10 მელოდრამა და კომედია, რომელიც დეკემბერს გადაგაგორებინებთ

nugo July 11, 2021

ზამთარი ბევრს არ უყვარს, არც ახალი წელი უხარიათ და ამ სიცივეში გასვლაც ეზიზღებათ. ჩვენ, რა თქმა უნდა, ასეთ ადამიანებზეც ვზრუნავთ. ამიტომ, ისეთი ფილმები შეგირჩიეთ, სადაც ზაფხულია, მზე, ბევრი გართობა, კიდევ უფრო ბევრი თავგადასავალი და მოკლედ, ისეთი ფილმები, რომლებიც გარეთ აუტანელ ამინდებს, შინ სახლში, გემრიელად გადაგაგორებინებთ:

მექალთანე (2009)

ცხელი ზაფხული და ყველასთვის საყვარელი ეშტონ კაჩერი. “მექალთანე” – ეს არის ფილმი, რომელიც ყველა სასიყვარულო მელოდრამისგან განსხვავდება და ამსხვრევს ყველა ამ ჟანრთან ასოცირებულ სტერეოტიპს. აქ ვერ შეხვდებით ასეთი ტიპის ფილმებისთვის დამახასიათებელ რომანტიზმს, მაგრამ ნახავთ მწარე, ცხოვრებისეულ და საკმაოდ სამართლიან რეალობას, რის გამოც ეს ისტორია კიდევ უფრო მიმზიდველი ხდება.

ჩვენ მილერები ვართ (2013)

როუსონ მარშალ თურბერის ფილმი არაჩვეულებრივი გასართობია, რომელიც თავის რითმს ბოლომდე ინარჩუნებს. კარგი სამსახიობო შემადგენლობის, იუმორის და საუნდტრეკების გარდა, ფილმი თავის ვიზუალითაც მოგხიბლავთ: სანახაობრივი ექსტრემალური სცენები და ლამაზი პეიზაჟები. მოკლედ, თუ გიყვართ ჰოლივუდური კომედიები, ეს ფილმი თქვენთვისაა. “ჩვენ მილერები ვართ” იმ ფილმის კატეგორიებს მიეკუთვნება, რომლებსაც აუცილებლად ურჩევთ თქვენს მეგობრებს.

საძაგელი კოიოტი (2000)

ოცნება მართავს ადამიანების ცხოვრებას და ბედისწერას. ჩვენ ვეძებთ განსხვავებულ გზებს მიზნების მისაღწევად, დაბრკოლებებს ვლახავთ, გამოსავალს ვპოულობთ, გვაქვს კარგი და ცუდი პერიოდები და ეს ყველაფერი დროთა განმავლობაში ჩვენ შეხედულებებსაც ცვლის. სწორედ ასეთ ცხოვრებისეულ თემებს ეხება “საძაგელი კოიოტიც”. ფილმი აუცილებლად დატოვებს თქვენში დადებით ემოციას და იქნება ერთგვარი მოტივატორი გადალახოთ ყველა სირთულე და მიაღწიოთ თქვენს დასახულ მიზნებს.

22 ჯამფ სტრიტი (2014)

ასეთი ჟანრის ფილმები ბევრს უყვარს სწორედ იმის გამო, რომ ისინი საშუალებას იძლევიან, მოწყდეთ რეალობას, ცხოვრების გემო შეიგრძნოთ და გარემოცვას სხვა თვალით შეხედოთ. ფილმის ძირითადი თემა ჯონა ჰილის და ჩენინგ ტატუმის პერსონაჟების მეგობრობაა. ეს ახალგაზრდობის, სიხარულის და უდარდელობის ერთგვარი ჰიმნია, რომელიც კარგი იუმორით არის გაჯერებული.

