10 ფილმი ადამიანად ყოფნის დადებით მხარეებზე

მეგობრობა, პატიოსნება, იმედი, ნებისყოფა, მისწრაფებები – ეს მხოლოდ რამდენიმე დადებითი ასპექტია, რომელსაც ქვემოთ ჩამოთვლილ ფილმებში ნახავთ. გთავაზობთ 10 შესანიშნავ ფილმს ადამიანად ყოფნის დადებით მხარეებზე:

ჩემი მარცხენა ფეხი (1989)

დაუჯერებელი ისტორია ცერებრალური დამბლის მქონე კრისტი ბრაუნზე, რომელმაც ოჯახის თანადგომისა და სიყვარულის წყალობით, თითქმის წარმოუდგენელი შეძლო – წერა და ხატვა ფეხის თითებით. ბრაუნის როლისთვის დენიელ დეი-ლუისმა ოსკარი დაიმსახურა.

რაშმორი (1998)

რაშმორი ადამიანის ცხოვრების ერთ-ერთ ყველაზე რთულ და ქაოსურ პერიოდს – მოზარდობას აღწერს. უეს ანდერსონი ამ პერიოდის ყველა პრობლემას წარმოაჩენს, როგორც მნიშვნელოვანი ცოდნის წყაროს მომავლისთვის და ამას საკმაოდ მხიარული გზით აკეთებს.

დენი კოლინზი (2014)

მას მერე, რაც ჯონ ლენონის მიერ 40 წლის წინ მოწერილ წერილს აღმოაჩენს, ცნობილი როკ-ვარსკვლავი ცხოვრების ძირფესვიანად შეცვლას გადაწყვეტს. ესაა ნამდვილ ამბავზე დაფუძნებული ფილმი, რომელიც გვარწმუნებს, რომ შეცდომების გამოსწორება არასდროსაა გვიანი.

გამაოგნებელი სიყვარული (2002)

მარტოსული კაცისა და თავგადასავლების მოყვარული ქალის უჩვეულო რომანი. პოლ ტომას ანდერსონის ფილმი გვიჩვენებს, რომ ადამიანის ერთ-ერთი დადებითი მხარე – ტრანსფორმაციის უნარია, მიუხედავად სოციალური გარემოს უარყოფისა.

პატარა ხულიგნები და მეკობრეების ოქრო (1985)

ერთ-ერთი საუკეთესო ფილმი ბავშვობის შესახებ. პატარა მეგობრები გადაწყვეტენ, სახიფათო თავგადასავალი წამოიწყონ და მიწისქვეშეთში ჩადიან მეკობრეების მიერ გადანახული ოქროს საპოვნელად…

ქმრები (1970)

ახლო მეგობრის უეცარი გარდაცვალება სამ მამაკაცს საკუთარ ცხოვრებაზე დაფიქრებას აიძულებს. შუახნის კრიზისში მყოფი ეს სამი მეგობარი უიქენდის ერთად გატარებას გეგმავს. ჯონ კასავეტესის ფილმი გვიჩვენებს, თუ რამხელა მნიშვნელობა აქვს ადამიანის ცხოვრებაში მეგობრობას.

შემოდგომის შუადღე (1962)

ბრწყინვალე კინოსურათი პატარა იაპონურ სოფელზე, სადაც სოციალური ურთიერთობები და უბრალოება არის ის, რაც მის მაცხოვრებელთა ცხოვრებას მართავს. ფილმი კოლექტიური ცხოვრების დადებით ასპექტებს წარმოაჩენს.

ჩანგკინგ ექსპრესი (1994)

ორი ისტორია – ორ პოლიციელზე, რომელთაც მათგან სრულიად განსხვავებული ქალი უყვარდება. ფილმის ატმოსფერო მელანქოლიურია და გვიჩვენებს, თუ რაოდენ განსხვავებულია მარტოობის აღქმა და გაგება აღმოსავლურ საზოგადოებაში.

პატარა მის ბედნიერება (2006)

გადარეული და კრიზისში მყოფი ოჯახი მანქანით გაუდგება გზას, რათა ოჯახის ყველაზე პატარა წევრმა სილამაზის კონკურსში მიიღოს მონაწილეობა. იქნებ სწორედ ეს მოგზაურობაა, რამაც მათ კრიზისი უნდა დააძლევინოს?

ფორესტ გამპი (1994)

ალბათ, ერთი-ერთი ყველაზე გამორჩეული ფილმი, რომელიც ადამიანად ყოფნის ყველაზე სევდიან და ყველაზე საოცარ მხარეებს წარმოაჩენს. ფილმი, რომელიც ამტკიცებს, რომ სიყვარული და გამბედაობა მთავარი რამაა, რაც კი ადამიანს გააჩნია.