10 მნიშვნელოვანი ფილმი ბულინგზე

nugo July 10, 2021

სუსტის, ან რაიმე განმასხვავებელი ნიშნის მქონე ადამიანის ჩაგვრა კაცობრიობის ერთ-ერთი ყველაზე მტკივნეული პრობლემაა და ნებისმიერ საზოგადოებრივ ფორმაციაში გვხვდება. ბულინგისა და დამცირების თემას ლიტერატურა და კინოხელოვნება ყოველთვის მძაფრად ეხმაურებოდა. ბოლო პერიოდში ამ თემაზე შექმნილ რამდენიმე მნიშვნელოვან ნაწარმოებს შორის განსაკუთრებული ყურადღება რ.ჯ. პალაციოს “საოცრების” მიხედვით გადაღებულმა ამავე სახელწოდების ფილმმა დაიმსახურა, რომლის პრემიერაც ცოტა ხნის წინ შედგა.

აღნიშნულ კოლექციაში თავმოყრილია ფილმები, რომლებიც სხვადასხვა ქვეყანაში და განსხვავებულ სოციუმში არსებულ ჩაგვრის ფაქტებს ამხელს და სრული სიცხადით გვიჩვენებს ბულინგის მასშტაბურ და საზარელ სახეს.

1. კლასი (2007)

ესტონელი რეჟისორის, ილმარ რააგის ფილმის მთავარი გმირი იოზეპი ჩვეულებრივი სკოლის გამოსაშვები კლასის მოსწავლეა. იგი გამუდმებით ითმენს თანატოლთა მხრიდან დამცირებას და დაცინვას, მაგრამ არასოდეს პასუხობს მათ, სანამ მას ერთ-ერთი თანაკლასელი, კასპერი არ გამოესარჩლება. ასე იწყება დაპირისპირება კასპერსა და კლასის არაფორმალურ ლიდერს შორის.

2. ტბა (1998)

კახა კიკაბიძის ფილმის მთავარი გმირი სკოლის მოსწავლე ზურაა, რომელიც მამის მკვლელობის შემდეგ სოფლიდან ქალაქში გადადის საცხოვრებლად. სკოლაში ის “მაგარი ბიჭის” იმიჯს ამოეფარება და ლიდერი ხდება, კლასელებს აბუჩად იგდებს, თუმცა მამის სიკვდილისა და ცხოვრებისეული წნეხისგან ფსიქიკაშერყეული ბიჭი სინამდვილეში ძალიან მარტოსულია. მალე იგი ამ ნიღაბს ჩამოიხსნის, თუმცა კლასელები ზურგს აქცევენ…

3. საფრთხობელა (1983)

ვლადიმირ ჟელეზნიკოვის რომანზე დაფუძნებული, საბჭოთა პერიოდში გადაღებული დრამა ბულინგის თემაზე იმდროინდელი ეპოქის რევოლუციურ ფილმადაა შეფასებული. სიუჟეტი მეექვსეკლასელ ლენა ბესსოლნიცევას გარშემო ვითარდება, რომელიც თანატოლებში თავის დამკვიდრებას ცდილობს და ამ გზაზე უამრავ სირთულეს აწყდება.

4. კეთილი იყოს თქვენი მობრძანება თოჯინების სახლში (1995)

დენი – ულამაზო, სათვალიანი გოგონა – გულზე არავის ეხატება: უყურადღებო მშობლებს, ქედმაღალ თანაკლასელებს, უფროს და უფრო ჭკვიან ძმას, მასზე ლამაზ უმცროს დას და ამას ნიუ-ჯერსის გარეუბანის საშიშროებებიც ემატება. სანდენსის ფესტივალის გამარჯვებული ეს ფილმი მძაფრად გვჩვენებს ბავშვის მარტოსულობასა და გარშემომყოფების გულგრილ დამოკიდებულებას.

