10 საუკეთესო კომედია ქორწინებაზე

nugo July 10, 2021

როდესაც ამ ღირშესანიშნავ დღეზე ვსაუბრობთ, ალბათ არ იქნება უცხო თუ ვიტყვით, რომ მას თან ნერვიულობა, ღამეების თენება, სტუმრების სიის შედგენა, ათასჯერ გადასწორება, ჩამატება და კიდევ ბევრი რამ სდევს, რომლებიც ალბათ ძალიან გაგვიჭირდება, რომ ჩამოვთვალოთ.

სამაგიეროდ, არსებობენ რეჟისორები, რომლებიც იდეალურად ახერხებენ ამ დღის აღწერა ჩვენამდე ძალიან ემოციურად და სასაცილოდ მოიტანონ. ეს ხომ ყოველთვის ასეა, გეგმები ხომ ყოველთვის ისე არ მიდის, როგორც ჩვენ გვინდა? ხოდა, ვფიქრობთ, ეს კომედიები ძალიან გაგახალისებთ.

მოკლედ, გთავაზობთ 10 კომედიურ ფილმს ქორწინებაზე:

უაილდის ქორწილი (2017)

ცნობილი მსახიობი ევა უაილდი, რომელსაც გლენ კლოუზი ასრულებს, საკუთარი სიამოვნებებისთვის ცხოვრობს და ახლა უკვე მეხუთე ქორწილისთვის ემზადება. მსახიობის ქორწილში უამრავი ადამიანი იყრის თავს, მათ შორის კი ევას ყოფილი, სულ პირველი ქმარიც არის. როგორც მსგავს დღესასწაულებს სჩვევიათ, ირგვლივ სრული არეულობაა. ფილმში ასევე მონაწილეობენ ჯონ მალკოვიჩი და პატრიკ სტიუარტი.

გაქცეული პატარძალი (1999)

გერი მარშალის ფილმი მეგი კარპენტერის შესახებ გვიამბობს. ქალი, რომელსაც ქორწილის პანიკური შიში აქვს და რომელიც საქმროებს ყველაზე ბოლო მომენტში გაურბის. მან საკურთხეველთან უკვე სამი მამაკაცი მიატოვა, მაგრამ იმედი აქვს, რომ შემდეგ ჯერზე მაინც დაძლევს შიშებსა და კომპლექსებს. ჟურნალისტი აიკი ნიუ-იორკიდან მეგის მშობლიურ ქალაქში მისი მეოთხე ქორწილის წინ ჩადის. როგორც მოსალოდნელია, ყველაფერი ისე არ ხდება, როგორც წესია. მთავარ როლებს ჯულია რობერტსი და რიჩარდ გირი ასრულებენ.

მამა მია! (2008)

მერილ სტრიპის გმირმა მხიარულად გაატარა ახალგაზრდობა, გააჩინა არაჩვეულებრივი გოგონა, რომელსაც ამანდა სეიფრედი ასრულებს, მაგრამ წარმოდგენა არ აქვს ვისგან. უკვე მისი ქალიშვილის ქორწილი ახლოვდება და გოგონამ ბევრი ფიქრის გარეშე, გადაწყვიტა მამობის სამივე კანდიდატი დაეპატიჟებინა. მამების როლებს პირს ბროსნანი, კოლინ ფერტი და სტელან სკარშგორდი ასრულებენ. ფილმი ოქროს გლობუსზე საუკეთესო მიუზიკლისა ან კომედიისთვის, მერილ სტრიპი კი საუკეთესო მსახიობი ქალისთვის მიუზიკლსა ან კომედიაში იყო ნომინირებული. ფილმი აუცილებლად გამოგზაურებთ ძალიან სახალისო, მუსიკალურ და მზიან თავგადასავალში.

27 ქორწინება (2008)

ენ ფლეტჩერის ფილმის მთავარმა გმირმა ჯეინმა, რომელსაც ქეთრინ ჰეილი ასრულებს, მოახერხა, თავისი 27 მეგობარი გაეთხოვებინა, მის ურთიერთობებში კი საქმე ბევრად რთულადაა. ყველამზე მთავარი კი ისაა, რომ ჯეინის დაც კი თხოვდება, ანუ – მოქმედების დროა, რომ პირად ცხოვრებას მიხედოს. მთავარი თავგადასავალიც სწორედ აქედან იწყება. ფილმში ასევე მონაწილეობენ ჯეიმს მარსდენი, მალინ აკერმანი და ედვარდ ბერნსი.

