10 ფილმი მხატვრების ცხოვრებაზე

nugo July 10, 2021

მხატვრები – ესენი არიან ადამიანები, რომლებიც სამყაროს თავიანთ ფერებში ხედავენ, და მხატვრები არიან ადამიანები, რომლებიც ხშირად ჩვენს ყველაზე მნიშვნელოვან სათქმელს ტილოზე შესრულებული ნახატით ამბობენ.

მხატვრების შესრულებული ნამუშევარი წლებს, საუკუნეებს უძლებს და შეიძლება ისიც ითქვას თამამად, რომ ისინი ნებისმიერ ეპოქას, თავისებურად ეხმიანებიან.

დიდი მხატვრების ცხოვრება, ხშირად, ისეთივე გამორჩეული, როგორიც მათი ცნობილი ტილოებია, ყოველთვის იწვევდა კინემატოგრაფების ინტერესს. თქვენ აღმოჩნდებით არაორდინალური პიროვნებების და მათი ვნებების სამყაროში, ტილოების და საღებავების, გარემომცველი სამყაროს და ადამიანის სხეულის სილამაზით სავსე სამყაროში, სწორედ ამიტომ, დღევანდელ კოლექციაში მათ ცხოვრებაზე გადაღებულ ფილმებს გთავაზობთ:

რენუარი (2012)

ჟილ ბურდოს ფილმი პიერ ოგიუსტ რენუარის უკანასკნელ წლებზე მოგვითხრობს კან-სიურ-მერიში პირველი მსოფლიო ომის პერიოდში. ფილმი 2014 წელს ფრანგულ კინოპრემიაზე “სეზარი” ოთხ კატეგორიაში იყო ნომინირებული, ჯილდო კი საუკეთესო კოსტიუმების დიზაინისთვის მიიღო. ფილმის ყურებისას ტაივანელი კინოოპერატორის ულამაზესი კადრებით დატკბებით, რომლებიც გაჯერებულია უმშვენიერესი პეიზაჟებით – ხეები, ბალახი, ნაკადულები. რეჟისორმა ოსტატურად მოახერხა სიუჟეტში ზედმეტი მელოდრამისთვის გვერდის ავლა. რენუარის როლს ფრანგი მსახიობი მიშელ ბუკე ასრულებს.

აგონია და ექსტაზი (1965)

ჩარლტონ ჰესტონი განასახიერებს მიქელანჯელოს იმ პერიოდში, როდესაც ის სიქსტეს კაპელას ხატავდა. ფილმი ირვინგ სთოუნის რომანის მიხედვითაა გადაღებული და გადმოგვცემს პრობლემებს, რომლებსაც რენესანსის ეპოქის მხატვარი იმ პერიოდში ხვდებოდა. პოლიტიკურ-რელიგიური ცვლილებების ფონზე “აგონია და ექსტაზი” ყურადღებას უშუალოდ მოქანდაკე-მხატვარი მიქელანჯელოს და მისი მფარველის პაპ იულიუს მეორის პირად კონფლიქტზე ამახვილებს. ფილმი ნომინირებული იყო ოსკარის ხუთ და ოქროს გლობუსის ორ კატეგორიაში.

ფრიდა (2002)

ხელოვნება, პოლიტიკა და რომანტიკა დაახლოებით ერთნაირად არის გადმოცემული ფრიდა კალოს ბიოგრაფიულ ფილმში. მის ცხოვრებაზე და იმ ყველაფერზე დაყრდნობით, რაც მან საშინელი ავარიის დროს განიცადა 18 წლის ასაკში, რომელმაც ძალიან დიდი გავლენა იქონია მხატვრის ცხოვრებაზე, თამამად შეგვიძლია ვთქვათ, რომ ფრიდა კალო ამ ცხოვრებისთვის ზედმეტად დიდი ადამიანი იყო. ფილმი მოგვითხრობს არა მხოლოდ მის პირად ცხოვრებაზე, არამედ პროფესიულ თავგადასავალზეც. სელმა ჰაიეკი არაჩვეულებრივად განასახიერებს ფრიდას, ალფრედ მოლინამ კი მისი მეუღლის – დიეგო რივერას როლი მოირგო. ჯული ტეიმორის ფილმმა ოსკარის 6 ნომინაციიდან ორში გაიმარჯვა: საუკეთესო ორიგინალური მუსიკისთვის და საუკეთესო გრიმისთვის.

