10 რომანტიკული კომედია, რომელიც ყველა მამაკაცს მოეწონება

nugo July 11, 2021

ყველამ კარგად ვიცით, რომ რომანტიკული კომედიები ძირითადად ქალების საყვარელი ჟანრია და მამაკაცები ხშირად ამ ტიპის ფილმებს სკეპტიკურად უყურებენ, მაგრამ მიუხედავად ამისა, მაინც არსებობს ფილმები, რომლებიც მამაკაცებსაც მოსწონთ და ხშირად უბრუნდებიან კიდეც. ამიტომ ამ საკითხს, ასე სტერეოტიპულადაც ნუ მივუდგებით.

დღეს სწორედ წარმოგიდგენთ იმ რომანტიკულ კომედიებს, რომლებსაც მამაკაცებიც სიამოვნებით უყურებენ:

შიშველი ჯულიეტა (2018)

ჯესი პერეცის ფილმი თვითირონიის დეტალებით მოეწონება ყველა მელოდრამის მოყვარულს. პროვოკაციული სახელის მიუხედავად, ეს უბრალო ისტორიაა, რომელშიც ფილმის მთავარ გმირს უწევს ძალიან მნიშვნელოვანი გადაწყვეტილების მიღება. ფილმში მთავარ როლებს როუზ ბირნი და ითან ჰოუკი ასრულებენ. მოკლედ, თუ მოგბეზრდათ შაბლონური მოზარდებისთვის გათვლილი სიყვარულის ისტორიები, მაშინ ეს კინო თქვენთვისაა.

როგორ მოვიშოროთ თაყვნისმცემელი 10 დღეში (2003)

იმის დამსახურებით, რომ სცენარი არც გაწელილია და თან საკმაოდ სახალისოა, დონალდ პეტრეს ფილმი გამორჩეული და კომიკურია, რის გამოც ნამდვილად იმსახურებს მაყურებლის ყურადღებას. ჩვენ წინაშე ვითარდება სახალისო ისტორია სასაცილო მომენტებით, სიტუაციებითა და საკუთარი ნაკლების გამომჟღავნების უცნაური ხერხებით. ისტორია საკმაოდ ორიგინალურია და ის აუცილებლად მოგგვრით ღიმილს.

რა მოხდება თუ (2014)

ბევრი მიზეზია, რის გამოც ფილმი მოგეწონებათ. მისი ერთ-ერთი მთავარი ღირსება გადაღების მანერაა. გარდა ამისა ყველა პერსონაჟი თავის ადგილასაა, არის გემოვნებიანი იუმორით გაჯერებული, არის მარტივი და სასიამოვნო საყურებელი. თუ ეძებთ კარგ რომანტიკულ ფილმს კარგი სამსახიობო შემადგენლობით, კარგი იუმორით, საინტერესო პერსონაჟებითა და სახალისო სიტუაციებით, ეს ფილმი თქვენთვისაა.

სკოტ პილიგრიმი მსოფლიოს წინააღმდეგ (2010)

მიუხედავად იმისა, რომ ფილმი გაქირავებაში ჩავარდა, მას ბევრი პლუსი აქვს და პირველ რიგში, მისი სამსახიობო შემადგენლობა უნდა აღინიშნოს. უნდა ვთქვათ, რომ ყველა მსახიობმა არაჩვეულებრივად გაართვა თავი დავალებას, მეორე და მესამეხარისხოვანი როლებიც კი მკვეთრი და დასამახსოვრებელია. მუსიკაც იდეალურად არის სიუჟეტთან შეხამებული, სპეცეფექტები თვალებს უხარიათ, სიუჟეტი საინტერესოა და რაც მთავარია, ეს არ არის სტანდარტული სიყვარულის ისტორია.

რუბი სპარკსი (2012)

ეს ფილმი შეიძლება კატალიზატორი აღმოჩნდეს ყველასთვის, ვინც თავს ხელოვანად თვლის. შთაგონება ყველაზე იდუმალი რამ არის, რომლის ძიებაშიც ადამიანები საკუთარ თავსაც კი კარგავენ ხოლმე. “რუბი სპარკსი” არის ისტორია გამოგონილ მეგობარ გოგონაზე, რომელიც მწერლის ცხოვრებაში შეიჭრა. ეს ის შემთხვევაა, როდესაც ჟანრის მითითებაც კი ზედმეტია – აქ არის სიყვარული, ფსიქოანალიზი, რომანტიკის მელოდრამაში გადაზრდა და ა.შ.

