10 ფილმი ნოემბრის ცივი ამინდების გადასაგორებლად

nugo July 11, 2021

კი, ზოგს უყვარს ეს სეზონი და ძალიანაც მოსწონს ასეთ ამინდებში გარეთ სეირნობა. თუმცა, ხანდახან ხომ გვიჩნდება სურვილი, სუსხიან ამინდებს თავი ავარიდოთ, ცხელი ჩაი მოვამზადოთ, პლედში გავეხვიოთ და კარგ ფილმს ჩავუსხდეთ?

ხოდა, ასეთები რომ ბევრნი ხართ, ამიტომ დღევანდელ კოლექციაში თავი მოვუყარეთ ძალიან მსუბუქ, მარტივ ფილმებს, რომლებიც გაგაღიმებთ, დაგაფიქრებთ და უბრალოდ განტვირთვის საშუალებას მოგცემთ.

მოკლედ, გემრიელად მოკალათდით და აბა თქვენ იცით, სასიამოვნო სეანსს გისურვებთ:

შემთხვევით სექსუალური (2018)

სცენარი ცოტა ბანალური შეიძლება მოგეჩვენოთ, სადაც შეუხედავი გოგონა თვალისმომჭრელ ლამაზმანად იქცევა. მაგრამ სხვა შემთხვევებისგან განსხვავებით, ამ ფილმის მთავარი გმირი, რომელსაც ემი შუმერი ასრულებს, გარეგნულად არ იცვლება, მისი ჩვეული ცხოვრება კი 180 გრადუსით იცვლება. მიუხედავად მთელი თავისი ბანალურობისა, ფილმი საკმაოდ მნიშვნელოვან მესიჯს ატარებს – როგორც კი შეიყვარებთ და დააფასებთ საკუთარ თავს, სამყაროც შესაბამისად შეიცვლება.

ქალბატონი (2017)

ეს ფილმი არ შეიძლება მივაკუთვნოთ ახალგაზრდულ მელოდრამებს, მაგრამ ის მაინც ძალიან კეთილი, ცოტა სახალისო და თან ფილოსოფიურია. თქვენ გელოდებათ ისტორია მოსამსახურეზე, რომელიც დიასახლისის ცრურწმენის გამო დახვეწილ მდიდარ ქალბატონად უნდა იქცეს და სუფრას შეუერთდეს სტუმრებთან ერთად. ყველაფერი კი მაშინ უფრო იხლართება, როდესაც ის პოპულარულ კოლექციონერს უყვარდება…

ეგზოტიკური სასტუმრო “მერიგოლდი” (2012)

მიუხედავად იმისა, რომ მსახიობების საშუალო ასაკი ამ ფილმში 68 წელია, მას ვერ დავარქმევთ ფილმს მოხუცებისთვის. რა ხდება, როდესაც სამოგზაუროდ წასულს სულ სხვა რეალობა გხვდება? ეს ფილმი დაგეხმარებათ გაიაზროთ, რომ ყველაზე ცუდ სიტუაციაშიც კი ცხოვრება შეიძლება იყოს მშვენიერი და ძალიან საინტერესო. ასევე უნდა აღინიშნოს, რომ ოქროს გლობუსის ორ კატეგორიაში ნომინირებული ფილმის სიუჟეტი საკმაოდ ორიგინალურია, მსახიობების შესრულება კი – არაჩვეულებრივი.

ნიჭიერი (2017)

გიფიქრიათ, რა იქნებოდა მათემატიკის შესწავლისადმი თანდაყოლილი ნიჭი რომ გქონოდათ? პატარა ასაკშივე რომ შეგძლებოდათ დიდი ციფრების დაანგარიშება და მათი ფესვიდან ამოყვანა? სწორედ ასეთი ნიჭითაა დაჯილდოებული პატარა გოგონა, რომელსაც წარმოდგენა არ აქვს, თუ როგორ შეიძლება იმეგობროს თანატოლებთან. რა თქმა უნდა, ასეთი ნიჭიერი ადამიანებისთვის უბრალო ცხოვრება შეუძლებელია.

