10 ფილმი იმისთვის, რომ ჰელოუინის განწყობა შევიქმნათ

nugo July 11, 2021

შემოდგომის ერთ-ერთი ყველაზე ფერადი დღესასწაული, რომელიც სინამდვილეში ირლანდიური და შოტლანდიური ტრადიციებიდან მომდინარეობს, ამერიკის და ევროპის ქვეყნების შემოდგომის ერთ-ერთი მთავარი სიმბოლოა.

ნარინჯისფერი გოგრები, სანთლები და ვინტაჟური ფარნები ამშვენებენ ქუჩებს და ქალაქის რესტორნებს, თემატური წვეულებები კი ოქტომბრის ბოლოდან ნოემბრის შუა რიცხვებამდე გრძელდება. ეს ტრადიცია საქართველოშიც სულ უფრო პოპულარული ხდება, ამიტომ, თუ ჯერ არ გაქვთ გეგმები ჰელოუინისთვის, წარმოგიდგენთ 10 ფილმს, რომელიც ყველაზე მეტად მოუხდება შემოდგომის ამ საღამოს.

ჰელოუინი (1978)

რა თქმა უნდა, ამ სიაში პირველი სწორედ ეს ფილმი უნდა იყოს. ჯონ კარპენტერმა გადაიღო საკულტო ფილმი, რომელმაც საფუძველი ჩაუყარა, თუ არა მთლიანად ჟანრს, ფილმებს ჰელოუინზე მაინც… ამ ფილმის უკვე ძალიან ბევრი ნაწილი არსებობს, მათ შორის ერთ-ერთი სულ ცოტა ხნის წინ გამოვიდა, მაგრამ ამჯერად კლასიკაზე შევჯერდეთ. ახალგაზრდა ჯემი ლი კერტისი საშინელებათა ფილმების ვარსკვლავად იქცა ყველა იმ განსაცდელის გადალახვის შემდეგ, რაც მან “ჰელოუინში” გამოიარა. უნდა აღინიშნოს, რომ 2018 წლის “ჰელოუინშიც” მთავარ როლს სწორედ ის ასრულებს.

კოშმარი შობის წინ (1993)

არაჩვეულებრივი არჩევანია ბოროტი დღესასწაულისთვის, მაგრამ ბავშვებთან ერთად. ამ ანიმაციური ფილმის სცენარზე ფიქრი ტიმ ბარტონმა დისნეის სტუდიაში ანიმატორად მუშაობის პერიოდში დაიწყო და მისი დამუშავება პირველი მოკლემეტრაჟიანი “ვინსენტის” შემდეგ დაიწყო. ფილმის რეჟისორი ჰენრი სელიკი არის, რომელმაც მოგვიანებით “კორალაინი” გადაიღო, რომელიც, სხვათა შორის, ასევე გამოდგებათ ჰელოუინზე ოჯახური კინოჩვენებისთვის. უნდა აღინიშნოს, რომ “კოშმარი შობის წინ” ორჯერ იყო ნომინირებული ოსკარზე. მოკლედ, წინ არაჩვეულებრივი საუნდტრეკები და ნამდვილი ჰელოუინის განწყობა გელოდებათ.

ბითლჯუსი (1988)

ტიმ ბარტონის კიდევ ერთი ნამუშევარი, მაგრამ ამჯერად, როგორც რეჟისორის. 1988 წლის ლეგენდარული ფილმი, რომელმაც ოსკარი საუკეთესო გრიმისთვის მოიპოვა, ნამდვილად ღირს, რომ ნახოთ. ეს კინოფირი მისტიკური კინოს კლასიკად ითვლება და თან ჰელოუინის განუმეორებელ განწყობას ჩუქნის მაყურებელს.

ფოკუს პოკუსი (1993)

ამერიკული კომედიური საშინელებათა ფილმი, რომელშიც მთავარ როლებს სარა ჯესიკა პარკერი, ბეტ მიდლერი და ქეთი ნაჯიმი ასრულებენ, ჰელოუინისადმი მიძღვნილი შეკრებისთვის არაჩვეულებრივი არჩევანია. ფილმი სავსეა შავი იუმორით და ყველასთვის საყვარელი კლასიკური საშინელებათა ფილმების ელემენტებით: შავი კატა, ძველი მდიდრული სახლი და ჯადოქრები. კენი ორტეგას ფილმი დღესასწაულის და ჯადოქრობის სასიამოვნო მისტიკურ ატმოსფეროში გამოგზაურებთ.

