10 ფილმი რეალურ ადამიანებსა და ისტორიებზე

nugo July 10, 2021

დღევანდელ კოლექციაში გადავწყვიტეთ მოგვეყოლა ნამდვილი ისტორიები ნამდვილ ადამიანებზე. იმ ფილმებზე გვესაუბრა, სადაც თითქმის არაფრის გამოგონება გახდა საჭირო.

ჩვენ რომ თავი აღარ შეგაწყინოთ, უბრალოდ შემოგთავაზებთ კოლექციას რეალურ, გულისამაჩუყებელ ისტორიებზე და ადამიანებზე, რომლებიც გარკვეულ ცხოვრებისეულ მაგალითს ამ ფილმების მეშვეობით, აუცილებლად მოგვცემენ.

სამყაროს მთელი სიმდიდრე (2017)

რიდლი სკოტის ფილმი რომში მომხდარ ამბავზე მოგვითხრობს, სადაც 1973 წელს ახალგაზრდა ბიჭი მოიტაცეს, რომელიც მსოფლიოში უმდიდრესი ადამიანის, ნავთობის მაგნატის პოლ გეტის შვილიშვილი აღმოჩნდა. გამტაცებლები 17 მილიონ დოლარს ითხოვდნენ, მაგრამ ბაბუას ერთი საინტერესო შტრიხი გააჩნდა – ის წარმოუდგენლად ძუნწი იყო. ამიტომ გატაცებულის დედას მოუწია ამ ყველაფრისთვის თვითონ მიეხედა. საინტერესო ფაქტია ის, რომ ფილმის პრემიერამდე ერთი თვით ადრე ამოჭრეს კევინ სპეისის ყველა სცენა და შემდეგ უკვე სხვა მსახიობით – კრისტოფერ პლამერით ჩაანაცვლეს, რომელიც ოსკარზე საუკეთესო მსახიობი კაცისთვის მეორეხარისხოვან როლში იყო ნომინირებული.

მარშალი (2017)

1941 წელს ტერგუდ მარშალი ერთადერთი ფერადკანიანი ადვოკატი იყო, რომელიც ამერიკის უმაღლეს სასამართლოში მუშაობდა. კარიერის დასაწყისში მას რთული საქმე შეხვდა: მდიდარი თეთრკანიანი ამერიკელი ქალი თავის შავკანიან მძღოლს გაუპატიურებაში და მკვლელობის მცდელობაში ადანაშაულებს. რეჯინალდ ჰადლინის ფილმი ოსკარზე საუკეთესო ორიგინალური სიმღერისთვის იყო ნომინირებული.

ვიქტორია და აბდული (2017)

1887 წელს ინდოელი მუჰამედ აბდულ კარიმი ინგლისში რამდენიმე დღით ჩავიდა, მაგრამ ისე მოეწონა დედოფალ ვიქტორიას, რომ რამდენიმე წელი დარჩა. ის ძალიან გავლენიანი ადამიანი გახდა, თუმცა დედოფლის გარდა, ის არავის მოსწონდა. აბდულის და დედოფლის ურთიერთობაზე არა მხოლოდ ინგლისში, არამედ მთელს მსოფლიოში საუბრობდნენ. დედოფლის როლს ჯუდი დენჩი ასრულებს. ფილმი ოსკარზე საუკეთესო კოსტიუმების დიზაინისთვის და საუკეთესო გრიმისთვის იყო ნომინირებული.

ხელშეუხებელნი (2011)

ეს არის ისტორია ერთ უსაქმურ, თავზეხელაღებულ და ქურდ აბდელ სელუზე და მდიდარ, არისტოკრატ ფილიპ პოცო ბორგოზე, რომლებიც ერთმანეთს მაშინ შეხვდნენ, როდესაც ფილიპი უბედური შემთხვევის შედეგად პარალიზებული დარჩა და მომვლელი დასჭირდა. აბდელ სელუ და ფილიპი ერთმანეთისგან რადიკალურად განსხვავებული ადამიანები არიან, თუმცა სწორედ ეს ხდის მათ მეგობრობას კიდევ უფრო მრავალფეროვანს, საინტერესოს და თავგადასავლებით სავსეს. ეს არის ისტორია მეგობრებზე, რომლებიც ერთმანეთს ავსებენ, ასწავლიან და ერთმანეთის გამოცდილებით თავადაც სწავლობენ. ფილმი ოქროს გლობუსზე საუკეთესო უცხოენოვანი ფილმისთვის იყო ნომინირებული.

