10 საუკეთესო ფილმი ალტერნატიულ რეალობაზე

nugo July 10, 2021

ალტერნატიული რეალობა ისეთი თემაა, რომელზეც ნებისმიერი სცენარისტი და რეჟისორი ისურვებდა მუშაობას. აბსტრაქტული მოცემულობა, პარალელური სამყარო, ერთი ადგილი, სადაც განსხვავებული ამბები ხდება და სხვა პერსონაჟები მოქმედებენ — ეს ყველაფერი შეიძლება მართლაც ხდებოდეს, რადგან ჩვენ განსხვავებულ რეალობებში ვცხოვრობთ, რომლებსაც ერთმანეთს ერთდერთი კვანტური ერთეული აშორებს.

ეს საკითხი მრავალ რეჟისორს იზიდავს და მათი ხედვები ხშირად მართლაც ღირებულ ფილმებად იქცევა. ჩვენ მათგან საუკეთესოების ამორჩევა ვცადეთ. ამ ფილმებმა არამარტო საი-ფაი კინოზე დატოვეს მნიშვნელოვანი კვალი, არამედ ალტერნატიული რეალობის ახალ ვერსიებადაც იქცნენ.

1. მემანქანე (2004)

ამ ფილმისთვის კრისტიან ბეილმა 27 კგ დაიკლო, რადგან მთავარი პერსონაჟი ტრევორ რეზნიკი ლამის ჩონჩხადაა ქცეული, ამის მიზეზი კი რეალობისა და სიზმრის ზღვარზე არსებობაა. მარტოსული, შუა ხნის მამაკაცი ქრონიკული ინსომნიით იტანჯება და საზარელ ხილვებს ყოველდღიური ცხოვრებისგან ვერ არჩევს. რომ არ შეიშალოს, საკუთარი უცნაურობების კვლევას გადაწყვეტს და ცდილობს, საკუთარ თავში გაერკვეს.

ფილმის განმავლობაში ტრევორს საკუთარი წარსულიდან სხვადასხვა მომენტები ახსენდება, და ისიც, რამაც სამუდამოდ შეცვალა. მუდმივი პარანოია და ინსომნია ილუზიისა და რეალობის გარჩევას შეუძლებელს ხდის.

2. თვითმკვლელები: სიყვარულის ისტორია (2006)

ოდესმე წარმოგიდგენიათ, რა მოხდება თქვენი სიკვდილის შემდეგ? რასაკვირველია, ბევრს უფიქრია ამაზე. მაგრამ რა ხდება თვითმკვლელის სიკვდილის შემდეგ? ეს ფილმი სწორედ ასეთ ადგილზე გვიყვება. გორან დუკიჩი ყოველდღიურ მოწყენილობას თვითმკვლელობით გაურბის, მაგრამ სადაც მოხვდება, ის უარესია. თუმცა განგებით იგი განსაწმენდელის მსგავს ადგილზეა და შანსი ეძლევა, თავისი ქცევა გაიაზროს… და სიყვარულიც კი იპოვოს. თვითმკვლელები: სიყვარულის ისტორია სრულიად სხვა კუთხით გვიჩვენებს ცხოვრებას და თვითმკვლელობის შედეგებზე დაგაფიქრებთ.

3. პეპლის ეფექტი (2004)

„პეპლის ფრთის აქნევამ შეიძლება დედამიწის მეორე ნახევარში ქარიშხალი გამოიწვიოს“ – ესაა ამ ფილმის დევიზი და დიახ, ქაოსის თეორია სწორედ იმას გვეუბნება, რომ უმცირესი წვრილმანებიც კი შეიძლება უმნიშვნელოვანესი მოვლენების საწყისი გახდეს.

სიუჟეტი მიჰყვება ოთხ ადამიანს მათ ბავშვობიდან მოზრდილობამდე. ერთ-ერთი (ეშტონ კაჩერის გმირი) აღმოაჩენს, რომ დროში მოგზაურობა და საკუთარი წარსულის შეცვლა შეუძლია. იგი საკუთარ ბავშვობას უბრუნდება, მაგრამ მალევე ხვდება, რომ ნებისმიერ ცვლილებას გაუთვალისწინებელი შედეგები მოჰყვება.

