10 საუკეთესო ფილმი ზაფხულზე, ზღვაზე და დასვენებაზე

nugo July 10, 2021

წელს საკმაოდ ცხელი ზაფხულია, ტემპერატურა კი განსაკუთრებით აუტანელი და საზიზღარი მაშინაა, როდესაც შვებულება ან არ გვეკუთვნის, ან უკვე გამოვიყენეთ და ანდაც მაშინ, როდესაც უბრალოდ არ ვიცით რა ვაკეთოთ.

ზაფხულის გადატანა საკმაოდ რთულია, თუმცა არსებობს ფილმები, რომლებიც რამდენიმე საათს მაინც შეგიმსუბუქებთ და ცოტა ხანს იმ პერიოდში გამოგზაურებთ, რომელიც ალბათ ყოველი ადამიანისთვის ყოველთვის საყვარელი, სანატრელი, საოცნებო და მოგონებებით სავსეა.

მაშ ასე, გთავაზობთ ფილმებს ზაფხულზე, სიყავრულზე, მზეზე, მოგზაურობაზე და ადრენალინზე. წარმოდგენილი ფილმების უმეტესობა ულამაზეს ადგილებშია გადაღებული, ამიტომ, შეგიძლიათ თქვენი შვებულებისთვის ახალი ადგილებიც აღმოაჩინოთ:

სანაპირო (2000)

დენი ბოილის ფილმში ლეონარდო დიკაპრიოს გმირი, რომელიც თავაგდასავლების ძიებაშია, ტაილანდში მიემგზავრება. მიუხედავად კრიმინალური სიუჟეტისა, ფილმში იმდენად ლამაზი პეიზაჟებია ნაჩვენები, რომ ყველფრის მიტოვება და “ბაუნტის” კუნძულზე გამგზავრება მოგინდებათ. ”სანაპიროს” ყურების შემდეგ არ გაგიკვირდებათ, რომ ფილმის გამოსვლის შემდეგ ტაილანდურმა კუნძულმა კო ტაომ, სადაც გადაღებები მიმდინარეობდა, უდიდესი პოპულარობა მოიპოვა და დღემდე უამრავი ტურისტი სტუმრობს მას.

ტალღების დამპყრობელი (2012)

ჯერარდ ბატლერის პერსონაჟს თავის ცხოვრება სერფინგის გარეშე ვერ წარმოუდგენია, თუმცა გარკვეული მიზეზების გამო მას ამ გატაცებაზე უარის თქმა უწევს. ყველაფერი იცვლება, როდესაც ის ჯონი ვესტონის გმირს, ჯეი მორიარტის ხვდება. ფილმი რეალურ მოვლენებზეა დაფუძნებული – რეალურმა ჯეი მორიარტიმ ნამდვილად დაიპყრო მავერიკსი, მაგრამ ტრაგიკულად დაიღუპა თავისი 23-ე დაბადების დღის წინა დღეს. ფილმის გადაღებები კალიფორნიის ქალაქ სანტა-კრუზში მიმდინარეობდა.

ვიკი, კრისტინა, ბარსელონა (2008)

ორი დაქალი – სერიოზული ვიკი, რომელსაც რებეკა ჰოლი ასრულებს და მეოცნებე კრისტინა, რომელსაც სკარლეტ იოჰანსონი ასრულებს – ზაფხულის არდადეგებზე ბარსელონაში მიემგზავრებიან. ვუდი ალენის თვალით დანახული ესპანური ვნებები ევროპის ერთ-ერთ ყველაზე ლამაზ ქალაქში ვითარდება, ასე რომ საზაფხულო ბარსელონას ატმოსფერო მთლიანად შეგეძლებათ შეიგრძნოთ. გადაღებები ბარსელონას გარდა ქალაქ ოვიედოში მიმდინარეობდა. სხვათა შორის, ფილმის გადაღებებისთვის ნაწილი ფული კატალონიის ხელისუფლებამ გამოყო, რითიც ადგილობრივი კინემატოფრაფები უკმაყოფილოები დარჩნენ. ფილმში ასევე მონაწილეობენ ხავიერ ბარდემი და პენელოპე კრუსი, რომელმაც ოსკარი საუკეთესო მსახიობი ქალისთვის მეორეხარისხოვან როლში მიიღო.

მამა მია! (2008)

ცნობილი მიუზიკლის მზიანი და სიცოცხლით სავსე რიმეიქი, რომელშიც ABBA-ს სიმღერებს ჰოლივუდის ვარსკვლავები ასრულებენ. სიუჟეტი პრაქტიკულად არ შეცვლილა: ახალგაზრდა გოგონა სოფი, რომელსაც ამანდა სეიფრედი ასრულებს ქორწილისთვის ემზადება და ოცნებობს, რომ საკურთხეველთან მამამ მიიყვანოს, მამამ, რომელსაც არც კი იცნობს. კუნძული კალოკერი, რომელზეც ფილმის გადაღებები მიმდინარეობდა რუქაზე არ არსებობს. სინამდვილეში, გამოგონილი კალოკერი თავის თავში ორ კუნძულს აერთიანებს –  სკოპელოსს და სკიათოზს. ფილმი ოქროს გლობუსზე ორ კატეგორიაში იყო ნომინირებული.

