10 სერიალი, რომლებსაც საახალწლოდ უნდა ჩავუსხდეთ

nugo July 10, 2021

სერიალები უკვე დიდი ხანია ჩვენს ყოველდღიურობაში შემოიჭრა და მათ გარეშე ცხოვრება ვეღარც წარმოგვიდგებია. საახალწლო დღეებიც არაა გამონაკლისი, მით უმეტეს, თუ შვებულებისა და დასვენების დღეები ზუსტად ტელეშუებისთვის საყურებელ სიტუაციას ქმნის.

განსაკუთრებული ფუფუნებისთვის, საუკეთესო ვარიანტია მინისერიალების ყურება, რადგან დასვენების დღეებში ფილმის ბოლომდე ნახვასაც მოვასწრებთ და მასზე საუბარსაც. აღნიშნულ კოლექციაში თავმოყრილი მინისერიალები ორი მთავარი მახასიათებლით გამოირჩევა: სიახლით ან პოპულარობით. ასე რომ, თუ აქამდე ვერ გამონახეთ დრო, გამოიყენეთ ახალი წლის პერიოდი და ჩაუსხედით ან ხელახლა უყურეთ სერიალებს, რომლებიც დროს სასიამოვნოდ გაგატარებინებთ და ახალი ემოციებით აგავსებთ.

1. ენი

ამბავი გოგონაზე, რომელიც ბავშვობიდან მოყოლებული, წესებისა და გამოწვევების წინააღმდეგ, სიყვარულისა და ქვეყნად საკუთარი ადგილის დამკვიდრებისთვის იბრძვის. მთავარი პერსონაჟი 1890-იანი წლების მიწურულს მცხოვრები ობოლი გოგონაა, რომელიც დამთრგუნველი ბავშვობისა და უცხო ხალხში სამადლოდ ცხოვრების შემდეგ შეცდომით საცხოვრებლად გზავნიან ასაკოვან შინაბერასთან და მის ასევე შუახნის ძმასთან. 13 წლის გოგონა თანდათან სრულიად გარდაქმნის მათ და მთელი იქაური პატარა ქალაქის ცხოვრებას თავისი გამორჩეული სულით, მახვილი ჭკუითა და ბრწყინვალე წარმოსახვით.

2. დენთი

სულ ახალი მინისერიალი პოპულარობის პიკში მყოფი კიტ ჰარიგნტონისგან. სამეფო თამაშების ვარსკვლავის პროდიუსერული დებიუტი და ისტორიული დრამა ნაცნობ პოლიტიკურ მოვლენაზე – გაი ფოქსის ამბოხზე, რომელიც, როგორც სერიალის მესვეურებს ვერწმუნებით, სრულიად განსხვავებული კუთხითაა დანახული. მძაფრი გრძნობებისა და ისტორიული პერიპეტიების მოყვარულებმა ეს ტელეშოუ არ უნდა გამოტოვონ.

3. ნადირობა უნაბომბერზე

ეს მინისერიალით კრიმინალური დრამების მოყვარულთა (და არამარტო მათი) სამიზნე შეიძლება გახდეს. FBI-ის აგენტისა და საშიში დამნაშავის, თეოდორ კაჩინსკის, მეტსახელად უნაბომბერის ჭიდილის ძალიან საინტერესო ისტორია. მხოლოდ 8 ეპიზოდი და მძაფრი შეგრძნებები გარანტირებულია.

4. უცნაური ამბები

თუ აქამდე არ გინახავთ უცნაური ამბები, საახალწლო სეზონი საამისოდ ზედგამოჭრილია. ფანტასტიკური ჟანრის სერიალის მეორე სეზონი სულ ახლახან გამოვიდა და პირველზე არანაკლებ დიდებული აღმოჩნდა. 80-იანი წლებში მომხდარი უცნაური მოვლენები, გამქრალი ბავშვი, რომელსაც მეგობრები ეძებენ და მისტიკური, საშინელი სამყარო. ფილმის ქება შორს წაგვიყვანს, მით უმეტეს, რომ ამ ქებას თქვენამდეც ექნება მოღწეული.