ქორწილების ორგანიზატორი (2001)

ულამაზესი მერი ფიორე ქალაქში ქორწილების საუკეთესო ორგანიზატორია. მას შემთხვევით მისი ოცნების მამაკაცი, პედიატრი სტივ ედისონი გადაარჩენს, მაგრამ მალევე გაირკვევა, რომ იგი მისი კლიენტის, მდიდარი ფრენ დონოლის საქმროა. სანამ მერი აგრძელებს საქორწინო ცერემონიის მზადებას, ის და სტივი იძულებულნი ხდებიან აღიარონ, რომ ერთმანეთი ძალიან მოსწონთ. ფილმში მთავარ როლებს ჯენიფერ ლოპესი და მეთიუ მაკკონაჰი ასრულებენ.

პატარძლების ომი (2009)

გარი ვინიკის ფილმი ორი საუკეთესო მეგობრის, ლივის და ემას ისტორიაზე მოგვითხრობს, რომლებიც ბავშვობიდან ოცნებობდნენ ქორწილი მდიდრულ სასტუმრო “პლაზაში” გადაეხადათ. როდესაც აღმოჩნდება, რომ ცერემონია ორივემ ერთ დღეს დანიშნა, მათი მეგობრობა მაშინვე მთავრდება და ნამდვილი პატარძლების ომი იწყება. მთავარ როლებს ენ ჰეთევეი და ქეით ჰადსონი ასრულებენ.

ჩემი დიდი ბერძნული ქორწილი 2 (2016)

პირველი ფილმიდან 15 წლის შემდეგ დიდი ბერძნული არეულობა გრძელდება. ტულა და იენი ვერაფრით ახერხებენ ცნობისმოყვარე სანათესაოსგან განმარტოებას. მათი მოზარდი ქალიშვილი სხვა ქალაქში გაქცევაზე ოცნებობს, რადგან ნათესავებმა თავი მოაბეზრეს. ტულას მშობლები კი იგებენ, რომ მათი ქორწინება ძალადაკარგულია და ქორწილი ყველას ერთად შეკრების არაჩვეულებრივი მიზეზია.

საქმრო ორისთვის (2017)

ერთმა გოგონამ თავისი შეყვარებულის ჯობეში ქორწილის ორგანიზატორის სავიზიტო ბარათი იპოვა და გადაწყვიტა, რომ ეს ურთიერთობის განმტკიცების შეთავაზებაა. სინამდვილეში საქმროს ამის შესახებ სულაც არ უფიქრია, რადგან ეს სავიზიტო ბარათი მის საყვარელს ეკუთვნოდა. ახლა მისი საყვარელი მისივე ქორწილის ორგანიზატორია. ყველაფერი ძალიან ჩახლართულია არა? ფილმი ძალიან სასაცილო და სახალისოა, რომელიც დროს სასიამოვნოდ გაგატარებინებთ.

დაქირავებული მეჯვარე (2015)

შრომისმოყვარე დაგი უზომოდ ბედნიერია, რადგან მას ცოლად გაყოლაზე ულამაზესი გოგონა დათანხმდა. პრობლემა ის არის, რომ მას საერთოდ არ ჰყავს მეგობრები და არავინაა ისეთი, ვინც მისი მეჯვარე იქნება. ამიტომ ის მიმართავს სააგენტოს, სადაც პოულობს ტიმს, რომელიც მზად არის მისი მეჯვარე იყოს და დაგს უამრავი მეგობარი მოუძებნოს. მთავარ როლებს ჯოშ გადი, კევინ ჰარტი და კეილი კუოკო ასრულებენ.

თითქმის დაქორწინებულები (2012)

მას შემდეგ რაც ტომმა (ჯეისონ სეგელი) ვაიოლეტი (ემილი ბლანტი) გაიცნო, ერთი წელი გავიდა და ერთი წლის თავზე მან საქორწინო ბეჭედი აჩუქა. ისინი ერთმანეთისთვის არიან შექმნილნი, თუმცა მათი ნიშნობა სულ რაღაც ხუთ წელს გაგრძელდა, ქორწილი უამრავჯერ გადადეს, ყველაფერს ზედმიწევნით გეგმავდნენ და თითქმის დაშორდნენ კიდეც, სანამ ყველაფერი დაალაგეს.