დარიშხანი და ძველი ნაქარგი (1944)

ფრენკ კაპრას კრიმინალური კომედია, რომელიც ჯოზეფ კესელრინგის ამავე სახელწოდების პიესის მიხედვითაა გადაღებული. პიესის ძირითადი თემა კესელრინგმა ამერიკელი ემი არჩერ-გილიგანის ისტორიაზე დაყრდნობით დაწერა. სცენარის შთაგონების წყაროდ XX საუკუნის დასაწყისში რეალური მოვლენები გახდა, როდესაც ემი არჩერ-გილიგანი დამქირავებლებს თავის მოხუცთა თავშესაფარში წამლავდა. დიახ, არც ისე სასიამოვნო ისტორიაა, თუმცა ჰელოუინის განწყობის შესაქმნელად, ნამდვილად ღირს ყურება.

ფული ან სული (2007)

ფილმი ოთხი ერთმანეთთან დაკავშირებული საშინელი ისტორიებისგან შედგება, რომლებიც ამერიკის პატარა ქალაქში მოხდა ჰელოუინზე. ყველა ამ ისტორიას ერთი არსება აერთიანებს – სემი – იდუმალი არსება ძველ ნარინჯისფერ პერანგში და თავზე ჩამოცმული ტომრით. ოთხივე ისტორიაში პერსონაჟები ჰელოუინის ტრადიციებს არღვევენ და სემიც სწორედ ამიტომ ჩნდება მათ ცხოვრებაში…

ყვავი (1994)

ალექს პროიასის სადებიუტო ფილმი, რომელიც ჯეიმს ობარას გრაფიკული რომანის მიხედვითაა გადაღებული, მოგვითხრობს ისტორიას, თუ როგორ მოკლეს კრიმინალებმა მუსიკოსი ერიკ დრეივენი და მისი საცოლე შელი ჰელოუინზე. ჯეიმს ობარამ ეს ისტორია საყვარელი ადამიანის დაკარგვის შემდეგ დაწერა. კიდევ ერთი სევდიანი ისტორია, რაც ამ ფილმს უკავშირდება, ერიკ დრეივენის როლის შემსრულებლის, ბრენდონ ლის გადასაღებ მოედანზე გარდაცვალებაა, როდესაც ერთ-ერთი სროლის სცენის გადაღებების დროს რეკვიზიტორებმა შემთხვევით იარაღში ნამდვილი ტყვიები ჩადეს. ბრიუს ლის შვილს რამდენიმე ტყვია მუცლის არეში მოხვდა და საავადმყოფოში გარდაიცვალა.

კასპერი (1995)

თუ “ყვავი” ზედმეტად სევდიანი ისტორიაა თქვენთვის, ცოტა ხანი ისევ ბავშვობას დავუბრუნდეთ. ფილმი, რომელშიც მთავარ როლებს ბილ ფულმანი და კრისტინა რიჩი ასრულებენ, პატარა მეგობრულ მოჩვენებაზე მოგვითხრობს, რომელსაც თავისი მოძმეებისგან განსხვავებით, არ სურს ადამიანებს ავნოს. თანამედროვე ბავშვებს “კასპერი”, შეიძლება, ცოტა ძველმოდური მოეჩვენოთ, მაგრამ მასში არის ისტორია, რომელიც ყველაზე ცინიკურ მაყურებელსაც კი აუცრემლიანებს თვალებს.

დონი დარკო (2001)

ეს ჯეიკ ჯილენჰოლის ერთ-ერთი პირველი სერიოზული როლია. მის პერსონაჟს 16 წლის დონის სიკვდილის დაძლევის შემდეგ დროში მოგზაურობის უნარი აღმოაჩნდა. მას წარმოსახვითი მეგობარი ყავს, რომელიც კურდღლის ფორმაშია გამოწყობილი და იგებს, რომ ჰელოუინის ღამეს დედამიწის აღსასრული დადგება. რიჩარდ კელის ფილმი თავ-გზას აგიბნევთ, კურდღლის ნიღაბი კი საყვარლად ნამდვილად აღარ მოგეჩვენებათ…

ადამსების ოჯახი (1991)

და ბოლოს… მიუხედავად იმისა, რომ ამ ფილმში არავითარი ჰელოუინი არ არის, ვფიქრობთ, რომ ამ სიაში აუცილებლად უნდა იყოს, რადგან ადამსების ცხოვრება ერთი დიდი დღესასწაულია. ბარი ზონენფელდის შავი იუმორით გაჟღენთილი საკულტო ფილმი დიდ წარდგენას არ საჭიროებს, მაგრამ მაინც გეტყვით, რომ ყველაფერი, რაც ჩვეულებრივი მოკვდავისთვის საშინელი და საშიშია, ადამსებისთვის – არაჩვეულებრივი და ჯადოსნურია…