10 ფილმი, თუ ფსიქოლოგია გიყვართ

nugo July 11, 2021

ქვემოთ ჩამოთვლილი ფილმები დრამის ჟანრს მიეკუთვნება და გვიყვება ისტორიებს ფსიქოპათოლოგიებზე, დამოკიდებულებაზე, ფსიქოლოგიურ რეაბილიტაციაზე, ფსიქოლოგებზე და ექსპერიმენტებზე. მოკლედ, თუ ფსიქოლოგია გიყვართ, ეს 10 ფილმი თქვენთვისაა:

უკეთესი არ არსებობს (1997)

უკეთესი არ არსებობს

სიუჟეტის ცენტრში ფსიქოლოგიური პრობლემების მქონე შუახნის ასაკის კაცია, რომელსაც ეძლევა შანსი, თავისი ცხოვრება უკეთესობისკენ შეცვალოს. ფილმი ნათლად გვიჩვენებს, თუ რა სირთულეების გადალახვა უწევს ადამიანს ობსესიურ-კომპულსიური აშლილობით.

მექანიკური ფორთოხალი (1971)

მექანიკური ფორთოხალი

ენტონი ბერჯესის რომანის კუბრიკისეული ეკრანიზაცია სასტიკი ფსიქოპათის ისტორიას აცოცხლებს. ალექსი, თავის მეგობრებთან ერთად, მიზანმიმართულად სჩადის ბოროტებას, რითაც თითქოს ამტკიცებს, რომ მექანიკურად მოქმედი არსება არ არის. ციხეში მოხვედრის შემდეგ, თავისუფლების მოპოვების სურვილით, ის თანხმდება ფსიქოლოგიურ ექსპერიმენტში მონაწილეობას, რომლის მიზანიც ადამიანში ბოროტებისა და ძალადობრივი მიდრეკილებების განადგურებაა.

სირცხვილი (2011)

სირცხვილი

ახალგაზრდა კაცს, რომელიც სექსითაა შეპყრობილი, დესტრუქციელი პირადი ცხოვრება აქვს და მისი ობსესია მისი სოციალური ცხოვრების ყველა ასპექტზე ახდენს გავლენას…

შავი გედი (2010)

შავი გედი

წამყვანი ბალერინას გრაციოზული მოძრაობების უკან მძიმე შრომა, ოფლი და ცრემლი დგას. დგას მოძალადე დედის გამუდმებული კონტროლი და შეშლილობა, რომელიც ნაწამები სულისთვის ჩახშული სურვილების გათავისუფლების ადგილია.

შინაგანი ცეცხლი (1963)

შინაგანი ცეცხლი

ისტორია ალკოჰოლზე დამოკიდებულ ახალგაზრდა კაცზე, რომელმაც სარეაბილიტაციო კლინიკა ახლახანს დატოვა და სამყაროსთან ურთიერთობა უჭირს. უჭირს, გაუმკლავდეს მუდმივ სევდასა და დეპრესიას, რომელიც საშუალებას არ აძლევს, სხვა ადამიანებივით იცხოვროს.

სახიფათო მეთოდი (2011)

სახიფათო მეთოდი

ფილმი იკვლევს ყველაზე მნიშვნელოვან მომენტებს ფსიქოლოგიის ორი ყველაზე გამორჩეული ფიგურის – ზიგმუნდ ფროიდისა და კარლ გუსტავ იუნგის ურთიერთობიდან.

კრისტინი (2016)

კრისტინი

ფილმი რეალურ ამბავს ეფუძნება და გვიყვება ისტორიას ტელეწამყვანზე, რომელმაც თავი პირდაპირ ეთერში მოიკლა. ჩვენ ვხედავთ, თუ როგორ კარგავს თანდათან მთავარი გმირი კავშირს რეალობასთან, იქცევა თვითდესტრუქციულად, ემართება დეპრესია და პიროვნული დეზორიენტაცია, რასაც საბოლოოდ, ფატალურ დასასრულამდე მიჰყავს.

ბრწყინვალე გონება (2001)

ბრწყინვალე გონება

ფილმი გენიოსი მათემატიკოსის, ჯონ ნეშის ცხოვრებაზე მოგვითხრობს, ცხოვრებაზე, სადაც მან თავისი რევოლუციური აღმოჩენისთვის ნობელის პრემია მიიღო, და ცხოვრებაზე, სადაც ის პარანოიით იტანჯებოდა.

შეწყვეტილი ცხოვრება (1999)

შეწყვეტილი ცხოვრება

ნერვული შეტევის შემდეგ, ფილმის მთავარი გმირი ფსიქიატრიულ კლინიკაში ხვდება, სადაც სხვადასხვა ფსიქიკური დაავადებების მქონე ქალებს უმეგობრდება. ერთ-ერთი კი მას გაქცევაში დაარწმუნებს… ფილმი ეფუძნება სუზანა კეისენის ავტობიოგრაფიულ წიგნს, რომელიც ფსიქიატრიულში გატარებულ 18 თვეს აღწერს.

ექსპერიმენტი (2010)

ექსპერიმენტი

ფსიქოლოგიური ექსპერიმენტი, სადაც კვლევის მონაწილეებს პატიმრის ან მცველის როლი აქვთ… ფილმი ეფუძნება ფილიპ ზიმბარდოს გახმაურებულ ციხის ექსპერიმენტს, რომლის შედეგებმაც საზოგადოება შოკში ჩააგდო.