5. ბოლო გაკვეთილი (2008)

ბოლო გაკვეთილი ჟან-პოლ ლილიენფილდის მიერ გადაღებული, რეალურ მოვლენებზე დაფუძნებული ფრანგული ფილმია, რომელშიც მთავარ როლს იზაბელ აჯანი ასრულებს. მისი გმირი უმაღლესი სკოლის მასწავლებელია, რომელიც ნერვიული აფეთქების ზღვარზე დგას მოსწავლეთა მუქარებისა და დაცინვის გამო. სკოლის ხელმძღვანელობა პრობლემას ყურადღებას არ აქცევს. ერთ-ერთ გაკვეთილზე მასწავლებელი რევოლვერით გამოჩნდება და მოსწავლეები საკუთარი მასწავლებლის მძევლები ხდებიან.

6. 400 დარტყმა (1959)

ფრანსუა ტრიუფოს ეს ბრწყინვალე ფილმი 12 წლის ანდუანზე – ძნელად აღსაზრდელ  მოზარდზე მოგვითხრობს. დედამისი პირადი ცხოვრებითაა დაკავებული და არც დრო აქვს და არც სურვილი, ვაჟის პრობლემებში გაერკვიოს. მამინაცვალი სუსტი ნებისყოფის კაცია და არც ცოლზე აქვს გავლენა და არც ბავშვზე. მასწავლებელი ბიჭს მხოლოდ სჯის. ანტუანი და მისი მეგობარი სკოლას ხშირად აცდენენ და ბოლოს საერთოდაც გარბიან.

7. ლუსიას შემდეგ (2012)

მიშელ ფრანკოს ფილმის სიუჟეტი მიჰყვება თინეიჯერ ალექსანდრას და მამამისს, რომლებიც ახალ ქალაქში გადადიან საცხოვრებლად. მამა პოლიციაში იწყებს მუშაობას, ალექსანდრა კი –სკოლაში სიარულს, სადაც გოგონას საშინელი დამცირების გადატანა უწევს. ფილმში შემზარავადაა ნაჩვენები თინეიჯერებში არსებული შუღლი და შეუბრალებლობა.

8. სადისტი (2001)

ლარი კლარკის ამ შესანიშნავ დრამაში უცნაური მეგობრობაა ნაჩვენები: ბობი და მარტი ბავშვობიდან მეგობრობენ, მაგრამ პათოლოგიურად სადისტი ბობი საშინლად დასცინის და აწვალებს მარტის და არა მარტო მას. ფილმში კარგადაა ნაჩვენები ჯგუფური ჩაგვრისა და ძალადობის საზარელი სახე.

9. ბენგ ბენგ, შენ მკვდარი ხარ (2002)

ამ დრამა-თრილერის სიუჟეტი ერთ ჩვეულებრივ სკოლაში ვითარდება, სადაც ახალი სასწავლო წლის დაყებამდე რამდენიმე თვით ადრე უფროსკლასელი, სახელად ტრევორ ადამსი, არარეალური ბომბით სკოლას აფეთქებით ემუქრებოდა. წლის დასაწყისში ტრევორს სკოლაში აღარავინ ეკონტაქტება, მასწავლებლებიც გაურბიან. მასწავლებელი ველ დანკანი, რომელიც სკოლის თეატრის ხელმძღვანელია, დგამს პიესას “ბენგ ბენგ, შენ მკვდარი ხარ” და მთავარ როლს ტრევორს სთავაზობს.

10. თავისუფლების მწერლები (2007)

უმაღლესი სკოლის ახალგაზრდა მასწავლებელი ცდილობს, პირად მაგალითად იქცეს მოსწავლეებისთვის და შთააგონოს მათ, გახდნენ ტოლერანტულობი და იმუშაონ საკუთარ თავზე. ეს ფილმი მაგალითია იმისა, რომ საკუთარ თავზე მუშაობა და უკეთესობისკენ შეცვლა ნებისმიერ ადამიანს სჭირდება.