10 ფილმი დეპრესიის შესახებ

nugo July 11, 2021

თანამედროვე კვლევების თანახმად, მსოფლიოს მოსახლეობის 19% დეპრესიით იტანჯება, რაც სოციალური აქტივობებისადმი ინტერესის დაკარგვაში, სიცარიელის განცდასა თუ უძილობაში გამოიხატება. ქვემოთ ჩამოთვლილი ფილმების მთავარი თუ მეორეხარისხოვანი გმირებიც ამ დაავადებას ებრძვიან. ესაა 10 ფილმი დეპრესიაზე, რომელიც მის არსს ნათლად წარმოაჩენს:

შმიდტის შესახებ (2002)

შმიდტის შესახებ

როდესაც შეიტყობს, რომ მისი ქალიშვილი თხოვდება, შმიდტი მის სანახავად მიემგზავრება. ამ მოგზაურობისას ის მთელ წარსულს, საკუთარ პიროვნებას, ხელიდან გაშვებულ შანსებსა და ცხოვრების არჩეულ გზას აანალიზებს. აცნობიერებს, რომ რუტინა, რომელშიც ცხოვრობს, მისთვის საშინლად მტანჯველია.

ნოსტალგია (1983)

ნოსტალგია

რუსი პოეტი იტალიაში მიემგზავრება მე-18 საუკუნის კომპოზიტორის ცხოვრებაზე ინფორმაციის მოსაძიებლად, სინამდვილეში კი – საკუთარ არსებობაზე პასუხების მისაღებად. მის ყოველ ნაბიჯში აპათია და მელანქოლია იგრძნობა, რაც მის სულიერ მდგომარეობაზე მიგვანიშნებს.

დაკარგული უიკენდი (1945)

დაკარგული უიკენდი

ოთხი ოსკარის მფლობელი და კანის კინოფესტივალის გამარჯვებული ფილმი პირველი კინოსურათია, რომელმაც დაავადება, სახელად ალკოჰოლიზმი აღწერა. ესაა გზა, რომლითაც მთავარი გმირი დეპრესიას ებრძვის.

ზამთრის შუქი (1963)

ზამთრის შუქი

პატარა ქალაქის მღვდელს დიდი ბრძოლის გადახდა უწევს რწმენის შესანარჩუნებლად, რადგან ეს საკმაოდ რთულია მუდმივი გაურკვევლობის, კითხვებისა და წარსულში მომხდარი ფაქტების ფონზე. ინგმარ ბერგმანის შესანიშნავი სურათი საკმაოდ მძიმე სანახავია.

ჩანაცვლება (2011)

ჩანაცვლება

ფილმის მთავარი გმირის ცხოვრება თითქოს მუდმივი ჩანაცვლების პროცესია. ახალ სკოლაში გადასულს კი ახალი სირთულეებისა და პასუხისმგებლობებისთვის უწევს თავის გართმევა. როგორ შეძლებს ამას ადამიანი, რომლისთვისაც დეპრესია მუდმივი მდგომარეობაა?

გიყვარდეს ლიზა (2002)

გიყვარდეს ლიზა

ცოლის თვითმკვლელობის შემდეგ მთავარი გმირი საშინელ ტანჯვას განიცდის და ყველანაირად ცდილობს ცხოვრების აზრის დაბრუნებას. მისი მცდელობები ბევრისთვის უჩვეულოა, თუმცა, ეს ყველაფერი ისევ და ისევ მის დეპრესიაზე მიანიშნებს.

ტენენბაუმების ოჯახი (2001)

ტენენბაუმების ოჯახი

უეს ანდერსონის ბრწყინვალე ფილმი ტენენბაუმების დისფუნქციური ოჯახის ირგვლივ ვითარდება. ყველაზე დიდი ფოკუსი კი დეპრესიაში მყოფ რიჩი ტენენბაუმზე კეთდება. მდგომარეობის მიუხედავად, ანდერსონი, ტრადიციულად, იუმორით გვიყვება ისტორიას.

ანომალიზა (2015)

ანომალიზა

წარმატებული მწერალი დეპრესიით იტანჯება. ის რამდენიმე დღეს სასტუმროში ატარებს, რათა თავის ფანებს ესაუბროს და მისი ცხოვრებაც ამ დროს იცვლება. ფილმი ნათლად გვიჩვენებს იმ სიცარიელეს, დეპრესიულ განწყობას, რომელიც თანამედროვე სოციუმშია გამეფებული.

მეშვიდე კონტინენტი (1989)

მეშვიდე კონტინენტი

მიხაელ ჰანეკე ამ ფილმში თანამედროვე სოციუმის ყოფას გმობს, გმობს გიჟურ რუტინას, რომელიც უზარმაზარ გავლენას ახდენს ადამიანთა აზროვნებასა და ცხოვრებაზე და ფაქტობრივად, შეუძლებელს ხდის სიამოვნების მიღებას.

შინაგანი ცეცხლი (1963)

შინაგანი ცეცხლი

ალკოჰოლიკი ახალგაზრდა კაცი სარეაბილიტაციო კლინიკას ტოვებს და ცდილობს, სხვა ადამიანებივით იცხოვროს, თუმცა, მუდმივი სევდა და დეპრესია მას ამის საშუალებას არ აძლევს.