სასტუმრო ტრანსილვანია 3 (2018)

ანიმაცია, რომელიც ზრდასრულებსაც ისევე უყვართ, როგორც პატარებს. “სასტუმრო ტრანსილვანიამ” წინა ორი ნაწილით უკვე შეაყვარა მაყურებელს თავი, თავისი უცნაური მონსტრებითა და უჩვეულო სიუჟეტით. ამჯერად კი მის ყველაზე თბილ ნაწილს გთავაზობთ. ანიმაციური ფილმი მაყურებელს, თავისი იუმორითა და მრავალფეროვანი პერსონაჟებით ხიბლავს, რომელსაც თან მორალიც სდევს: ბავშვებისთვის ხომ აუცილებელია მივიტანოთ რა არის კარგი და რა – ცუდი…

თავი მოაჩვენე ჩემს მეუღლედ (2011)

დენის დუგანის პოზიტიური ემოციებით სავსე ფილმი, რომლის მთავარი სათქმელია – იყავით გულწრფელები. როდესაც მთავარ როლებს ადამ სენდლერი და ჯენიფერ ენისტონი ასრულებენ, უკვე გასაგებია, რომ ფილმი სახალისო იქნება. უნდა აღინიშნოს ფილმის გარემო და მუსიკა, რომელიც აუცილებლად მოგწყვიტავთ ცივი რეალობიდან. ეს არის ფილმი, რომლის ყურებაც შეგიძლიათ, როგორც მეგობრებთან ერთად, ისე ოჯახის გარემოცვაშიც.

მეზობლები (2014)

კიდევ ერთი ტიპური ამერიკული კომედია, რომელიც თაობებს შორის მარადიულ კონფლიქტზე მოგვითხრობს, მიუხედავად იმისა, რომ ამ შემთხვევაში ამ თაობებს შორის არც ისე დიდია სხვაობა. ამ ფილმის ყურება სასიამოვნო და მარტივია. არ დაგავიწყდეთ, რომ ის გარკვეულ მორალსაც ატარებს და ფილმში განხილული პრობლემაც არ არის გამოგონილი და აქტუალურია ჩვენს ყოველდღიურობაში. მაგრამ, რაც მთავარია, ფილმი განწყობას აგიმაღლებთ, გაგაღიმებთ და სასიამოვნო ემოციებით აგავსებთ.

ზრდასრულები (2010)

რა შეიძლება იყოს იმაზე უკეთესი, როდესაც მეგობრები მეუღლეებთან ერთად, ზოგი მეუღლის გარეშე, ქალაქგარეთ სახლს ქირაობს განვლილი წლების გასახსენებლად?! ფილმმა ნამდვილად გადააჭარბა მოლოდინს, მასში უამრავი მომენტია, რომელიც გულით გაგაცინებთ, გაგიჩენთ სურვილს მიბაძოთ ფილმის გმირებს, მოწყდეთ ყოველდღიურ პრობლემებს და დატკბეთ მეგობრული გარემოთი. ფილმის სამსახიობო შემადგენლობა კი უბრალოდ შეუდარებელია.

კულტურისა და დასვენების პარკი (2009)

ამ ფილმის სიუჟეტის განვითარება წინასწარ არის გასაგები ყველასთვის, მაგრამ მისი ატმოსფერო მაინც იზიდავს მაყურებელს. ფილმი გასართობი პარკის თანამშრომლების ირგვლივ ვითარდება, რომლებსაც ჯესი ეიზენბერგი და კრისტენ სტიუარტი ასრულებენ. ისინი არაჩვეულებრივად გამოიყურებიან ერთად. “კულტურისა და დასვენების პარკი” კარგი რომანტიკული კინოა, რომლის მთავარი სათქმელი არის ის, თუ როგორ შეუძლია მოზარდს რადიკალურად შეცვალოს თავისი ცხოვრება. ფილმი სასიამოვნო და თბილ ემოციებს დაგიტოვებთ.

ჩვენ თქვენი მეგობრები ვართ (2015)

ყველას ჰქონია გეგმები თავის ცხოვრებაზე, მაგრამ შემდეგ ან გარკვეული შეცდომები დაუშვიათ, ან რეალურ ცხოვრებაში ჩაფლულან. ფილმს ვერ დავარქმევთ სამოტივაციოს, მაგრამ ეს არის გზა ოცნებისკენ, იმ მომენტზე, როდესაც უნდა გამოვფხიზლდეთ. ამ ფილმის მთავარი ღირსება მუსიკაა, გამუდმებით ცვალებადი სცენები სხვადასხვა განმარტებებით, ძალიან ლამაზი და საინტერესოა.