თავი მოაჩვენე ჩემს მეუღლედ (2011)

დენის დუგანის არაჩვეულებრივი კომედია, რომელიც 1969 წლის “კაკტუსის ყვავილის” რიმეიქია. პლასტიკური ქირურგი, რომელსაც ადამ სენდლერი ასრულებს ჯენიფერ ენისტონის გმირს, მარტოხელა დედას, სთხოვს, რომ ახალგაზრდა გოგონას თავი მის ცოლად მოაჩვენოს. გადაღებები ჯერ ლოს-ანჯელესში დაიწყო, შემდეგ კი ჰავაის ორ ყველაზე ცნობილ კუნძულზე – მაუიზე და კაუაიზე გადაინაცვლა. მსახიობები რეალურად არსებულ სასტუმროში ცხოვრობენ – ხუთვარსკვლავიან Grand Wailea-ში მაუიზე. სენდლერმა და ენისტონმა როლების ბრწყინვალედ შესრულებისთვის MTV-ს ჯილდოებიც დაიმსახურეს.

კულტურისა და დასვენების პარკი (2009)

თუ ზაფხულის გრანდიოზული გეგმები უკანასკნელ მომენტში გეცვლებათ, გული არ დაიწყვიტოთ – სწორედ ამაზეა გრეგ მოტოლას ახალგაზრდული კომედია. ჯესი ეიზენბერგის გმირი საზაფხულო მოგზაურობის ნაცვლად ფულის შესაგროვებლად ატრაქციონების პარკში იწყებს მუშაობას. არავინ ამბობს, რომ ზაფხულში მუშაობა დაბალანაზღაურებად პარკში სასიამოვნოა. კეთილი იყოს თქვენი მობრძანება გასართობ პარკში ედვენჩერლენდში, სადაც ყველაზე ცუდი სამსახური შემთხვევით იქცევა ზაფხულად, რომელიც მთელ ცხოვრებას ცვლის.

ნიჭიერი მისტერ რიპლი (1999)

მეთ დეიმონის გმირი შემთხვევით ამერიკის ერთ-ერთ ყველაზე მდიდარ ადამიანს ხვდება, რომელიც მას იტალიაში გზავნის დავალებით: დააბრუნოს მისი მფლანგველი შვილი შტატებში. მაგრამ, როდესაც დეიმონის გმირი ჯუდ ლოუს და გვინეთ პელტროუს პერსონაჟებს ხვდება, მალევე უმეგობრდება და მდიდრული ცხოვრების ეშხში შედის. ფილმის გადაღებების დროს ჯუდ ლოუმ ერთ-ერთი სცენის გადაღებისას ნეკნი მოიტეხა. დეიმონს ამ როლზე დასამტკიცებლად 13,5 კილოს დაკლება და ფორტეპიანოზე დაკვრის სწავლა მოუწია, ლოუს კი – საქსაფონზე. ენტონი მინგელას ფილმი ოსკარის ხუთ კატეგორიაში იყო ნიმინირებული.

მზის ამოსვლამდე (1995)

ამერიკელი ჯესი, რომელსაც ეტან ჰოუკი ასრულებს ვენის გზაზე მომხიბვლელ ფრანგ გოგონას ხვდება, რომელსაც ჯული დელპი თამაშობს. ახალგაზრდები ერთმანეთით დაინტერესდებიან და დელპის გმირი მატარებლიდან ვენაში ჩასვლას გადაწყვეტს. სულ რაღაც ერთ ღამეში, რომელიც რომანტიკით და გრძნობებით არის სავსე, ფილმის გმირებს ელოდებათ გაიგონ, თუ რა არის ნამდვილი სიყვარული. მათთან ერთად ამ ღამის გადატანის შემდეგ, შეიძლება თავადაც იგრძნოთ თავი შეყვარებულად.

ჭამე, ილოცე, შეიყვარე (2010)

გათხოვილი ქალი, რომელსაც ჯულია რობერტსი ასრულებს, ერთ მშვენიერ დღესაც მიხვდება, რომ საერთოდ არ ცხოვრობს ისე, როგორც უნდოდა. მტკივნეული განქორწინების შემდეგ ის სამოგზაუროდ მიემართება მსოფლიოს გარშემო. კინემატოგრაფებმა დაუფიქრებლად გადაწყვიტეს ფილმი სამ ქვეყანაში გადაეღოთ, რომლებიც გილბერტმა, “ჭამე, ილოცე, შეიყვარეს” ავტორმა მოინახულა. ზოგიერთ ადგილზე გადაღებებზე შეთანხმება არ წარმოადგენდა პრობლემას, მაგალითად, რომში. მაგრამ ზოგიერთ შემთხვევაში გადამღებ ჯგუფს იღბალი ეხმარებოდა. ხოლო თუ არ გამოდიოდა იმ ადგილზე გადაღება, რაც წიგნში იყო აღწერილი, მაშინ უამრავი ფოტოსურათი გროვდებოდა, და იმ ადგილებს თავიდან ქმნიდნენ.

სამერის 500 დღე (2009)

სიყვარული ცხოვრებას მუდმივ ზაფხულად აქცევს, სანამ სასტიკი რეალობა ყველა ოცნებას არ გაანადგურებს. ჯოზეფ გორდონ-ლევიტის გმირს სჯერა, რომ ამ თანამედროვე ცინიკურ სამყაროში ჯერ კიდევ არსებობს წმინდა და გულწრფელი სიყვარული. სამერს კი, რომელსაც ზოი დეშანელი ასრულებს, ამის არ სჯერა. ლევიტის გმირი იაზრებს, რომ ის შეყვარებულია არა მარტო უმშვენიერეს და მხიარულ გოგონაზე, არამედ თავად იდეაზე, რომ სიყვარულს ჯერ კიდევ აქვს ძალა შეაჩეროს მსოფლიო. შეყვარებული წყვილის ისტორია წინ და უკან იხვევა, რომელიც საუკეთესო და ყველაზე ცუდ მომენტებში, ყველაზე მხიარულ და მგზნებარე მომენტებში გვამოგზაურებს. ფილმი ოქროს გლობუსის ორ კატეგორიაში იყო ნომინირებული.