ფილმის მთავარი სათქმელი ისაა, რომ ყველაფერი, რასაც თუნდაც იმპულსურად ვაკეთებთ, კონკრეტული მომავლის განმსაზღვრელია. სიუჟეტის თხრობა ფსიქოლოგიური და საკმაოდ დეპრესიულია. ის ცდილობს დაგვარწმუნოს, რომ არაფერი არ უნდა შეიცვალოს და დროში მოგზაურობა ფუჭი იდეაა. ყველაფერი მომხდარია და ჩვენ თავად ვართ საკუთარი ბედის მწერლები.

4. პიჯაკი (2005)

“ამ დროს პირველად მოვკვდი!” – ჩურჩულებს ედრიენ ბროუდი, როდესაც 1991 წელს პატარა ერაყელი ბიჭი მას გულში ესვრის.

ფილმი კინემატოგრაფიაში არსებული თითქმის ყველა ჟანრის ელემენტს შეიცავს, ოსკაროსანი მსახიობი კი შესანიშნავად ახერხებს მთელი მსოფლიოს ტანჯვა და სევდა განასახიეროს.

პიჯაკში რამდენიმე ალტერნატიული რეალობაა წარმოდგენილი – ჯეკი ხან მორგში იღვიძებს, ხან ფსიქიატრიულ საავადმყოფოში და ხანაც საერთოდ გაურკვეველ ადგილას. დასასრული კი, როგორც მსგავსი ფილმების შემთხვევაში, ძალიან მოულოდნელი და დამაბნეველია და პასუხებზე ბევრად მეტ კითხვას გვიტოვებს.

5. ვანილის ცა (2001)

რეჟისორ კამერონ ქროუისგან მსგავსს ფილმს არავინ ელოდა. მან ქასთი შესანიშნავი მსახიობებით დააკომპლექტა (ტომ კრუზი, პენელოპე კრუსი, კამერონ დიასი) და მოგვითხრო ახალგაზრდა, მდიდარი კაცის ისტორია, რომელსაც ყველაფერი აქვს, თუმცა მთავარი ცვლილებები წინ ელოდება — ის ხვდება მისთვის საბედისწერო ქალს და ამავდროულად ავტოსაგზაო შემთხვევის შედეგად სახე უმახინჯდება.

ფილმის მთავარი იდეა ოცნებებზეა დაფუძნებული. შეიძლება ითქვას, რომ მასზე დევიდ ლინჩის აშკარა გავლენაც იგრძნობა.

6. ბურუსი (2007)

სტივენ კინგის ამავე სახელწოდების მქონე რომანზე დაფუძნებული ფილმი მწვანე მილისა და შოუშენკიდან გაქცევის რეჟისორმა ფრენკ დარაბონტმა გადაიღო.

ბურუსი ერთდროულად არის ფსიქოლოგიური და დამთრგუნველი ჰორორი, რომლის ძირითადი მოქმედებაც დიდ სავაჭრო ცენტრში ვითარდება. საყიდლებზე გამოსული ხალხი იძულებულია გამოიკეტოს ერთ სივრცეში, რადგან ირგვლივ ყველაფერი ნისლმა მოიცვა. თანაც, ეს ყველაფერი არ არის — ქუჩებში უცნობი, საზარელი არსებები ადამიანებზე ნადირობენ.

ფილმი განსაკუთრებით ცნობილია მოულოდნელი დასასრულით, რომელიც წიგნის მკითხველს და, შესაძლოა, თვითონ სტივენ კინგსაც კი ვერ წარმოედგინა.

7. ფრთხილად! კარები იკეტება (1998)

გვინეტ პელტროუს პერსონაჟს ელენი ქვია, რომელიც სამსახურიდან გაათავისუფლეს და სახლში დასაბრუნებლად მეტროში ჩადის.

პირველ სცენარში ის მოახერხებს მატარებელში შესვლას, მეორეში კი კარები პირდაპირ მის სახესთან დაიკეტება. რა საკვირველია, ორივე შემთხვევას მისი ცხოვრების სხვადასხვაგვარი გაგრძელება მოჰყვება.

