10 ფილმი მოზარდებზე, რომელიც ყველა მშობელმა უნდა ნახოს

nugo July 10, 2021

მოზარდობა ადამიანის ცხოვრებაში ყველაზე რთული პერიოდია. ეს სირთულეების, სწრაფი ცვლილებების, წინააღმდეგობების და არასტაბილურობის დროა. მთელი ამ მაქსიმალიზმის და რადიკალურობის მიღმა რთულია ზრდასრულების სისუსტეების დანახვა. წარმოგიდგენთ ფილმებს მოზარდებზე და მათ პრობლემებზე, რომელთა ყურების შემდეგაც ყველა მშობელი უკეთ გაუგებს თავის შვილს.

თინეიჯერი გოგოს დღიური

15 წლის მინის ცხოვრებაში უმნიშვნელოვანი მოვლენა მოხდა – ის ქალი გახდა. და ახლა, როდესაც ის დარწმუნებულია, რომ ზრდასრული დამოუკიდებელი ადამიანია, მინი ძველ კასეტებზე ყველა თავისი აზრის ჩაწერას იწყებს და თხრობას თავისი “პირველი მამაკაცის” – დედამისის ბოიფრენდის აღწერით იწყებს.

თითქმის ჩვიდმეტი

ნადინს არ ჰყავს მეგობრები, ის ვერ იტანს თავის იდეალურ ძმას. ფიქრობს, რომ ის არ არის ლამაზი, ირგვლივ ყველა მოღალატეა, ის არავის უყვარს და ამიტომაც, გამუდმებით სჩადის სისულელეებს. როდესაც ნადინი ყვეალფერთან მარტო ბრძოლით იღლება, თავის პრობლემებში სკოლის მასწავლებლის ჩათრევას იწყებს, რომელიც ამასობაში, პირად ფსიქოლოგად აქცია. ფილმში მთავარ როლებს ვუდი ჰარელსონი და ხეილი სტაინფელდი ასრულებენ, რომელიც ოქროს გლობუსზე საუკეთესო მსახიობი ქალისთვის (მიუზიკლსა ან კომედიაში) იყო ნომინირებული.

მეამბოხე

ჰეილი გრემი პერსპექტიული ტანმოვარჯიშეა, რომელიც დიდი გამარჯვებებისკენ მიიწევს. მან გაიგო, რომ დედამისი მამას ღალატობდა თავის ტრენერთან და პროტესტის ნიშნად წყვეტს ვარჯიშს მორიგი შეჯიბრის წინ. ჰეილი მოზარდებისთვის დამახასიათებელი ტიპური მეამბოხე ხდება – ბოდიალობს ქუჩებში და არღვევს კანონს. რაღაც მომენტში პოლიცია მას არჩევანის წინაშე აყენებს – ციხე ან დახურული სპორტული სკოლა ელიტარული ტანმოვარჯიშეებისთვის, რომელიც, პრინციპში, ასევე ციხეა. მაგრამ პროსტესტი ჰეილის სისხლში აქვს, ამიტომ სპორტში დაბრუნების შემდეგ, ის იქაც ახერხებს გადატრიალების მოწყობას.

ჯუნო

თექვსმეტი წლის ჯუნომ გაიგო, რომ ორსულად არის თავისი მეგობრისგან. თითქმის დაუფიქრებლად, მან აბორტის გაკეთება გადაწყვიტა, მაგრამ როდესაც კლინიკაში მიდის, ხვდება, რომ მას არ შეუძლია ამ ნაბიჯის გადადგმა. ამის შემდეგ კი, ის და მისი მეგობარი იწყებენ ისეთი ოჯახის მოძებნას, რომელიც ბავშვს საკუთარივით მოუვლის. პარალელურად ჯუნოს ცხოვრებაში სხვა არასაბავშვო პრობლემებიც ჩნდება. ფილმმა ოსკარი საუკეთესო ორიგინალური სცენარისთვის მიიღო.

კალათბურთელის დღიურები

ჯიმ კეროლსი ავტობიოგრაფიული რომანის ეკრანიზაცია თექვსმეტი წლის მოზარდის ისტორიას მოგვითხრობს, რომელიც კარგად თამაშობს კალათბურთს და აშკარად აქვს პოეტური ნიჭი. ერთ დღეს, თექვსმეტი წლის კეროლი ნარკოტიკს გასინჯავს და ყველაფერი თავდაყირა დგება, ნარკოტიკი მისი ცხოვრების განუყოფელი ნაწილი ხდება და თავიდან ფეხებამდე დიდ ჭაობში ეფლობა, მისი ინტერესები, სამომავლო გეგმები და ინტერესები ნარკოტიკის მიღმა რჩება და აქედან იწყება ბრძოლა გადარჩენისთვის. კეროლის როლს ფილმში ლეონარდო დიკაპრიო ასრულებს.