ნადირობა ველურებზე (2016)

ეს სათავგადასავლო კომედია ახალგაზრდა რიკი ბეიკერის შესახებ მოგვითხრობს, რომელიც, როგორც მის ასაკს ახასიათებს, არც ისე დამთმობი ხასიათით გამოირჩევა. სოციალური სამსახური მას ახალი ზელანდიის ტყეში განცალკევებით მცხოვრებ ოჯახში ამისამართებს. ცოლი მალევე დაალაგებს ურთიერთობას ბიჭთან, აი მისი მეუღლე კი აშკარად არაა მოხარული ასეთი ხასიათის მქონე ახალი ოჯახის წევრით.

კლასის წინ (2008)

ეს ფილმი, რომელიც რეალურ მოვლენებზეა დაფუძნებული, ნამდვილად დატოვებს კვალს თქვენს გონებაში. ფილმი მოგვითხრობს ბიჭის შესახებ, რომელიც ბავშვობიდან ტურეტის სინდრომით ( ქრონიკული დაავადება, რომელიც ხასიათდება მოტორული და ვოკალური ტიკებით) იტანჯება, მაგრამ ყოველთვის სურდა ყოფილიყო მასწავლებელი. ეს ფილმი უდაოდ მიეკუთვნება სამოტივაციო კინოფირებს, რომელიც შეგიძლიათ ურჩიოთ ყველას, ვინც მოასწრო ცხოვრებაზე გულის აცრუება, დაღლა, მაგრამ ამავე დროს არ ავიწყდება იოცნებოს.

კოცნის ჯიხური (2018)

კარგი მელოდრამა, რომელიც, პირველ რიგში, ალბათ, მაინც მეგობრობაზეა და შემდეგ უკვე ყველაფერ დანარჩენზე. ლი და ელი ერთ სამშობიაროში დაიბადნენ და ადრეული ასაკიდანვე განუყრელი მეგობრები არიან. მაგრამ, როდესაც ელს ლის უფროსი ძმა უყვარდება, რომელსაც კოცნის ჯიხურში შეხვდა, ვერ ასწრებს იმის გააზრებას, თუ რა შეიძლება მოუტანოს ამ რომანმა მის ურთიერთობას ლისთან.

ძაღლური ცხოვრება (2017)

ძალიან უჩვეულო და გულისამაჩუყებელი ფილმი იმის შესახებ, თუ როგორ გარდაისახება ძაღლის სული სხვადასხვა ჯიშის ოთხფეხა მეგობარში, დედამიწის სხვადასხვა კუთხეში, მაგრამ ამასთან ძაღლი ყოველთვის პოულობს თავის მოწოდებას ადამიანების დახმარებაში. თუ ცხოველები, განსაკუთრებით კი ძაღლები გიყვართ, ეს ფილმი თქვენთვის ნამდვილი აღმოჩენა იქნება.

ტოსკანის მზის ქვეშ (2003)

ოდრი უელლსის ფილმი მწერალ ფრენსის მეისზე მოგვითხრობს, რომელსაც დიანა ლეინი ასრულებს. ფილმის მთავარი გმირი მეუღლესთან განქორწინების შემდეგ ყველაფერს ანებებს თავს და მზიან იტალიაში მიემგზავრება. ეს ფილმი პროვინციული ქალაქის სილამაზეზე, ზღვაზე, მზეზე და, რა თქმა უნდა, სიყვარულზეა. დიანა ლეინი ოქროს გლობუსზე საუკეთესო მსახიობი ქალისთვის მიუზიკლსა ან კომედიაში იყო ნომინირებული.

ტკბილი ნოემბერი (2001)

მართალია, მსუბუქ ფილმებს შეგპირდით, მაგრამ ნოემბრის კოლექცია “ტკბილი ნოემბრის” გარეშე, უბრალოდ წარმოუდგენელია. თუ მხოლოდ კომედიების ყურება არ გსურთ და ძლიერი ემოციების არ გეშინიათ, მაშინ ეს მელოდრამა, რომელშიც მთავარ როლებს კიანუ რივზი და შარლიზ თერონი ასრულებენ, თქვენთვისაა. ალბათ, სწორედ ამ მსახიობების დამსახურებაა, რომ ფილმი ასე უყვარს მაყურებელს, მიუხედავად იმისა, რომ კინოკრიტიკოსები ამ ფილმს არაფრად აგდებენ.