ფერფლის ნარჩენები (2009)

“ფერბლის ნარჩენები” მოგვითხრობს ახალგაზრდა სალვადორ დალის ცხოვრებაზე, თუმცა მას არ აქვს პრეტენზია იყოს ზუსტი ბიოგრაფიული ფილმი. ის უფრო მეტად თეორიული, იმპრესიონისტული პორტრეტია ზედმეტი დრამატიზმის ან ფსიქოლოგიური სიღრმეების გარეშე. მაგრამ მას გააჩნია ელეგანტური დიზაინი,  რომელიც, თითქმის, მთელი ფილმის მანძილზე აოცებს მაყურებელს. მიუხედავად იმისა, რომ ფილმმა საკმაოდ დიდი კრიტიკა დაიმსახურა კინოკრიტიკოსებისგან, ის საკმაოდ დიდი პოპულარობთ სარგებლობდა ახალგაზრდებში, მაგრამ, სავარაუდოდ, ამის მიზეზი დალის როლის შემსრულებელი რობერტ პატინსონია, რომელიც ახალგაზრდა გოგონებში დიდი პოპულარობით სარგებლობდა ფილმის გამოშვების პერიოდში.

ედვარდ მუნკი (1974)

პიტერ უოტკინსის დოკუმენტური დრამა მოგვითხრობს უდიდესი ნორვეგიელი ფერმწერის ედვარდ მუნკის ისტორიას. ის ათი წლის პერიოდს მოიცავს, ემატება კონკრეტული მოგონებები და გადმოგვცემს ისეთ დეტალებს, როგორიცაა, მაგალითად, მისი დედის გარდაცვალება, როდესაც ის ხუთი წლის იყო. თავისი ექსპრესიონისტული ნამუშევრებით, მათ შორის “კივილით”, ცნობილ მხატვარს ძალიან საინტერესო ცხოვრება ჰქონდა, რომლის ნაწილის ნახვაც ფილმში შეგიძლიათ.

კარავაჯო (1986)

დერეკ ჯარმენის მხატვრული ფილმი, რომელიც იტალიელი მხატვრის კარავაჯოს ცხოვრების მიხედვითაა გადაღებული. როგორც სხვა ბიოგრაფიულ ფილმებში, ჯარმენი მთავარ გმირს იყენებს, როგორც ადამიანური სექსუალობის ფართე პანორამას. ჩვენ ხვედავთ როგორ ექცევა ახალგაზრდა კარავაჯო ხანშიშესულ მამაკაცს, შემდეგ კი როგორ ვითარდება შედარებთ გაზრდილი კარავაჯოს სასიყვარულო სამკუთხედი, მაგრამ ყველაფერი უმნიშვნელო ხდება, როდესაც ის ხატვას იწყებს… ჯარმენმა ყველა სცენა შენობაში გადაიღო, რამაც მას საშუალება მისცა მხატვრის მოდელებისთვის მოღუშული, მაგრამ ამავე დროს ხასხასა ვიზუალი შეექმნა და ორიგინალი ნახატებისთვის მიემსგავსებინა.

ცხოვრება პიკასოსთან (1996)

ჯეიმს აივორის კინოფირი, რომელიც არიანა ჰაფინგტონის წიგნის “პიკასო: შემქმნელი და დამანგრეველი” მიხედვითაა გადაღებული და მოგვითხრობს, ძირითადად, მხატვრის ურთიერთობებზე მრავალრიცხოვან ქალბატონებთან და საყვარლებთან. ფილმი ახალგაზრდა ქალის ისტორიით იწყება სახელად ფრანსუა ჟილო, რომელიც პიკასოს საყვარელი ხდება, მოგვიანებით კი მათ ორი შვილი ეყოლებათ, თუმცა მხატვარი ვერ ეშვება თავის ჩვევებს სხვა ქალებთან დაკავშირებით. პიკასოს როლი ენტონი ჰოპკინსმა მოირგო, რომელიც, როგორც ყოველთვის, დავალებას თავს შეუდარებლად ართმევს.

