10 ფილმი მუსიკაზე და მუსიკოსებზე

nugo July 10, 2021

ფილმები მუსიკაზე – გამორჩეული და განსაკუთრებული ჟანრია კინემატოგრაფიაში. ეს ერთდროულად კინემატოგრაფიის და მუსიკის შედევრებია. ასეთი ფილმების მთავარი მახასიათებლებია – ძლიერი საუნდტრეკი, ბრწყინვალე გამოსახულება და სტანდარტული სიუჟეტი.

მიუხედავად იმისა, რომ ფილმების უმეტესობა მოგვითხრობს, თუ როგორ აღმოჩნდა ადამიანი დაბალი ფენიდან მუსიკალური სამყაროს მწვერვალზე, ასეთ ერთფეროვან ფილმებს შორისაც არსებობს ნამდვილად არაჩვეულებრივი და ღირსეული კინოფირები. წარმოგიდგენთ სწორედ ასეთ ათ ფილმს მუსიკაზე და მუსიკოსებზე:

რეი (2004)

ისტორია რეი ჩარლზის ცხოვრებაზე, რომელშიც ნიჭს და წარმატებული მუსიკოსის კარიერას უსინათლობა, ნარკოტიკებთან პრობლემები, ძმის დაკარგვა, 12 შვილი და რასიზმთან მუდმივი ბრძოლა სდევდა თან. ფილმი ჩარლზის ცხოვრებაზე მისი ბავშვობის პერიოდიდან მოგვითხრობს. ფილმის გადაღებებისთვის ჯემი ფოქსი, რომელიც ჩარლზის როლს ასრულებს, სპეციალურ გაკვეთილებს ესწრებოდა უსინათლოებისთვის. უფრო მეტიც, ფორტეპიანოს ყველა პარტია ფილმში მსახიობმა თავად შეასრულა. ფილმმა ოსკარი საუკეთესო ხმისთვის მიიღო, ფოქსმა კი – ოსკარი საუკეთესო მსახიობი კაცისთვის.

ლუინ დევისის შინაგანი მხარე (2013)

ჯოელ და ეთან კოენების ფილმი, რომლებიც კრიმინალური კომედიებით არიან ცნობილები. “ლუინ დევისის შინაგანი მხარე” მუსიკალური დრამაა, რომელიც ნიჭიერი გიტარისტის ცხოვრებაზე მოგვითხრობს. ის 1960-იანი წლების ნიუ-იორკის მუსიკალურ სცენამდე მიღწევას ცდილობს. მისი მცდელობების ფონზე ვხედავთ მდიდარ და განებივრებულ ადამიანებს და სამყაროს, სადაც არ არსებობს მორალი. ფილმი ამერიკელი მუსიკოსის დეივ ვან რონკის მემუარების მიხედვით არის გადაღებული. ფილმის ყურება კარგი საუნდტრეკის, სასიამოვნო თხრობის, კარგი სამსახიობო შესრულების და არაჩვეულებრივი რეჟისურის გამო ღირს. ფილმი ოსკარის ორ კატეგორიაში იყო ნომინირებული.

შეპყრობილი (2014)

დემიენ შეზელის ფილმი, რომელიც კრიტიკოსებს და მაყურებელს ძალიან მოეწონა, მუსიკალური აკადემიის პირველკურსელის ისტორიას მოგვითხრობს, რომელიც დესპოტი დირიჟორის კოლექტივში მოხვდა. ფილმის მსვლელობისას მთავარი გმირი, რომელსაც მაილს ტელერი ასრულებს, ბევრ სირთულეს აწყდება, მაყურებელი კი შეძლებს გაიგოს, თუ რა არის მუსიკა – ეს ხომ არ არის მარტივი, ეს არის საქმე, რომელშიც მთლიანად უნდა იყო ჩართული. ფილმმა სამი ოსკარი მიიღო, მათ შორის დიქტატორი ლექტორის როლის შესრულებისთვის ჯ.კ. სიმონსმა ოსკარი საუკეთესო მსახიობი კაცისთვის მეორეხარისხოვან როლში მიიღო.

პიანისტი (2002)

რომან პოლანსკის ისტორიული დრამა, რომელმაც სამი ოსკარი დაიმსახურა. ფილმი რეალურ მოვლენებს ეყრდნობა და პოლონელი პიანისტის და კომპოზიტორის ვლადისლავ შპილმანის ისტორიას მოგვითხრობს. არაჩვეულებრივი დრამა XX საუკუნის ერთ-ერთ საუკეთესო პოლონელ პიანისტზე, რომელსაც ედრიენ ბროუდი ასრულებს. ფილმის მთავარი გმირი ხელოვნებით იქამდე არის დაკავებული, სანამ პოლონეთში ნაცისტები არ შეიჭრებიან. ბროუდიმ ამ როლისთვის ოსკარი საუკეთესო მსახიობი კაცისთვის მიიღო.

ძმები ბლუზები (1980)

ჯონ ლანდისის კრიმინალური კინომიუზიკლი ძმებზე ჯეიკ და ელვუდ ბლუზებზე მოგვითხრობს. ცხოვრება ძმებისთვის არც ისე კარგად აეწყო – ჯეიკი ციხეში აღმოჩნდა, ობოლთა თავშესაფარი კი, რომელშიც ძმები გაიზარდნენ, მალე დაიხურება. ფილმში მთავარ როლებს ჯონ ბელუშის და დენ აკროიდის გარდა მსოფლიოს ბლუზის, სოულის და ჯაზის ვარსკვლავები ასრულებენ: ჯეიმს ბრაუნი, რეი ჩარლზი, არეტა ფრანკლინი, ჯონ ლი ჰუკერი, პაინტოპ პერკინსი, კებ კელოუეი და სხვ.

