10 ფილმი მარტოობაზე

nugo July 10, 2021

მარტოობა ჩვენი ცხოვრების განუყოფელი ნაწილია. ის ყველგანაა, ნებისმიერ ასაკში. ჩვენ შეიძლება მარტოები მაშინაც ვიყოთ, როცა ირგვლივ ძალიან ბევრი ადამიანი გვყავს, ან თუნდაც მაშინ, როცა ბედნიერები ვართ. ყოველთვის ასეა, ადამიანი ან მარტოა, ან მარტოობა სჭირდება.

რეჟისორები ამ თემას სხვადასხვაგვარად უყურებენ, ზოგისთვის ეს რომანტიკაა, ზოგისთვის დემონებთან ბრძოლა, ზოგისთვის კი საკუთარ თავთან წინააღმდეგობა და ცხოვრებისეული გამოწვევა და ჩვენც ამ თემაზე გადაღებულ ათ საუკეთესო, დამაფიქრებელ და ემოციურ ფილმს წარმოგიდგენთ, ფილმებს მარტოობაზე.

ტაქსის მძღოლი (1976)

მარტინ სკორსეზეს ფილმი ფსიქიურად გაუწონასწორებელ ტაქსის მძღოლზე, ტრევისზე მოგვითხრობს. მთავარი გმირი, რომლის როლიც არაჩვეულებრივად შეასრულა რობერტ დე ნირომ, თავისთვის ცხოვრობს, უძილობა აწუხებს და ღამე მუშაობს. დე ნიროს პერსონაჟი ვიეტნამის ომის სოციოპათი ვეტერანია, რომელიც წილ თავისუფლებას ღამით სეირნობაში პოულობს. ფილმში მთავარი გმირის ნამდვილი ადამიანიანური დრამაა ნაჩვენები, რომელიც სასოწარკვეთილია და მაინც ცდილობს გამოიწვიოს საზოგადოება და სისტემა. სკორსეზეს ფილმი ოსკარზე ოთხ კატეგორიაში იყო ნომინირებული.

პარიზი, ტეხასი (1984)

ვიმ ვენდერსის სევდიანი, მელანქოლიური და ემოციური ფილმი საშუალო ხნის ასაკის მამაკაცზე, რომლის როლსაც ჰარი დინ სტანტონი ასრულებს. სტანტონისთვის ეს ერთ-ერთი ყველაზე გამორჩეული როლია. მისი პერსონაჟი ოთხი წელი დაკარგული იყო, მაგრამ მოულოდნელად მექსიკის საზღვართან ახლოს უდაბნოში იპოვეს ამნეზიით. ის თავისი მეუღლის და ვაჟის მოძებნას ცდილობს, იმედი აქვს, რომ ახლობლებთან ურთიერთობას აღადგენს. ფილმი ოქროს გლობუსზე საუკეთესო უცხოენოვანი ფილმისთვის იყო ნომინირებული.

ბერლინის ცა (1987)

ვიმ ვენდერსის კიდევ ერთი ფილმი, წარმოუდგენელია ჩვენს სიაში არ ყოფილიყო. “ბერლინის ცა” – პოეტური ფენტეზის ჟანრის დრამაა ორ უჩინარ და უკვდავ ანგელოზზე გერმანიის დედაქალაქში. მათ ადამიანების საიდუმლო ფიქრების წაკითხვა შეუძლიათ, მათთვის უცხოა ყურადღება და ფიზიკური შეგრძნებები. მაგრამ ერთ-ერთ ანგელოზს ცირკის აკრობატი უყვარდება და ადამიანური ბედნიერებისთვის მზად არის, მარადიულობა დათმოს. ვენდერსის ფილმი BAFTA-ზე საუკეთესო უცხოენოვანი ფილმისთვის იყო ნომინირებული.

შიშვლები (1993)

ბრიტანელი რეჟისორის მაიკ ლის ფილმები ადამიანური ურთიერთდამოკიდებულების რეალისტური სცენებით არის ცნობილი. ასევეა 1993 წელს გადაღებული დრამა, რომელიც სექსუალური აქტით იწყება დევიდ ტიულისის პერსონაჟის, ჯონის მონაწილეობით, რომელიც ჭკვიანი და განათლებული ახალგაზრდაა, რომელსაც, როგორც ჩანს, დეპრესია აწუხებს. რაც უფრო იხსნება მთავარი პერსონაჟი, მით უკეთ ჩანს მისი ნიჰილისტური, გესლიანი და მკაცრი ხასიათი. მაიკლის ეს ფილმი საკმაოდ წარმატებული აღმოჩნდა კანის ფესტივალზე.

