10 საუკეთესო კომედიური ფილმი ორსულობაზე

nugo July 10, 2021

ორსულობა მარტივი ნამდვილად არ არის, რაც იმას ნიშნავს, რომ თქვენ დამსახურებულად გეკუთვნით დასვენების და განტვირთვის რამდენიმე საათი. ჩვენ ვიცით, რომ როდესაც დასვენებაზე ვსაუბრობთ, აუცილებლად ვგულისხმობთ კომფორტულ სავარძელს, ტელევიზორს (ან სხვა ნებისმიერ მოწყობილობას) და სულ რაღაც რამდენიმე საათს, რომ დრო საკუთარ თავს დავუთმოთ და ხასიათი ან გამოვისწოროთ, ან შევინარჩუნოთ.

ორსულობა ტყუილად სულ არ გვიხსენებია, ჩვენ ამ კოლექციაში შევარჩიეთ ისეთი ფილმები, რომლებიც ვფიქრობთ, ორსულ ქალბატონებს ძალიან გაახალისებს, დააფიქრებს, სამომავლოდ ცოტა დაეხმარება და დროს სასიამოვნოდაც გააყვანინებს.

 

რას უნდა მოელოდე, როდესაც ფეხმძიმედ ხარ

კირკ ჯონსის კომედია, რომელიც ცნობილი წიგნის “რას უნდა მოელოდე” ეკრანიზაციაა. მთავარ როლებს ისეთი ვარსკვლავები ასრულებენ, როგორებიც კამერონ დიაზი, ჯენიფერ ლოპესი და ელიზაბეთ ბენკსი არიან. ისტორია ორსულ ქალებზე, მათ ქმრებსა და პარტნიორებზეა. ფილმში ბევრი ისეთი კლიშეა, რომლებსაც აქამდე შევხვედრივართ.

ვაი, დედიკო

არაჩვეულებრივი კომედია ტინა ფეის და ეიმი პოლერის მონაწილეობით. ფეის გმირი საქმიანი ქალების მუდმივი პრობლემის გადაჭრას ცდილობს. ის მარტოხელაა, ბავშვის გაჩენაც უნდა და თან, სულაც არ სურს, რომ წარმატებული კარიერის გაგრძელების შანსი დაკარგოს. დიდი ხნის ფიქრის შემდეგ კი, ის სუროგატი დედების სააგენტოს სტუმრობს.

ცოტათი ორსულად

კიდევ ერთი ფილმი, რომელიც კარიერას და დედობას იძიებს. ელისონი, რომელსაც ქეთრინ ჰეილი ასრულებს, დააწინაურეს. გართობის მოყვარული ბენ სტოუნისთვის, რომელსაც სეთ როგენი ასრულებს, ყველაზე ნაკლებად მოსალოდნელი იყო გოგონას გამოჩენა, რომელთანაც მხოლოდ ერთი ღამე გაატარა და იმის გაგება, რომ იგი მისგან ბავშვს ელოდება. ფილმი სახალისო და ცოტა ვულგარულიცაა, მაგრამ ის ნამდვილად ერთ-ერთი საუკეთესო კომედიაა ორსულობაზე.

ჯუნო

სკოლის პერიოდში დაორსულება არავის უკვირს, თუმცა ყველაზე მოულოდნელი ჯუნოს (ელენ პეიჯი) დაფეხმძიმება იყო. ის ბავშვს მისი მეგობრისგან, პაულისგან (მაიკლ ცერა) ელოდება. ჯუნო ცდილობს პრობლემას თავად გაუმკლავდეს და საკმაოდ რთული გადაწყვეტილებების მიღება უწევს. ჯეისონ რაიტმანის ფილმმა ოსკარი საუკეთესო ორიგინალური სცენარისთვის მიიღო.