კონტროლი (2007)

ბიოგრაფიული ფილმი ინგლისური როკ-ჯგუფის Joy Division-ის ფრონტმენის, იენ კერტისის ტრაგედიის ნამდვილ მიზეზებზე მოგვითხრობს. ეს ანტონ კორბეინის სადებიუტო ნამუშევარია. ფილმმა 2007 წელს კანის კინოფესტივალის სპეციალური ჯილდო დაიმსახურა. დიდი მოწონება დაიმსახურა სემ რაილიმ, რომელმაც იენ კერტისის როლი შეასრულა და ბრიტანული დამოუკიდებელი კინოს პრემიაც დაიმსახურა. ფილმი შეიძლება მდორედ მოგეჩვენოთ, შავ-თეთრი გამა კი ზოგად მელანქოლიურ ატმოსფეროს ინარჩუნებს.

სამყაროს გავლით (2007)

ამ ფილმის ყურებისას არაჩვეულებრივი მუსიკით სავსე, ფერად, ემოციურ სამყაროში აღმოჩნდებით, რომლის შთაბეჭდილებებიც დიდხანს გაგყვებათ. ფილმი მუსიკალურად ჯგუფის The Beatles სიმღერებით არის გაჯერებული, რომლებიც ფილმში მიმდინარე მოვლენების საუკეთესო ილუსტრაციებია. ფილმში როკ-ჯგუფის 34 კომპოზიცია შედის და მსახიობები მათ ახალ ვერსიებს გვთავაზობენ. ფილმში მთავარ როლებს ჯიმ სტარჯესი და ევან რეიჩელ ვუდი ასრულებენ, პატარა როლებისთვის კი ისეთი ვარსკვლავები იყვნენ მიწვეულები, როგორებიც არიან ბონო, ჯო კოკერი, სელმა ჰაიეკი და სხვები. ფილმი ოსკარზე საუკეთესო კოსტიუმების დიზაინისთვის იყო ნომინირებული.

მე იქ არ ვარ (2007)

ტოდ ჰეინსის არაჩვეულებრივი ნამუშევარი, რომელიც ექვს სხვადასხვა პერსონაჟზე მოგვითხრობს. ფილმი ლეგენდარული ბობ დილანის ცხოვრებას ეყრდნობა. ფილმი ბიოგრაფიული კინოს საკმაოდ უჩვეულო ფორმით არის წარმოდგენილი და დილანის ცხოვრებაზე მოგვითხრობს. ფილმში წარმოდგენილია დილანის ცხოვრების სხვადასხვა ეტაპი სხავდასხვა პერსონაჟით, რომლებსაც ასრულებენ ქეით ბლანშეტი, რიჩარდ გირი, ჰიტ ლეჯერი, ბენ უიშოუ, კრისტიან ბეილი და მარკუს კარლ ფრანკლინი. ფილმმა 2007 წელს ვენეციის კინოფესტივალზე ჟიურის სპეციალური ჯილდო დაიმსახურა, ბლანშეტი კი ოსკარზე საუკეთესო მსახიობი ქალისთვის მეორეხარისხოვან როლში იყო ნომინირებული.

ამადეუსი (1984)

ანტონიო სალიერის ტრაგიკული ისტორია, ნიჭიერი, მაგრამ არა გენიალური კომპოზიტორის, რომელიც თავდაპირველად წარმოგვიდგება, როგორც კეთილი და რელიგიური ადამიანი, მაგრამ შემდეგ სრულიად იცვლება. მილოშ ფორმანის ფილმი პიტერ შეფერის სცენარის მიხედვითაა გადაღებული, რომელიც 1979 წელს ამავე სახელწოდების პიესას ეყრდნობა. ვოლფგანგ ამადეუს მოცარტის და ანტონიო სალიერის ბიოგრაფიული ინტერპრეტაცია, რომელმაც 8 ოსკარი, 32 სხვა ჯილდო და 13 ნომინაცია მოიპოვა.

ჯაზში მხოლოდ ქალიშვილები არიან (1959)

ჯო და ჯერი მკვლელობის მოწმეები გახდნენ და ფლორიდაში გაქცევას ჩქარობენ, ისინი ქალის ფორმებს ირგებენ და ჟოზეფინა და დაფნი ხდებიან. გმირები ჯაზის ორკესტრს უერთდებიან და ყველაფერი კარგად მიდის, სანამ ჟოზეფინა ორკესტრის სოლისტს არ შეუყვარდება, დაფნათი კი ხანშისესული მილიონერი მამაკაცი არ დაინტერესდება. ფილმმა ჰოლივუდში ნამდვილი ფურორი მოახდინა თავისი შეხედულებებით ზნეობის ნორმებისადმი და უდიდესი გავლენა მოახდინა ზოგადად კინემატოგრაფიაზე. ფილმის ერთ-ერთი განსაკუთრებული ელემენტი მისი საუნდტრეკია, რომელიც არ არის უბრალოდ გასაფორმებლად, არამედ ის ფილმის სიუჟეტის უშუალო მონაწილეა. ფილმში მთავარ როლებს მერლინ მონრო, ტონი კერტისი და ჯეკ ლემონი ასრულებენ. ფილმი ოსკარის 6 კატეგორიაში იყო ნომინირებული, რომლიდანაც ოსკარი საუკეთესო კოსტიუმების დიზაინისთვის მიიღო.