10 ფილმი ზამთარზე, თოვლზე და სიმყუდროვეზე

nugo July 11, 2021

უკვე ზამთარია და გარეთ ყინვებიც დაიწყო, ზოგი სათხილამურო სეზონისთვის ემზადება, ზოგს კი გარეთ გახედვაც არ სურს. დღევანდელი კოლექცია მათთვის არის, ვისაც ზამთრის მალე გადაგორება სურს, თუმცა ამავე დროს ეს ფილმები სუსხიანი ამინდების დადებით მხარეებსაც დაგანახებთ. კარგად მოკალათდით, მოიდგით ცხელი ჩაი და იქნებ, ამ ფილმებმა ხასიათზე მოგიყვანოთ.

ზაზუნას დღე (1993)

ჰაროლდ რამისის კომედია, რომელმაც BAFTA-ს ჯილდო მიიღო საუკეთესო სცენარისთვის. ფილმი, რომელიც აუცილებლად მოგგვრით ღიმილს, პატარა დღესასწაულის “ზაზუნას დღეზე” მოგვითხრობს, რომელიც 2 თებერვალს ამერიკის პატარა ქალაქ პანქსუთაუნიში ტარდება. ბილ მიურეის პერსონაჟი, ტელეწამყვანი ფილ კონორსი ყოველ წელს აშუქებს ამ დღესასწაულს და უკვე ვეღარ იტანს თავის სამსახურს. და აი, ამჯერად, როდესაც მან დაასრულა რეპორტაჟზე მუშაობა და სასტუმროში გამოსაძინებლად წავიდა, ფილი დროის მახეში აღმოჩნდება და ისევ 2 თებერვალს ეღვიძება…

ოქროს კომპასი (2007)

ფილიპ პულმანის ზღაპრის “ჩრდილოეთის ციალის” ეკრანიზაცია, რომელიც ოსკარზე საუკეთესო ვიზუალური ეფექტებისთვის იყო ნომინირებული. კრის უეიცის ფილმი უჩვეულო გოგონას, ლირა ბელაკუას თავგადასვალზე მოგვითხრობს სამყაროში, რომელშიც ჯადოქრები მართავენ ჩრდილოეთის ცას, რომელშიც თეთრი დათვები ყველაზე მამაცი მეომრები არიან და რომელშიც ყველა ადამიანს ჰყავს თავისი პერსონალური ცხოველი, რომელიც მას მთელი ცხოვრების მანძილზე დაჰყვება.

გაყინული (2013)

რა თქმა უნდა, როდესაც ზამთარზე, თოვლზე და ყინვებზე ვსაუბრობთ, შეუძლებელია ეს კომპიუტერული ანიმაცია არ გაგვახსენდეს. ქრის ბაკის ნამუშევარი, რომელიც ბავშვებისთვის და ზრდასრულებისთვის ერთნაირად საყვარელია. თუ უბრალოდ განტვირთვა გინდათ თქვენს პატარებთან ერთად, ეს საუკეთესო არჩევანი იქნება – ჯადოსნური გარემო, სასიამოვნო სიმღერები და ყველასთვის საყვარელი გმირები.

ნათელი გონების მარადიული ბრწყინვალება (2004)

თუ მხოლოდ ანიმაციურ ფილმი თქვენთვის არ არის საკმარისი და უფრო ფილოსოფიისკენ იხრებით, მაშინ მიშელ გონდრის “ნათელი გონების მარადიული ბრწყინვალება” თქვენთვისაა. ფილმი, რომელშიც მთავარ როლებს ქეით უინსლეტი და ჯიმ კერი ასრულებენ, მიუხედავად იმისა, რომ უშუალოდ ზამთარზე არ არის აქცენტირებული, არაჩვეულებრივად გადმოსცემს ზამთრის მრავალფეროვან ატმოსფეროს.

