია იმსხვრევა. ამ ჟანრის მოყვარულებმა აუცილებლად უნდა ნახოთ ეს ფილმი, რომელშიც არაჩვეულებრივი სამსახიობო შემადგენლობა და წარმოუდგენებ ფ ლი სიუჟეტი გელით.

გატაცებულნი (2013)

საკმაოდ მძიმე ფსიქოლოგიური თრილერი, რომელიც ორი პატარა გოგონას მოტაცების ისტორიას მოგვითხრობს. მოულოდნელი გადაწყვეტილებებით სავსე სიუჟეტი, რომლის სცენარიც ერთიანი და დეტალებისადმი ყურადღებიანია. რეჟისურა, სცენარი, სამსახიობო პერფომანსი, ყველაფერი უმაღლეს ხარისხზეა შესრულებული. ფილმი ოსკარზე იყო ნომინირებული საუკეთესო ოპერატურისთვის.

სხეული (2012)

კიდევ ერთი ძალიან კარგი ესპანური თრილერი, რომელიც კიდევ ერთხელ შეგვახსენებს, რომ თითოეულ ჩვენს მოქმედებას მოჰყვება შედეგი. ხარისხიანი თრილერი შესანიშნავი დეტექტიური ისტორიით, რომელიც გაგიჩენთ ბევრ კითხვას და რამდენიც არ უნდა იფიქროთ, ფინალამდე რეალობას ვერ გამოიცნობთ. მოკლედ, თუ ჩახლართული ფილმები გიყვართ, “სხეული” თქვენთვისაა.