10 მზიანი ფილმი ცივი და ქარიანი ამინდისთვის (ანუ ამ დღეებში სანახავი ფილმები)

nugo July 11, 2021

გარეთ ეს დღეებია საშინელი ამინდია – ქარი, სუსხი და სიცივე და გაზაფხულის მოახლოებას საერთოდ ვერ ვგრძნობთ.

თუმცა, ყველაფერში დადებითი მხარეები რომ უნდა ვეძებოთ – ეს ჩვენი ერთ-ერთი პლიუსია, თანაც მაშინ, როდესაც კინოზე ვსაუბრობთ, ასე არ არის? ჰოდა, სწორედ ამიტომ ისეთი ფილმები მოგიმზადეთ, რომელიც მხოლოდ მზესთან, სითბოსთან და თავგადასავლებთან არის დაკავშირებული.

გვენდეთ, ეს ფილმები სახლში ყოფნას უფრო სასიამოვნოს გახდის და ასეთ საშინელ ამინდებსაც მარტივად გადაგატანინებთ. მოდი, დავიწყოთ:

ვიკი, კრისტინა, ბარსელონა (2008)

ვუდი ალენის ზღაპრული გარემო ცხელ ბარსელონაში. ცხოვრებისეული ისტორია ორი ამერიკელის თავგადასავალზე ესპანეთში, ჩახლართული ურთიერთობები და ადამიანური გრძნობები – ფილმის თბილი ატმოსფერო აუცილებლად გადაედება მაყურებელსაც. უნდა აღინიშნოს შესანიშნავი სამსახიობო შემადგენლობა და პენელოპე კრუსის არაჩვეულებრივი პერფომანსი, რომელმაც ოსკარიც დაიმსახურა საუკეთესო მსახიობი ქალისთვის მეორეხარისხოვან როლში.

უხერხული მომენტი (2015)

მზე, ზღვა, რივიერეს მზიანი სანაპირო, ორი მეგობარი და მათი 18 წლის ქალიშვილები. ალბათ, მხოლოდ ფრანგებს შეუძლიათ ასეთი არასტანდარტული სასიყვარულო ურთიერთობების მარტივად გადმოცემა. წინ სასიამოვნო საყურებელი ფილმი გელით, რომელშიც არაჩვეულებრივი მსახიობები, მუსიკალური და ვიზუალური გაფორმებაა.

ამომავალი მთვარის სამეფო (2012)

უეს ანდერსონის ფილმები ყოველთვის გამოირჩევა თავისი ვიზუალით და არც “ამომავალი მთვარის სამეფო” არის გამონაკლისი. მისი გამორჩეული გამოსახულება შეიძლება ცოტა უცნაურად მოგეჩვენოთ, მაგრამ ის აუცილებლად მიიპყრობს თქვენს ყურადღებას. ეს არის ფილმი, რომელიც კიდევ ერთხელ შეგაგრძნობინებთ რეჟისორის განუმეორებელ ხელწერას, რისი დამსახურებითაც ერთი ჩვეულებრივი ისტორია განსაკუთრებული ხდება.

არანორმალურად მდიდარი აზიელები (2018)

ერთი უბრალოდ რომანტიკული სიუჟეტი, ლამაზი და თბილი გარემო და საინტერესო დეტალები აზიურ მენტალიტეტზე, რა თქმა უნდა, მათთვის, ვინც თავად არ არის აზიიდან. ლამაზად შერჩეული ფერები, ლამაზი კადრები, უჩვეულო საქორწინო ცერემონია, რომლის მოფიქრებითაც რეჟისორი ძალიან ამაყობს და სხვა სასიამოვნო მომენტები, რომელიც წინ გელით.

მაპატიე სიყვარულისთვის (2014)

სასიამოვნო დეტალებით სავსე ესპანური მელოდრამა, რომელიც იტალიელი ფედერიკო მოჩიას 2008 წლის ფილმის რიმეიქია, თუმცა უნდა აღინიშნოს, რომ ახალი ვერსია ძველზე გაცილებით უკეთესია. ფილმს დახვეწილი რეჟისურა გამოარჩევს, თითოეული მომენტი სავსეა გრძნობებით, ემოციებით, ვნებით, მაგრამ ყველაფერი ზომიერების ფარგლებში.

როგორ დავკავდეთ სიყვარულით ინგლისურად (2014)

სახალისო, გულისამაჩუყებელი და რაც მთავარია ლამაზი და თბილი ფილმი არაჩვეულებრივი მსახიობების მონაწილეობით. ფილმი არ გამოირჩევა ღრმა აზრით, ან განსაკუთრებული სიუჟეტით, თუმცა სასიამოვნო გარემოს, ჯესიკა ალბას, სელმა ჰაიეკის და პირს ბროსნანის დამსახურებით, ის მაინც იმსახურებს ჩვენს ყურადღებას.

ზაფხულის მეფეები (2013)

სათაურიდან მიხვდებოდით, რომ ეს ფილმი პირდაპირ ზაფხულის ცხელ დღეებში გამოგზაურებთ. ეს რეჟისორის ჯორდან ვოტ-რობერტსის დამოუკიდებელი პროექტია და მიუხედავად იმისა, რომ ის შეიძლება არ არის იდეალური, მაგრამ არის მასში რაღაც მშვენიერი, ნამდვილი, სუფთა, ის, რაც თავისუფლების შეგრძნებას გადმოგდებთ და დადებითი ენერგით აგავსებთ.

მამა მია! (2018)

რა თქმა უნდა, ეს არ არის ფილმი, რომლისგანაც ჩახლართულ სიუჟეტს, ან ძლიერ დიალოგებს უნდა ელოდოთ. ეს ფილმი არის განწყობის ასამაღლებელი, ულამაზესი გარემოთი, საბერძნეთის საოცარი ხედებით და ABBA-ს ყველასთვის ნაცნობი სიმღერებით გაჯერებული.

ჯადოსნობა მთვარის შუქზე (2014)

ვუდი ალენის კიდევ ერთი ფილმი, რომელიც დღევანდელ კოლექციაში იმსახურებს ყოფნას. ალენს არაერთხელ დაუმტკიცებია მისი შესაძლებლობა დეტალურად აღადგინოს ისტორიული ეპოქები. ულამაზესი გარემო, მკვეთრი ფერები და ლამაზი სიყვარულის ისტორია. მარტივი მელოდრამა, რომელშიც ვუდი ალენის ხელწერა ძალიან კარგად იგრძნობა.

მზეზე სეირნობა (2014)

და ბოლოს, კიდევ ერთი ცხელ-ცხელი ფილმი. მზე, ზღვა, სანაპირო, მუსიკა და ცეკვა, რომელიც გაგათბობთ და განწყობას აგიმაღლებთ, რა შეიძლება იყოს ამაზე სასიამოვნო ზამთრის ცივ დღეს?! ფილმში სასიამოვნო დეტალები შეგხვდებათ, რომლებიც ენერგიით და ოპტიმიზმით აგავსებთ.