10 ფილმი, თუ კრისტოფერ ნოლანი გიყვართ

კრისტოფერ ნოლანი თანამედროვეობის ერთ-ერთი ყველაზე თანმიმდევრული რეჟისორია. ის ძალიან კარგად ახერხებს ხელოვნებისა და კომერციის შერწყმას და თავისი შემოქმედებით მაყურებელზე დაუვიწყარ შთაბეჭდილებას ახდენს. თუ ნოლანი თქვენი საყვარელი რეჟისორია, მაშინ გირჩევთ, ეს 10 ფილმიც ნახოთ:

მისი აღმატებულობის საიდუმლო სამსახურში (1969)

ერთ-ერთი ფილმი ბონდის სერიიდან. ბონდის სამიზნე ერნსტ ბლოფილდია, რომელთან დასაახლოებლადაც ის სხვადასხვა ხერხს მიმართავს. კვალს ბონდი შვეიცარიაში მიჰყავს, სადაც ბლოფილდის საიდუმლო გეგმა უნდა გაიგოს.

სოლარისი (1971)

ფსიქოლოგს კოსმოსურ სადგურზე გზავნიან, რათა გაარკვიოს რამ გამოიწვია იქ მყოფი ადამიანების ემოციური პრობლემები. ანდრეი ტარკოვსკის ეს რთული ნამუშევარი გვესაუბრება იმაზე, რომ ადამიანის ფიქრებსა და მოგონებებს მატერიალიზების უნარი აქვს.

არ გამოიხედო (1973)

პატარა ქალიშვილის გარდაცვალების შემდეგ ცოლ-ქმარი ვენეციაში მიემგზავრება. იქ კაცს ორი მონაზონი ეუბნება, რომ მათ გარდაცვლილ ქალიშვილს ხედავს. მამას მათი არ სჯერა, სანამ გოგონას თავადაც არ დაინახავს…

ტაქსის მძღოლი (1976)

მარტინ სკორსეზეს საკულტო ფილმის მთავარი გმირი ინსომნიით დაავადებული ომის ვეტერანია, რომელიც უძილობასთან გასამკლავებლად ტაქსის მძღოლი ხდება. ნიუ-იორკის ქუჩების ღამის ცხოვრება მის ცნობიერებაში გარდამტეხ ცვლილებებს შეიტანს, შედეგი კი სასტიკი აღმოჩნდება.

მდგმური (1976)

ის სახლში ოთახს ქირაობს და მალე გრძნობს, რომ მეზობლები მისდამი კეთილგანწყობილნი არ არიან. როგორც ირკვევა, ქალმა, რომელიც მანამდე ამ ოთახში ცხოვრობდა, თავი მოიკლა. ახლა კი მის მთავარ საქმედ ყოფილი ბინადრის თვითმკვლელობის მიზეზის დადგენა იქცევა.

გაახილე თვალები (1997)

სიმპათიური და მდიდარი სეზარი აღმოაჩენს, რომ მენტალურ კლინიკაშია და ვერ იხსენებს – რატომ. მას მხოლოდ ის ახსოვს, თუ როგორ შეხვდა თავისი ცხოვრების სიყვარულს, და კიდევ ავარია, რომლის შედეგადაც სახე საშინლად დაუსახიჩრდა…

წვრილი წითელი ხაზი (1998)

ჯარისკაცებისთვის რეალობა მნიშვნელობას კარგავს და მიზანი საკუთარი თავისა და მეგობრების გადარჩენა ხდება. ტერენს მალიკის ფილმი ნათლად გვიჩვენებს, რა ზეგავლენას ახდენს ომი ადამიანის ფსიქიკაზე.

დეტონატორი (2004)

მეგობრები აღმოაჩენენ, რომ მათ მიერ შექმნილ მოწყობილობას გაცილებით მეტი შესაძლებლობა აქვს, ვიდრე ობიექტის მასის დაპატარავებაა. ეს კი ყველაფერს ცვლის…

ელიტარული დანაყოფი (2007)

1997 წელს, რიოში პაპის ვიზიტამდე, ელიტარული დანაყოფის კაპიტანი აღმოაჩენს, რომ იმ ადგილთან ახლოს, სადაც პაპი უნდა გაჩერდეს, ნარკოდილერების სახიფათო დაჯგუფებაა განლაგებული. ღიმილის მომგვრელია, რომ ფილმში მთავარ როლს ნარკოსის პაბლო ესკობარი – ვაგნერ მორა ასრულებს.

ლოგანი (2017)

მომავლის სამყაროში, სადაც მუტანტები თითქმის გადაშენდნენ, მოხუცი ლოგანი მშვიდი ცხოვრებით ცხოვრობს. თუმცა, როდესაც მუტანტი ბავშვი მასთან დახმარების სათხოვნელად მოდის, ლოგანი მის გადასარჩენად დიდ ბრძოლას იწყებს.