10 საუკეთესო ფემინისტური ფილმი

ფილმები, ისევე როგორც ლიტერატურა, ადამიანის ცხოვრების “შიგნიდან” დანახვის საუკეთესო საშუალებაა. ფილმები შესანიშნავ, ძლიერ ქალებზე და მათ ცხოვრებისეულ სირთულეებზე, შთააგონებს ყველა ფემინისტს და დააფიქრებს მათ, ვისაც მიაჩნია, რომ ქალს ბედნიერებისთვის მხოლოდ “წესიერად მოქცევა” სჭირდება და თავისუფლებას “არავინ უშლის”. ქვემოთ წარმოგიდგენთ ათ შესანიშნავ ფემინისტურ ფილმს, მშვენიერ, ემოციურ და დამაფიქრებელ ამბებს ქალებზე, მათ ბრძოლაზე და თვითდამკვიდრებაზე.

1. ტელმა და ლუიზა

ტელმა და ლუიზა ქმრებს ტოვებენ და გასართობად მიდიან, თუმცა მალე გასართობად არ ექნებათ საქმე – ლუიზა კლავს კაცს, რომელიც მისი მეგობრის გაუპატიურებას შეეცდება და პოლიცია ქვეყნის მასშტაბით ქალების დევნას იწყებს. მიუხედავად ამისა, მეგობრები ერთმანეთს გაჭირვებაში უკეთ გაიცნობენ.

2. ერინ ბროკოვიჩი

სამი შვილის მარტოხელა დედასაც რომ შეუძლია მოახერხოს პროფესიული განვითარება და საკუთარ თავში ახალი ძალების პოვნა, ერინ ბროკოვიჩმა დაგვარწმუნა. რეალურ ამბავზე დაფუძნებულ ისტორიაში ამ ძლიერი ქალის როლი ბრწყინვალედ ითამაშა ჯულია რობერტსმა და ყველასთვის მისაბაძი და დასამახსოვრებელი სახე შექმნა.

3. იისფერი

ამავე სახელწოდების წიგნის მიხედვით სტივენ სპილბერგის მიერ გადაღებული ემოციური ფილმის მთავარი გმირი ახალგაზრდა შავკანიანი ქალია. სილია ჯონსონს ბავშვობიდან ბევრი სისასტიკისა და სტრესის გადატანა უწევს, თუმცა მისი სწრაფვა სიყვარულისა და ბედნიერებისკენ, სირთულეებთან ბრძოლის ძალას აძლევს.

4. მონა ლიზას ღიმილი

ჯულია რობერტსის მორიგი ფემინისტური ფილმი. მისი სიუჟეტი 1950-იანი წლების ამერიკული ქალთა კოლეჯის მასწავლებლის გარშემო ვითარდება, რომელიც თავის სტუდენტებს ასწავლის, რომ ქალისთვის უმთავრესი განათლების მიღებაა და არა – საქმროს ძიება.

5. საათები

შესანიშნავი დრამა ბრწყინვალე სამსახიობო ანსამბლით. ამბავი მწერალ ვირჯინია ვულფზე და რომან “მისის დოლოუეიზე”, რომლის სიუჟეტიც წლების შემდეგ მის მკითხველ სხვადასხვა თაობის ქალების ცხოვრებასთან იკვეთება. დიდი ფემინისტი მწერალი არ მოერიდა გულახდილად ეთქვა, რა ბობოქარი ემოციები და ბრძოლა მიმდინარეობს გარეგნულად მშვიდი და ერთგული ქალის სულში, რად უჯდება მას ყველასთვის მოსაწონი სახის შენარჩუნება და რომ ქალის სურვილი, იყოს საკუთარ თავთან ჰარმონიაში, თავისუფალი და ბედნიერი, ნებისმიერ თაობაში მნიშვნელოვანია.

6. ამ კედლებს რომ ლაპარაკი შეეძლოთ

ერთი სახლი, სხვადასხვა სოციალური ფონი და ეპოქა (1950-იანები, 1970-იანები და 1990-იანები), სამი სხვადასხვა ქალი დაუგეგმავი ორსულობით და მასთან დაკავშირებული სირთულეებით – დრო გადის, ემოციები კი იგივეა. შესანიშნავი ფილმი-ილუსტრაცია იმაზე, თუ რამდენი რამ იცვლება დროთა განმავლობაში და რამდენი რამ, სამწუხაროდ, არა.

7. ქალები მამაკაცების გარეშე

მშვენიერი ფილმი ქალის მძიმე ხვედრზე ახლო აღმოსავლეთში, კერძოდ კი ირანში. 1953 წელს თეირანში პოლიტიკური დაძაბულობა აპოთეოზს აღწევს, ქალების ცხოვრებაში კი სულ სხვა ომი მიმდინარეობს. სხვადასხვა სოციალური წრის და თაობის ოთხი ქალი წინააღმდეგობრივ გარემოში ცდილობს საკუთარი ბედის შეცვლას. ირანელი რეჟისორის, შირინ ნეშატის მიერ გადაღებული დრამა ირანელი ქალების ცხოვრებაზე მოგვითხრობს.

8. ყველაფერი დედაჩემის შესახებ

ფემინისტური ფილმების ჩამონათვალი პედრო ალმოდოვარის ამ შედევრის გარეშე არ ივარგებდა. ერთ-ერთი ყველაზე ფემინისტი ესპანელი რეჟისორის ულამაზესი ფილმი ქალს როგორც დედას, მსახიობს, უმანკოს და ცოდვილს გვაცნობს. ნებისმიერი სახით, ნებისმიერ ასაკში ქალი ძლიერი და მშვენიერია, მამაკაცი მისკენ, როგორც საწყისისკენ, ისწრაფვის.

9. ვეშაპზე ამხედრებული

ამ ფილმში ამჯერად სამხრეთ ნახევარსფეროს მკვიდრი ქალის ცხოვრებას გაეცნობით. ძნელია, სიამყით არ აგავსოს პაის – ახალი ზელანდიის სანაპიროს მკვიდრი გოგონას შეუპოვრობამ, რომელიც თავის, მაორული მამაკაცური სამყაროს ტრადიციების მიმდევარ ბაბუას უმტკიცებს, რომ ქალებსაც შეუძლიათ, ვეშაპზე ამხედრდნენ.

10. სახიფათო სილამაზე

კურტიზან ქალს მე-16 საუკუნის ვენეციაში არამხოლოდ სილამაზე, განათლება და სიყვარულის ხელოვნების ცოდნა, არამედ დიპლომატიური ნიჭიც ესაჭიროებოდა. ეს არის მშვენიერი და ჭკვიანი კურტიზანი ქალის ამბავი, რომელსაც შავი ჭირით შეშინებული ქალაქი განტევების ვაცად გამოაცხადებს და ინკვიზიციურ სასამართლოს მოუწყობს.