10 ფილმი, თუ ცხოვრებაში ინსპირაციას ეძებთ
ქვემოთ ჩამოთვლილი ფილმების მთავარი გმირები თავისებური გზით ცდილობენ ცხოვრების არსის შეცნობას, სოციალური მარწუხებისგან გათავისუფლებასა და “მე”-ს პოვნას. გთავაზობთ 10 ფილმს იმ შემთხვევისთვის, თუ ცხოვრებაში ინსპირაციას ეძებთ:
ტელმა და ლუიზა (1991)
საბედისწერო შემთხვევის შემდეგ, ორი მეგობარი – ტელმა და ლუიზა გაქცევას გადაწყვეტენ. მათი მოგზაურობა, რომელიც შესანიშნავი მუსიკის ფონზე მიმდინარეობს, დაუვიწყარია მაყურებლისთვის. რიდლი სკოტის ეს სურათი მოგცემთ გამბედაობას, საკუთარ ცხოვრებაში ცვლილებები შეიტანოთ.
მეოცნებენი (2003)
1960-იანი წლების პარიზი, არეულობა, დემონსტრაციები. ამერიკელი სტუდენტი ფრანგ და-ძმას უმეგობრდება და მათთან გადადის. ამ ახალგაზრდებისთვის ცხოვრების მთავარი გასაღები სექსუალური თავისუფლება და მისი შეუზღუდავი გამოვლენაა.
ჯული და ჯიმი (1962)
დიდი ხნის მეგობრები – ჯული და ჯიმი და კატრინი, რომელიც მათ ცხოვრებაში ჩნდება და ორივეს გულს იპყრობს. სასიყვარულო სამკუთხედის ყოველდღიურობა – ერთ-ერთი საუკეთესო ფილმი არამარტო ფრანსუა ტრიუფოს შემოქმედებაში, არამედ 1960-იანი წლების ფრანგულ კინოში.
ამერიკული სილამაზე (1999)
შუახნის მამაკაცისთვის, რომელიც მოცულია ოჯახური პრობლემებითა და სამსახურის რუტინით, მოზარდი შვილის დაქალი ინსპირაციის წყარო ხდება. მოულოდნელად ის ისეთი რაღაცების გაკეთებას იწყებს, რასაც მისგან ვერავინ წარმოიდგენდა. ფილმმა ძალიან დიდი გამოხმაურება გამოიწვია, რადგან ნათლად აჩვენა ამერიკული სილამაზე – ამერიკული საშუალო კლასის ყალბი ცხოვრება.
ხალხი ლარი ფლინტის წინააღმდეგ (1996)
ლარი ფლინტი, 1970-იანი წლების პორნოჟურნალის მფლობელი, მოცემულ რეალობაში თავისი უნიკალური მოდელის შემოტანას ცდილობს და ასევე, თავისი მღელვარე ცხოვრების გამორკვევას ქალთან, რომელიც უყვარს. ბრწყინვალე სცენარი, ბრწყინვალე რეჟისურა და ვუდი ჰარელსონის ბრწყინვალე შესრულა – ეს ფილმი ნამდვილად მეტ დაფასებას იმსახურებს.
მიკრობები და საწვავი (2015)
მათი მეგობრობა ორივეს ცხოვრებას ცვლის. ფრანგი მოზარდები მოგზაურობას წამოიწყებენ პატარა მანქანით, რომელიც თვითონ შექმნეს. ფილმი ცხოვრების იმ ერთდროულად ლამაზ და სევდიან მომენტს აღწერს, როდესაც ბავშვობა მთავრდება.
ქურდი (1981)
ახლოს თავისი ოცნების ასრულებასთან, რომ ბოლოს და ბოლოს, ნორმალურ ცხოვრებას დაიწყებს, სეიფების გახსნის ოსტატი ბოლო დავალებას თანხმდება. თუმცა, მაფიას, რომელმაც საქმე მისცა, მასთან დაკავშირებით სხვა გეგმები აქვს…
ოსტატი (2012)
პოლ ტომას ანდერსონის ფილმის სიუჟეტი ომის ვეტერანისა და კულტის ლიდერის ურთიერთობის ირგვლივ ვითარდება. ფილმი გვიჩვენებს ძალაუფლებით შეპყრობილობას, როდესაც ადამიანი ყველაფერს აკეთებს საკუთარი მიზნის მისაღწევად და არ ითვალისწინებს შესაძლო შედეგებს, რომელიც სხვა ადამიანთა ცხოვრებაში შეიძლება დადგეს.
მთვარის შუქი (2016)
ბავშვობის, მოზარდობისა და ზრდასრულობის ქრონიკა – შავკანიანი გეი მამაკაცის, რომელიც მაიამის უხეშ, სტერეოტიპულ სოციუმში იზრდება და მუდმივ შინაგან კონფლიქტშია, რაც გარემოს ცნობიერი თუ არაცნობიერი ზეწოლის შედეგს წარმოადგენს.
კაპიტანი ფანტასტიკა (2016)
ტყეში მცხოვრები ოჯახი, რომლის ყოველდღიურობაც, აზროვნებაც და ცოდნაც თავიდან ბოლომდე ბუნებას უკავშირდება, იძულებული ხდება, საცხოვრებლად ქალაქში გადავიდეს. მაგრამ როგორ შეძლებენ ისინი, მოერგონ მათთვის სრულიად უცხო, ტექნოლოგიზებულ სამყაროს? კაპიტანი ფანტასტიკა თანამედროვე კინოს ნამდვილი მარგალიტია, რომელიც აზრს თუ არ შეგიცვლით, კითხვებს მაინც გაგიჩენთ არსებულ ნორმებთან და ცხოვრების წესთან მიმართებით.
წყარო: www.movielistnow.com