დროის შესახებ (2013)

ფილმს საფუძვლად უდევს ფანტასტიკური იდეა დროში მოგზაურობაზე, მაგრამ ეს მხოლოდ ერთი შეხედვით… სინამდვილეში ფილმი გაცილებით ღრმა არის და მოგვითხრობს ცხოვრებაზე, იმაზე, თუ როგორ უნდა გვიყვარდეს ის და მივიღოთ სიამოვნება თითოეული დღით, რაც არ უნდა ხდებოდეს. ეს ყველამ კარგად იცის, მაგრამ ძალიან იშვიათია, რომ ვიღაცას მართლა უყვარდეს, აფასებდეს და აღიქვამდეს ცხოვრებას მთელი თავისი მრავალფეროვნებით.

სიყვარული ზომების გარეშე (2016)

შეუძლიათ ფრანგებს მარტივი, სასიამოვნო რომანტიკული კომედიების გადაღება და ამას ნამდვილად ვერ დავუკარგავთ. ფილმი მოგვითხრობს დიანაზე, ადვოკატზე, რომელიც ყოფილ მეუღლესთან ერთად მუშაობს და ალექსანდრეზე, ნიჭიერ და ცნობილ არქიტექტორზე. თითქოს არაფერი განსაკუთრებული, ხომ ასეა?! მაგრამ ალექსანდრეს სიმაღლე 136 სანტიმეტრია, დიანას კი საშუალო პარამეტრები გააჩნია. რა თქმა უნდა, ფილმი გაჯერებულია მარტივი და უწყინარი იუმორით. რეჟისორის მთავარი სათქმელი, ალბათ, სწორედ ისაა, რომ არ ღირს სტერეოტიპებით ცხოვრება და უკეთესი იქნება, თუ ადამიანები გააკეთებენ იმას, რაც თავად სურთ და არ მიაქცევენ ყურადღებას უცხო ადამიანების აზრს.

ეს ამბავი ძალიან სახალისოა (2010)

ხანდახან ასეთი ტიპის ფილმებს შეუძლიათ გაცილებით მეტის თქმა, ვიდრე მათგან ელოდებიან. მოზარდებს ხშირად ჰგონიათ, რომ მთელი სამყარო მათ წინააღმდეგაა, ირგვლივ პრობლემები და იმედგაცრუებებია. მაგრამ ეს ფილმი არ არის იმაზე, თუ რა რთულია იყო მოზარდი თანამედროვე სამყაროში, არამედ რა მარტივია, სიანმდვილეში, იცხოვრო. ფილმის მთავარი სათქმელი სწორედ ესაა – იცხოვრეთ! ცხოვრებაში არსებობს პერიოდები, როდესაც ამის სურვილი ეკარგებათ ადამიანებს, მაგრამ მთავარია მოძებნოთ ძალა საკუთარ თავში და ეს სურვილი დაიბრუნოთ.

ნიკის და ნორას ფლეილისტი (2008)

ჟანრების საოცარი ნაზავია ეს ფილმი და არაფერ კონკრეტულს არ ჰგავს. არის მომენტები, როდესაც მოგეჩვენებათ, რომ უყურებთ კომედიას მოზარდებისთვის, სახალისოს და მარტივს, სასიამოვნო მუსიკით, მეორე წუთას კი ეკრანზე უცნაური არტჰაუსია, რომელიც შერეულ გრძნობებს იწვევს. ფილმი მეგობრობაზე, სიყვარულზე, ცხოვრების არსზე, საკუთარი თავის მოტყუებაზე, ნიუ-იორკზე და, რა თქმა უნდა, მუსიკაზე.

ჰიტჩი (2005)

ეს ფილმი, ალბათ, ყველაზე მეტად მოეწონებათ მამაკაცებს. გარდა იმისა, რომ მთავარ როლს ყველასთვის საყვარელი უილ სმიტი ასრულებს, მისი გმირი მამაკაცებს ქალებთა გულების დაპყრობას ასწავლის. სცენარი საკმაოდ მარტივია, მაგრამ საინტერესოდ ვითარდება. მიუხედავად იმისა, რომ ყველამ კარგად ვიცით რითიც დამთავრდება ისტორია, მოულოდნელი მომენტები ფილმს კიდევ უფრო საინტერესოს ხდის. მოკლედ, ეს არის კარგი კომედია სიყვარულზე და ქალისა და მამაკაცის ურთიერთობაზე.