სალი (2016)

კლინტ ისტვუდის ფილმი 2009 წლის 15 იანვარს მომხდარ ამბავზე მოგვითხრობს, როდესაც თვითმფრინავს, რომელსაც ჩესლი სალენბერგერი მართავდა, ორივე ძრავამ უმტყუნა. კაპიტანმა გადაწყვიტა დაშვება მდინარე ჰუძონზე განეხორციელებინა. მან ეს იმდენად იდეალურად შესძლო, რომ არცერთი მგზავრი დაზიანებულა. მიუხედავად ამისა, მის კარიერას საფრთხე ემუქრება და მას უწევს დაამტკიცოს, რომ ეს გადარჩენის ერთადერთი გამოსავალი იყო. ფილმი ოსკარზე საუკეთესო ხმის მონტაჟისთვის იყო ნომინირებული.

ფრიდა (2002)

მექსიკელმა მხატვარმა ფრიდა კალომ ფუნჯი და საღებავები პირველად 1925 წელს, თვრამეტი წლის ასაკში დაიჭირა ხელში. სერიოზული ავარიის შემდეგ, ერთი წლის განმავლობაში ის საწოლზე იყო მიჯაჭვული და არაფერი რჩებოდა იმის გარდა, რომ ეხატა. ფილმი კვალდაკვალ მიჰყვება მამაცი და ქარიზმატული ქალის ისტორიას დასაწყისიდან სიკვდილამდე. ფრიდას როლს სელმა ჰაიეკი ასრულებს. ფილმი ოსკარზე საუკეთესო ორიგინალური მუსიკისთვის და საუკეთესო გრიმისთვის იყო ნომინირებული.

მე, ტონია (2017)

სკანდალებით ცნობილი მოციგურავე ტონია ჰარდინგის ისტორია, რომელმაც 1994 წლის ოლიმპიური თამაშების დაწყების წინ მოახერხა, საკუთარი სპორტული კარიერა დაენგრია. საქმე იმაშია, რომ შესარჩევ პერიოდში მისმა ყოფილმა ქმარმა ჯეფ გილოულიმ და პირადმა მცველმა შოუნ ეკარდტმა დაიქირავეს ადამიანი, რომელმაც ჰარდინგის მთავარ კონკურენტს, ნენსი კერიგანს ფეხი მოტეხა. ტონიას როლს მარგო რობი ასრულებდა, რომელიც ოსკარზე საუკეთესო მსახიობი ქალისთვის იყო ნომინირებული, ხოლო მისი დედის, ლავონას როლის შემსრულებელმა ელისონ ჯენიმ ოსკარი საუკეთესო მსახიობი ქალისთვის მეორეხარისხოვან როლში მიიღო.

ბრონსონი (2009)

ნიკოლას ვინდინგ რეფნის ფილმი პატიმარ ჩარლზ ბრონსონის ცხოვრების ისტორიას მოგვითხრობს. მან ცხოვრების ძირითადი ნაწილი ციხეში, ფეთქებადი და ექსცენტრიული ხასიათის დამსახურებით კი, უმეტესად კარცერში გაატარა. ის ახლაც ციხეშია. ფილმში ბრონსონის როლს ტომ ჰარდი ასრულებს.

დალასის შემსყიდველთა კლუბი (2013)

1985 წელს ტეხასელ ელექტრიკოს რონ ვუდრუფს შიდსი დაუდგინეს. ექიმებმა მას არაუმეტეს ერთი თვის სიცოცხლე მისცეს, მაგრამ მან ჯიუტად დაიწყო წამლის ძებნა, რომელიც მას უფრო მეტ დროს აცოცხლებდა. მან სიკვდილს 7 წელი მოუგო. ჟან-მარკ ვალის ფილმში ვუდრუფის როლს მეთიუ მაკკონაჰი ასრულებს. ფილმა ოსკარზე სამ კატეგორიაში გაიმარჯვა, მათ შორის მაკკონაჰმა ოქროს ქანდაკება საუკეთესო მსახიობი კაცისთვის მიიღო.

127 საათი (2010)

2003 წლის მაისში 27 წლის არონი ძალიან რთულ მდგომარეობაში აღმოჩნდა. ის იუტას შტატის კანიონში მიემგზავრება მარტო და არასწორად გადახტომის დროს მახეში გაება, ხელი მოჰყვა ქვებს შორის და დასახმარებალდაც ვერავის ეძახის. ფილმის დროს თქვენც იგივე შეგრძნებები დაგეუფლებათ, რასაც მარტოხელა, გაჭირვებული და სტრესში მყოფი ადამიანი, უკაცრიელ ადგილას განიცდის. დენი ბოილის ფილმში არონ რელსტონის როლს ჯეიმს ფრანკო ასრულებს, რომელიც ოსკარზე საუკეთესო მსახიობი კაცისთვის იყო ნომინირებული. ფილმი ოსკარზე კიდევ ხუთ კატეგორიაში იყო წარდგენილი.