მაყურებლისთვის აღქმის გასამარტივებლად ელენი სხვადასხვა ვარცხნილობით გვევლინება, თუმცა ფილმის ჩახლართულ სიუჟეტში გარკვევა მაინც საკმაოდ რთული და საინტერესოა.

8. ზაფრა და გულისრევა ლას-ვეგასში 

იყიდე ბილეთი და ისეირნე — ასეთია ფილმის სლოგანი, სადაც მთავარ როლებს ბენისიო დელ ტორო და ჯონი დეპი ასრულებენ.

სამოელი ადვოკატი და სპორტული ჟურნალისტი ლოს-ანჯელესიდან გეზს ლას-ვეგასისკენ იღებენ და სამდღიანი გზა წარმოუდგენლად ეწელებათ. გზად უამრავ უსიამოვნებას, დაპირისპირებას და ათასგვარ ხიფათს ხვდებიან. ყველაზე მთავარი კი ის არის, რომ ორივე საშინლად არაფხიზელ მდგომარეობაშია და მთავარი გაურკვევლობა სწორედ მაშინ იწყება, როდესაც თავად მოგზაურებიც ვეღარ არკვევენ სად ვითარდება მოვლენები, მათ ფანტაზიებში თუ რეალურად იქ, სადაც თან არიან, თან არა.

მაყურებელსაც ფილმის ბოლომდე ის ინტერესი ითრევს, თუ რა ხდება სინამდვილეში და საერთოდ, არის თუ არა ის რეალობა, რასაც საკუთარი თვალებით ხედავს.

9. სიცოცხლის ხე

სიცოცხლის ხე ტერენს მალიკის ერთ-ერთი საუკეთესო ფილმია. სურათი მოგვითხრობს ოჯახზე, სადაც სამი ბიჭი იზრდება, მათ ცხოვრებაში თითქოს ყველაფერი კარგად, თითქმის იდეალურადაა, მაგრამ გადის დრო და ისინი საკუთარ თავს პოულობენ და ბევრს ფიქრობენ იმაზე, თუ როგორები სურთ მათ რომ იყვნენ, როგორები არიან და როგორები იქნებოდნენ, ყველაფერი რომ სხვაგვარად ყოფილიყო

აქ რეჟისორი ყველაზე დიდ აქცენტს მამაზე აკეთებს, რომელიც ოჯახში ყველაზე ზრუნავს და დედა, რომელიც შენდობის სიმბოლოა.

საკმაოდ რთულია ორი საათის განმავლობაში მაყურებელი გაერკვეს რა ხდება, სად ხდება მოქმედება და საერთოდ რატომ ხდება ის, რაც ხდება, რა დროში მიმდინარებოს მოვლენები, რომელია წარსული, აწმყო და მომავალი…

მთავარი ხაზი ისევ ოჯახზე გადის და იმ ელემენტარულ კომუნიკაციაზე, რომელიც ოჯახის წევრებს შორის ყოველთვის აუცილებელი და საჭიროა.

10. შეშლილთა კუნძული

მარტინ სკორსეზეს მორიგი შედევრი და ლეონარდო დიკაპრიოს კიდევ ერთი არაჩვეულებრივი როლი — ფილმი მეორე მსოფლიო ომის მარშალზე და ყოფილ ჯარისკაცზე, რომელიც საავადმყოფოდან გამქრალ ძალიან სახიფათო პაციენტის საქმეს იძიებს.

ფილმის სიუჟეტი გარკვეული დროის განმავლობაში გვატყუებს და თავს გვაჩვენებს, რომ საგამომძიებლო, დეტექტიური ჟანრისაა, თუმცა მალე მაყურებელი ხვდება, რომ რამდენიმე საათით ლეონარდოსთან და მარკ რუფალოსთან ერთად, ცოტა შემაშინებელ, შემაცბუნებელ და გაურკვეველ რეალობაში ხვდება.

ფილმის განმავლობაში უკვე აღარ ვიცით, ვის ან რატომ უნდა დავუჯეროთ და ყველაზე საოცარი კი დასასრულია, რომელსაც არავითარ შემთხვევაში, არცერთი წამით არ დაუშვებს ფილმის ალბათ არცერთი მაყურებელი.