ცხრა თვე

კრის კოლუმბუსის კომედიაში სემი და რებეკა, რომლებსაც ჰიუ გრანტი და ჯულიანა მური ასრულებენ, უკვე დიდი ხანია ხვდებიან ერთმანეთს. როდესაც გრანტის გმირი იგებს, რომ მისი მეგობარი გოგონა ფეხძიმედაა, მიხვდება, რომ საკუთარი ცხოვრების რადიკალურად შეცვლა მოუწევს. ფილმს კიდევ უფრო მეტად ჯოან კიუსაკი, რობინ უილიამსი და ტომ არნოლდი ახალისებენ.

გზაში

ბერტი და ვერონა, რომლებსაც ჯონ კრასინსკი და მაია რუდოლფი ასრულებენ, დაუვიწყარ მოგზაურობაში მიდიან, რათა ახალი ცხოვრების დაწყებისათვის იდეალური ადგილი შეარჩიონ. მგზავრობის დროს ისინი ხვდებიან, რომ სახლი ნამდვილად ყველაზე მნიშვნელოვანია. სემ მენდესის ფილმი შეგახსენებთ, რომ ოჯახი, ეს არის ის, რასაც თავად ვქმნით.

პატარძლის მამა 2

სტივ მარტინის პერსონაჟი ფილმის პირველ ნაწილში ძლივს შეეგუება იმ აზრს, რომ მისი ქალიშვილი გაიზარდა და გათხოვდა, ახლა კი იგებს, რომ ის მალე ბაბუა გახდება და რომ, მისი ცოლიც, რომელსაც დაიან კიტონი ასრულებს, ბავშვს ელოდება. ეს არის ფილმი, სადაც მთავარი აქცენტი მამისა და შვილის სიყვარულზე, ურთიერთობაზე კეთდება. სტივ მარტინი ამ როლისთვის ოქროს გლობუსზე საუკეთესო მსახიობი კაცისთვის მიუზიკლსა ან კომედიაში იყო ნომინირებული.

ბრიჯიტ ჯონსის ბავშვი

რენე ზელვეგერის გმირი ჩვეულ ფორმაშია. თითქოს ყველაფერი იდეალურად იყო, წარმატებული კარიერა, სახლი ლონდონის ცენტრში, მაგრამ ის კვლავ აღმოჩნდება იქ სადაც არაა საჭირო და მასთან ერთად, ვისთანაც საჭირო არაა. ბრიჯიტი ორსულად აღმოჩნდება, მას კი წარმოდგენა არ აქვს ვინ არის ბავშვის მამა: მისი ყოფილი, რომელსაც კოლინ ფერტი ასრულებს, თუ მისი ახალი გატაცება ჯეკი, რომელსაც პატრიკ დემპსი თამაშობს.

გეგმა ბ

იდეალური მამაკაცის ძიებით დაღლილმა ზოუიმ, რომელსაც ჯენიფერ ლოპესი ასრულებს, დედური ბედნიერების შესაგრძნობად ხელოვნური განაყოფიერების გაკეთება გადაწყვიტა. როგორც კი დაორსულდება, ის თავისი ოცნების მამაკაცს შეხვდება. ახლა ზოუიმ უნდა გადაწყვიტოს, როგორ გააერთიანოს მისი ორი ოცნება. ფილმი შეიცავს ყველაფერს, რასაც რომანტიკული კომედიებისგან ველიათ.

მეგობარზე მეტი

გამორჩეული და ერთ-ერთი საუკეთესო რომანტიკული კომედია ორსულობაზე არაჩვეულებრივი მსახიობების მონაწილეობით. ჯენიფერ ენისტონის გმირი, 40 წლის გაუთხოვარი ქალი ხელოვნური განაყოფიერების შედეგად დაორსულდება. 7 წლის შემდეგ იგი საუკეთესო მეგობარს შეხვდება, რომელსაც ჯეისონ ბეითმენი ასრულებს. საიდუმლო, რომელიც წლების განმავლობაში იმალებოდა, როგორც იქნა ირკვევა: კესის ბავშვის მამა, სწორედაც რომ, მისი ბავშვობის მეგობარია.