მოდილიანი (2004)

ერთ-ერთი უდიდესი დრამა, რომელიც იტალიელი მხატვრის და მოქანდაკის – მოდილიანის ცხოვრებაზეა გადაღებული. ფილმის რეჟისორი მიკ დეივისია, რომელიც ყურადღებას მხატვრის ცხოვრების უკანასკნელ წელზე ამახვილებს პარიზში. მოდილიანის, მხატვრის, რომელიც თავისი დროის ყველაზე დაუფასებელ მხატვრად ითვლება, როლი ენდი გარსიამ შეასრულა. კრიტიკოსების აზრი რეჟისორის ამ გადაწყვეტილებასთან დაკავშირებით ორად გაიყო და ნაწილის აზრით, გარსიას ამ როლზე დაკავება შეცდომა იყო, თუმცა კრიტიკოსების მეორე ნაწილი და მაყურებლის უმეტესობა მას იდეალურად ასახელებდა.

კლიმტი (2007)

რაულ რუისის ბიოგრაფიული დრამა XX საუკუნის გამოჩენილი სიმბოლისტი მხატვრის, გუსტავ კლიმტის ცხოვრებაზე და მის შემოქმედებაზე მოგვითხრობს. ფილმი გუსტავ კლიმტის და ლია დე კასტროს ვნებიანი სიყვარულის ისტორიას მოგვითხრობს. კლიმტის როლი ჯონ მალკოვიჩმა შეასრულა. მსახიობის ცივი გამოხედვა, მოდუნებული მეტყველება და ქედმაღლური დამოკიდებულება არაჩვეულებრივად გამოხატავს მის სამსახიობო ოსტატობას და მხატვრის მბრძანებლურ ხასიათს, რომლის ალტერ-ეგოსაც არ აქვს არავთარი გრძნობა სხვებისადმი, რომლებიც უსუსურ ობიექტებად არიან გამოყვანილები.

სიცოცხლის ვნება (1956)

ვინსენტ ვან გოგის ცხოვრებაზე არაერთი ფილმია გადაღებული, მაგალითად 1990 წლის ვინსენტი და თეო, რომელშიც ვან გოგის როლს ტიმ როთი ასრულებს, 2017 წელს კი გამოვიდა კიდევ ერთი, ამჯერად ანიამციური ფილმი სიყვარულით ვინსენტი. თუმცა ამჯერად ვინსენტ მინელის ფილმზე ვისაუბრებთ, რომელშიც ბრწყინვალე მხატვრის ვინსენტ ვან გოგის როლს კირკ დუგლასი ასრულებს. ფილმი ირვინგ სტოუნის ამავე სახელწოდების რომანს ეფუძნება და მოგვითხრობს ვან გოგის ცხოვრებაზე, გვიჩვენებს, თუ როგორ გახდა ის მხატვარი, მის ცხოვრებას კარიერის მწვერვალის პერიოდში, და საბოლოოდ, მის გარდაცვალებას. ხელოვნება ანადგურებდა ჰოლანდიელ მხატვარს და ეს ფილმი ამ ფაქტს ლამაზად გვაწვდის. ფილმი გადაღებულია საფრანგეთში, ბელგიაში და ნიდერლანდებში. “სიცოცხლის ვნება” არ აღმოჩნდა წარმატებული კინოგაქირავებაში, მაგრამ დაიმსახურა ოთხი ნომინაცია ოსკარზე, რომლიდანაც ენტონი ქვინმა ერთ-ერთ კატეგორიაში – ოსკარი საუკეთესო მსახიობი კაცისთვის მეორეხარისხოვან როლში დაიმსახურა.