ახალჩამოსული (2009)

კომედიური მელოდრამა რენე ზელვეგერის მონაწილეობით, რომლის გმირიც, კარიერისტი ლუსი ჰილი, მდიდრული ცხოვრებით ტკბება თბილ მაიამიში. რთულია, როდესაც სითბოს მიჩვეულს ცივ მინესოტაში გგზავნიან მივლინებით, სადაც უნდა შეეგუო არამარტო სიცივეს, არამედ იქაურ წესებსაც. დავალების შესასრულებლად კი ზელვეგერის გმირს მოუწევს საერთო ენა გამონახოს ადამიანებთან, რომლებიც არც თუ ისე კარგად არიან განწყობილები მის მიმართ.

-22 გრადუსი ცელსიუსით (2006)

ფრენკ მარშალის ფილმი, რომელიც ძაღლების გადარჩენაზე მოგვითხრობს ანტარქტიკაზე. ფილმი კორეიოსი კურაჰარას 1983 წლის “ანტარკტიკის” რიმეიქია, რომელიც რეალურ ამბავს ეყრდნობა. ფილმში, რომელიც სამ მკვლევარზე მოგვითხრობს. მიუხედავად იმისა, რომ ფილმი საკმაოდ დაძაბულია, წინ ლამაზი გარემო, საინტერესო სიუჟეტი და ერთგული ძაღლები გელოდებათ. ფილმში მთავარ როლს ყველასთვის საყვარელი პოლ უოკერი ასრულებს.

ევერესტი (2015)

ისლანდიელი რეჟისორის ბალთასარ კორმაკურის სათავგადასავლო ფილმი, რომელსაც საფუძვლად ჰიმალაიზე 1996 წლის მაისში მომხდარი რეალური მოვლენები უდევს. ფილმი მთასვლელების ჯგუფზე მოგვითხრობს და შეგვახსენებს, რომ ევერესტი შეცდომებს, სიხარბეს და დაუფიქრებლობას არავის პატიობს, ისევე, როგორც სულგრძელობას და თავგანწირვას. აქ გაბატონებულია კანონები, რომლებსაც არაადამიანურიც კი შეიძლება ვუწოდოთ…

პიჯაკი (2005)

ეს ფილმი ისეთი კადრების იწყება, რომ, შესაძლოა, აღარ მოგინდეთ მისი ყურება მთელ ოჯახთან, ან ბავშვებთან ერთად, პლედში გახვეულს სასიამოვნო გარემოში. მაგრამ, ფილმი ასეთი მძიმეც არ არის, მასში არის რაღაც მსუბუქი, ალბათ, სწორედ ზამთრის სიმსუბუქე. ფილმი მოგვითხრობს ნამდვილ და ძლიერ სიყვარულზე, რომელიც, მიუხედავად ყველაფრისა, ისევე ქრება, როგორც თოვლის ფანტელები.

შვებულება (2006)

ნენსი მეიერსის მელოდრამა, რომელშიც არის სითბოც და სიცივეც. ფილმი შეგვახსენებს, რომ არასდროსაა გვიანი ცხოვრება შევცვალოთ, თუნდაც ამისთვის დედამიწის მეორე მხარეს მოგვიწიოს წასვლა. თანაც, არ დაგავიწყდეთ, რომ ცივ, თოვლით დაფარულ ინგლისურ პროვინციაშიც კი, სადაც სიცივისგან ფეხებსაც ვერ იგრძნობთ და სადაც ირგვლივ განსაკუთრებული არაფერი ხდება, შეიძლება შემთხვევით ყველაზე მნიშვნელოვანი რამ იპოვოთ.

ზამთრის ზღაპარი (2014)

აკივა გოლდსმანის ფილმი, რომელიც მარკ ჰელპრინის რომანის “ზამთრის ზღაპრის” მიხედვით არის გადაღებული. ლამაზი მელოდრამა, რომელიც ამტკიცებს, რომ ნამდვილ სიყვარულს ვერც დრო შეუშლის ხელს, ვერც სიკვდილი და ვერც ცივი ზამთარი. ფილმის ატმოსფერო ნამდვილად შეესაბამება სახელწოდებას – სიყვარულის ისტორიის დეკორაციები მყუდრო თოვლიანი პეიზაჟებით არის სავსე.