კიტი

17 წლის ნატალი ფიქრობს, რომ მას თავისი ცხოვრების ზუსტი გეგმა აქვს – სპორტული წარმატებები, უნივერსიტეტში ჩაბარება. მაგრამ ლაბორატორიულ გაკვეთილებზე მას ახალი მეწყვილე კიტი შეხვდა და მისი ცხოვრება სრულიად იცვლება, თუმცა თავად ნატალი ამას თავიდან ვერ ხვდება. ეს არ არის უბრალოდ უბედური სიყვარულის ისტორია, ის ტკივილსა და სიძულვილზე, ცხოვრების სურვილსა და სიყვარულზეა და იმაზე, რომ ხანდახან შეუძლებელია გარკვეული მოვლენების შეცვლა.

უნდა ვილაპარაკოთ კევინზე

16 წლის ბიჭი, დაბადებიდანვე უცნაურია. აშკარა ზიზღი, რომელიც მშობლების, ოჯახის წევრების და გარშემომყოფების მიმართ აქვს, თავიდანვე ამჩნევს დედა, თუმცა სულაც არ ელოდება იმას, რა უბედურებასაც კევინი წლების განმავლობაში გეგმავს და შემდეგ რეალობაში მოჰყავს. ეს არის ფილმი ურთიერთობაზე, დედის გავლენაზე, ძალაზე, დიდ უბედურებაზე და იმაზე, თუ როგორ შეუძლიათ ადამიანებს აპატიონ ერთმანეთს ის, რაც ყველაზე მეტად სტკივათ და რა იარაც, წლების განმავლობაში, სიკვდილამდე მოუშუშებელია. ამ ფილმისთვის ტილდა სუინტონი ოქროს გლობუსზე საუკეთესო მსახიობი ქალისთვის დრამაში იყო ნომინირებული.

საფრთხობელა

მეექვსე კლასელი გოგონას ისტორია, რომელიც უსამართლობას, ღალატს და სისასტიკეს გაუმკლავდა. ფილმი მოგვითხრობს, თუ რა რთულია იყო ყველასგან გარიყული. მთავარი გმირი ლენა საკუთარ თავზე იღებს ბიჭის დანაშაულს, რომელმაც ლაჩრულად დააღალატა თანაკლასელები. კლასმა მას ბოიკოტი გამოუცხადა, რომელსაც უერთდება ის, ვინც მან თავისი ტყუილით დაიცვა.

ბუმი

ცამეტი წლის ვიკის მშობლებს არ სურთ აღიარონ, რომ მათი პატარა გაიზარდა და მას კვლავინდებურად პატარა გოგონასავით ზრდიან – ზედმეტად ყურადღებიანები არიან და სერიოზულად არ აღიქვამენ. ამასობაში ვიკი სასოწარკვეთით ცდილობს როგორმე ხმა მიაწვდინოს მათ, რომ მის ცხოვრებაში ხომ ბევრი რამ ხდება პირველად და მას დახმარება სჭირდება. ვიკის როლს ფილმში სოფი მარსო ასრულებს.

ალფა დოგი

ზაკს ძალიან უნდა მალე გაიზარდოს და მას, შეიძლება ითქვას, “უმართლებს” – ნარკომოვაჭრეებმა ის უფროსი ძმის ვალების გამო მოიტაცეს. ყველაფერი ისე იწყება, თითქოს ის სახალისო თავგადასავალში მოყვა: გამტაცებლებთან მოშინაურების შემდეგ ზაკი იწყებს უფროსების ყველა ნარკოტიკის გასინჯვას, რომლებზეც ასე ოცნებობდა და თავის მცველებთან დამეგობრებასაც ასწრებს. მაგრამ ის ვერც კი წარმოიდგენს, თუ რამდენად უახლოვდება ყველაზე საშიშ სამყაროს და ნელ-ნელა როგორი დამოკიდებული ხდება ასეთ უპასუხისმგებლო ცხოვრებაზე. ფილმი რეალურ ისტორიას ეფუძნება.