5. უიღბლო ამბების სერია

ლემონი სნიკეტის ბესტსელერი წიგნების სერიის ეკრანიზაცია. ბოდლერების ოჯახის სამი ბავშვი ხანძრის შედეგად დაობლდება და მათზე მზრუნველობას გრაფი ოლაფი ითავებს. მას ბავშვების მემკვიდრეობის მიტაცება სურს. ბავშვები ცდილობენ დააჯერონ გარშემომყოფები, რომ გრაფი ოლაფი მათ მოკვლას ცდილობს, მაგრამ მათი არავის სჯერა. მძაფრი თავგადასავლების მოყვარულებისთვის Netflix-ის ამ უახლესი მინისერიალის გამოტოვება არ ღირს.

6. ტაბუ

მე-19 საუკუნის ინგლისი. თავგადასავლების მაძიებელი ჯეიმს კეზია დელანი აფრიკიდან ლონდონში, 1812 წლის ომის პერიოდში ბრუნდება, რათა მამამისის გადამზიდავი კომპანია ააღორძინოს. მთავრობა და მისი მეტოქე კი ერთნაირად ცდილობენ მის ჩაძირვას ნებისმიერ, თუნდაც მკვლელობის ფასად.

7. ჯონათან სტრენჯი და მისტერ ნორელი

ისევ მეცხრამეტე საუკუნე, ოღონდ ალტერნატიული ინგლისი. ნაპოლეონის ომის პერიოდი. ოდესღაც მივიწყებული მაგია ისევ იღვიძებს. მისტერ ნორელი აცოცხლებს მაღალჩინოსანის საცოლეს, შავი მაგიის და ბოროტი ძალის დახმარებით. მის მიერ დადებული გარიგება ბევრი უცნაური და დაუგეგმავი მოვლენის დასაწყისი ხდება.

8. შერლოკი

შერლოკს, რასაკვირველია, არავითარი წარდგენა არ სჭირდება, ის – ვიქტორიანული ხანის უსაყვარლესი დეტექტივი – ამჯერად თანამედროვე პოპკულტურის განუყოფელი ნაწილიცაა და ეს სწორედ ამ სერიალის დამსახურებაა. ახალი წლის დღეები საყვარელი სერიალის გადასამეორებლად მშვენიერ შანსს გაძლევთ, ხოლო ვინც იმ გაუგებარ კატეგორიაშია, ვისაც ბენედიქტ კამბერბეჩის ეს ბენეფისი არ უნახავს, გირჩევთ სასწრაფოდ გამოასწოროთ ეს დაუდევრობა.

9. სიამაყე და ცრურწმენა

ბრიტანული კლასიკოსის, ჯეინ ოსტინის გახმაურებული რომანის ტელეეკრანიზაცია, რომლის სიუჟეტიც მოგვითხრობს ბენეტების არცთუ დიდი მზითვის მქონე ქალიშვილებზე, რომელთა  სარფიანად გათხოვებასაც დედა მთელი გულით ცდილობს. ქალიშვილებში ყველაზე ჭკვიანი ელიზაბეთი მეტისმეტად ჯიუტი, ამაყი და თავდაჭერილია საიმისოდ, რომ თავი დაიმციროს. მაგრამ ეჭვიანმა ბუნებამ ხშირად შეიძლება სინამდვილის დანახვაშიც შეგიშალოს ხელი. კლასიკური, ეკალბარდებით მოფენილი სასიყვარულო ისტორია არდადეგებზე მშვენიერი არჩევანია.

10. შემთხვევითი ვაკანსია

ჯოან როულინგის ამავე სახელწოდების რომანის მიხედვით გადაღებული დრამა უცნაურ ამბავს მოგვითხრობს: პეგფორდში 45 წლის ასაკში უცაბედად იღუპება ადგილობრივი სათათბიროს წევრი ბარი ფეირბრაზერი. ეს მოვლენა ადგილობრივ მოსახლეობაზე შოკისმომგვრელად მოქმედებს და ქალაქის მშვენიერი ფასადის მიღმა დაფარულ სიმახინჯეებსაც ფარდა ეხდება. შობა-ახალი წელი როულინგის პოტერიადის გარეშე ბევრისთვის წარმოუდგენელია, თუმცა ამჯერად ამ ავტორის რადიკალურად განსხვავებული, მეტიც, ძალიან მაგლური დრამაც შეგიძლიათ სცადოთ.