ჩანგკინგ ექსპრესი (1994)

რომანტიკულ კომედიაში რამდენიმე გმირის ბედისწერა იკვეთება, თუმცა თხრობა, ერთი შეხედვით, დაუკავშირებელი ნოველებითაა აგებული. პირველი ისტორია შეყვარებულ და მარტოსულ პოლიციელზე მოგვითხრობს, რომლის გზაზეც საბედისწერო ქალი გამოჩნდება. მეორე ისტორიაში სხვა პერსონაჟი იწვევს ინტერესს ადგილობრივი სასადილოს თანამშრომელში. ვონ კარ-ვაი ოსტატურად ასახავს დამთხვევებს, რომლებიც ორ განსხვავებულ ისტორიას აკავშირებენ. ეს ულამაზესი ფილმი დიდი ხნით დაგამახსოვრდებათ.

გარიყული (2000)

რობერტ ზემეკისის კლასიკად ქცეულ ფილმში ტომ ჰენკსმა თავისი ერთ-ერთი საუკეთესო როლი შეასრულა. თანამედროვე რობინზონ კრუზო, რომელიც კაცობრიობისგან ჩამოშორებულმა გადარჩენისთვის უნდა იბრძოლოს. სანამ თვალს ადევნებთ მთავარი გმირის სასტიკ ბრძოლას გადარჩენისთვის, მადლიერების გრძნობა გაგიჩნდებათ იმ კომფორტისთვის, რომელსაც ყოველთვის ისე აღვიქვამთ, თითქოს ეს ასეც უნდა იყოს. ზემეკისის სათავგადასავლო დრამა გაგვახსენებს, რომ ცხოვრებაში იმით უნდა დავტკბეთ, რაც გვაქვს. ფილმი ოსკარზე ორ კატეგორიაში იყო ნომინირებული.

თარგმანში დაკარგულები (2003)

ტოკიო, ღამე, ძვირადღირებული სასტუმროს ბარი… აქ, უძილობისგან თავის დასაღწევად მისული ორი ამერიკელი ხვდება ერთმანეთს: ბილ მიურეის პერსონაჟი, მსახიობი ბობ ჰარისი და სიმპათიური ახალგაზრდა ქალი შარლოტა, რომლის როლსაც სკარლეტ იოჰანსონი ასრულებს. ეს გონებამახვილი იუმორით და ღრმა ფილოსოფიით გაჯერებული მელოდრამაა. კომედიის და სულიერების შეჯახება სოფია კოპოლას ფილმს მარტივ სანახაობად ხდის, რომელიც სასიამოვნო საყურებელია და მისი განმეორებით ნახვის სურვილს აჩენს. სოფია კოპოლამ ოსკარი საუკეთესო ორიგინალური სცენარისთვის მიიღო.

გაზაფხული, ზაფხული, შემოდგომა, ზამთარი… და ისევ გაზაფხული (2003)

ამ კორეულ ფილმში მოქმედება იზოლირებულ ტბაზე ხდება, სადაც პატარა ტაძარში მოხუცი მკურნალი და მისი პატარა მოსწავლე ცხოვრობენ. მთავარ გმირებთან ერთად თვალს ვადევნებთ როგორ ცვლის ერთი სეზონი მეორეს და როგორ გადის წლები. ფილმში მიმდინარე მოვლენები ისეთივე გარდაუვალად გვეჩვენება, როგორც სეზონებში ცვალებადობა, რაც ცხოვრების ციკლზე მიგვანიშნებს. კი-დუკ კიმის არაჩვეულებრივი დრამა, მოკლე დიალოგებით და მარტივი ისტორიით, ნამდვილი შედევრია.

მემანქანე (2004)

ბრედ ანდერსონის ფსიქოლოგიური თრილერის მთავარი გმირი კრისტიან ბეილმა განასახიერა, რომელსაც ამ როლისთვის 30 კილოს დაკლება მოუწია. ბეილის პერსონაჟს, ტრევორ რეზნიკს, მთელი ერთი წელი არ უძინია და გამუდმებით ცდილობს სიზმრის და რეალობის, საშიში მოჩვენებების და რეალური მოვლენების ერთმანეთისგან გარჩევას. მთავარი გმირი გარეგნულობით და ექსცენტრიული ქცევის დამსახურებით უმეტესად მარტოა.

ველურ პირობებში (2007)

შონ პენმა ერთ ღამეში წაიკითხა ჯონ კრაკაუერის “ველურ პირობებში”, რომლის მიხედვითაც გადაიღო ამავე სახელწოდების ფილმი, რომლისთვისაც თითქმის ათი წელი ემზადებოდა. ეს ბიოგრაფიული ფილმი კრისტოფერ მაკქენდლესზე მოგვითხრობს, ახალგაზრდაზე უზრუნველყოფილი ოჯახიდან, რომელმაც უარი თქვა მატერიალურ ღირებულებებზე, გაეცალა საზოგადოებას და ამერიკაში “ალექსანდრე სუპერმაწანწალას” სახელით მოგზაურობდა. მთავარ როლს ფილმში ემილ ჰირში ასრულებს. შონ პენის ფილმი ოსკარის ორ კატეგორიაშ იყო ნომინირებული.