10 ფილმი მამაკაცურ მეგობრობაზე

nugo July 11, 2021

ამბობენ, მამაკაცურ მეგობრობას ვერაფერი შეედრება. ის უკვე დიდიხანია სარგებლობს პოპულარობით კინემატოგრაფიაში და უმეტეს შემთხვევაში მალევე იგებს მაყურებლის გულს. წარგმოგიდგენთ ცხოვრებისეულ, სახალისო, საინტერესო ფილმებს მეგობრობაზე, რომელიც სამუდამოდ გრძელდება.

ხელშეუხებელნი (2011)

რეალური ისტორია პარალიზებული მილიონერის და ხულიგანის მეგობრობაზე მოგვითხრობს. ამ მეგობრობის დახმარებით, ერთმა დეპრესიისგან თავის დაღწევა, მეორემ კი კრიმინალურ წარსულთან დამშვიდობება შეძლო. ფილმი სავსეა იუმორით, ემოციებითა და წარმოუდგენელი თავგადასავალით.

უკანასკნელი ვეგასი (2013)

ისტორია იმაზე, რომ წლები ვერაფერს აკლებს ნამდვილ მეგობრობას. ფილმის მთავარი გმირები 40 წლის შემდეგ ხვდებიან ერთმანეთს. რა თქმა უნდა, მათთვის ვეგასში წვეულების მოწყობა უკვე გვიანია, რადგან სწრაფად ადგომა, ან წამლების არევაც სერიოზულ საფრთხეს უქმნის მათ ჯანრმთელობას, მაგრამ არასდროსაა გვიანი ძველ მეგობრებთან ერთად წარსულის გახსენება.

კაკუნი ზეცის კარზე (1997)

ორი სასიკვდილოდ განწირული ადამიანი საავადმყოფოში დარჩენას და ზღვის სანახავად წასვლას შორის არჩევანს აკეთებს. ისინი ერთად მიემგზავრებიან უკანასკნელ მოგზაურობაში. სწორედ ასე იწყება გასაოცარი ისტორია მეგობრობაზე და ოცნებაზე, არაჩვეულებრივი რეჟისურით, სასიამოვნო იუმორით, მსახიობების შესანიშნავი შესრულებითა და ბობ დილანის ლეგენდარული სიმღერით.

მიყვარხარ ძმაო (2009)

კარგი კომედია ჟანსაღი იუმორითა და მორალით. უცნაურია, მაგრამ ფილმის მთავარი გმირი ისეთ პრობლემას ხვდება, როგორიც საუკეთესო მეგობარს და მეგობარ გოგონას შორის არჩევანის გაკეთებაა. მეგობრობა, ოჯახი, მარტოობა და სიყვარული – ეს ყველაფერი სასიამოვნოდ და მარტივად არის განხილული ფილმში.

გაჩუმდი (2003)

ერთ-ერთი თანამედროვე კლასიკური ფრანგული კომედია ჟან რენოს და ჟერარდ დეპარდიეს მონაწილეობით ორ მეგობარზე. სულელური სიტუაციების და აბსურდულობის მიღმა სევდიან ნოტებსაც შეამჩნევთ. არაჩვეულებრივი მსახიობები, გენიალური დიალოგები სასიამოვნო ფრანგული იუმორი – ეს არის ამ ფილმის მთავარი ღირებულებები, რაც მას ნამდვილად შეუდარებელს ხდის.

პიკის საათი (1998)

როდესაც მეგობრებზე ფილმების გადაღებები მოხშირდა, ჰოლივუდში ექსპერიმენტის ჩატარება გადაწყვიტეს არა მარტო “ფერებთან” და პარტნიორების ხასიათებთან, არამედ მენტალიტეტთანაც. ამიტომ ფილმისთვის ერთი აფროამერიკელი, მეორე კი ჩინელი აარჩიეს. სწორედ ამ იდეიდან დაიბადა “პიკის საათის” იდეა და შემქმნელებმა მაყურებელს არაჩვეულებრივი მეგობრობის ისტორია და დასამახსოვრებელი დუეტი აჩუქეს.

ცუდი ბიჭები (1995)

ორი პოლიციელი, რომლებსაც შავი იუმორის გრძნობა და უცნაური გზებით ყველანაირ პრობლემაში გახვევის ნიჭი აქვთ და რომლებიდანაც საკუთარი სტილით ახერხებენ გამოძრომას. ძლიერი და სახალისო კომედიური ბოევიკი შესანიშნავი მსახიობებით, მუსიკალური გაფორმებითა და რაც მთავარია, არაჩვეულებრივი მეგობრობის ისტორიით.

შერლოკ ჰოლმსი (2009)

გაი რიჩის ერთ-ერთი გამორჩეული ნამუშევარი, რომელიც წარმოუდგენელი შერლოკ ჰოლმსის და ექიმი უოტსონის ისტორიას განსაკუთრებულად საინტერესოდ მოგვითხრობს. გამორჩეული მეგობრობა, რომელიც გამორჩეული რეჟისორით, მონტაჟით, რობერტ დაუნი ჯუნიორის და ჯუდ ლოუს არაჩვეულებრივი დუეტით და ჰანს ციმერით დასამახსოვრებელი მუსიკით არის გადმოცემული.

მწვანე ქუჩის ხულიგნები (2006)

საფეხბურთო ხულიგნობა, როგორც სუბკულტურა, გაერთიანებები, რომლებმაც ძალადობა აირჩიეს, ბარები, ბინძური ქუჩები და ამ გაურკვევლობაში მოყოლილი ახალგაზრდა ბიჭი. ფილმი ბრიტანული სტილით, ნამდვილი მეგობრობის, თანადგომის, ერთმანეთის გაძლიერებისა და სხვა მნიშვნელოვანი გზავნილებით. ფილმი აუცილებლად დაგიტოვებთ სასიამოვნო შეგრძნებებს.

წვეულება ვეგასში (2009)

და ბოლოს, წარმოუდგენლად პოზიტიური და სახალისო კომედია ლას-ვეგასის თავბრუდამხვევი ხედებით იმაზე, თუ რაში შეიძლება გაეხვიონ მეგობრები და რა რთული იქნება ამ ყველაფრიდან გამოძრომა. “წვეულება ვეგასში” იმ იშვიათ შემთხვევას მიეკუთვნება, როდესაც მეგობრებთან ერთად ფილმის თავიდან ნახვის სურვილი არაერთხელ გაგიჩნდებათ.