10 ფილმი, რომელთა ნახვის შემდეგ ფსიქოთერაპევტი დაგჭირდებათ

nugo July 11, 2021

არსებობს ბევრი საშინელებათა თუ მისტიკური ფილმი, რომლის ყურებისასაც ხშირად შიშისგან შევხტებით ხოლმე, მაგრამ დასრულებისთანავე გვავიწყდება, და არსებობს ფილმები, რომლებიც ჩვენს ფსიქიკაზე დიდ ზეგავლენას ახდენენ და შესაძლოა, სამუდამოდაც დაგვამახსოვრდეს. გთავაზობთ 10 ფილმს, რომელთა ნახვის მერეც ფსიქოთერაპევტთან ვიზიტი არ გაწყენდათ:

გასართობი თამაშები (2007)

გასართობი თამაშები

ოჯახი შვებულების გასატარებლად საზაფხულო სახლში მიემგზავრება. მოულოდნელად მათი სახლის კარზე ორი ახალგაზრდა – ერთი შეხედვით, ზრდილობიანი და სიმპათიური ბიჭი აკაკუნებს და ამბავიც აქედან იწყება… მიხაელ ჰანეკეს გასართობი თამაშები სადისტური და საზარელი ისტორიაა, სადაც არანაირი დანდობა არ არსებობს, არსებობს მხოლოდ სისასტიკე.

ანტიქრისტე (2009)

ანტიქრისტე

ალბათ, გამართლებული იქნებოდა ლარს ფონ ტრიერის ნებისმიერი ფილმის ამ ათეულში მოხვედრა. თუმცა, ამჯერად ანტიქრისტეზე შევჩერდებით… შვილის სიკვდილის ტრავმისგან გასათავისუფლებლად, წყვილი საცხოვრებლად ტყეში გადადის. თუმცა, სულიერი სიმშვიდის მოპოვების ნაცვლად, ყველაფერი ცუდიდან უარესობისკენ იცვლება. ეს არის ტრიერისთვის დამახასიათებელი უჩვეულო და მანიაკალური ისტორია, რომელმაც გამორიცხულია, მაყურებელი არ შეძრას.

ეშვი (2009)

ეშვი

იორგოს ლანთიმოსი თანამედროვეობის ერთ-ერთი ყველაზე გამორჩეული რეჟისორია, ინდივიდუალური სტილითა და სამყაროთი. ფილმი მოგვითხრობს ოჯახზე, რომელიც ქალაქის განაპირას ცხოვრობს და ერთი უჩვეულობა სჭირს: ოჯახის უფროსის გარდა სახლს არავინ ტოვებს. ბავშვები გარესამყაროსგან სრულიად მოწყვეტილები არიან, მაგრამ კარგად იციან ოჯახის მთავარი კანონი: სახლის დატოვება არ შეიძლება მანამ, სანამ ეშვს არ მოიცვლი…

ეშმაკის განდევნა ემილი როუზისგან (2005)

როუზი

1976 წელი. მღვდელს, რომელიც ეშმაკით შეპყრობილ გოგონას ეგზორციზმის სეანსებს უტარებდა, მის მკვლელობაში სდებენ ბრალს. ფილმი ნამდვილ ამბავს ეფუძნება, რომელიც გერმანიაში, 70-იან წლებში მოხდა. რეალური პიროვნების – ანელიზ მიშელის შემთხვევა ეგზორციზმის ერთ-ერთი ყველაზე გახმაურებული შემთხვევაა ისტორიაში, ხოლო ეშმაკის განდევნა ემილი როუზისგან – ეგზორციზმის თემაზე შექმნილი ერთ-ერთი საუკეთესო ფილმი.

ჩიტები (1963)

ჩიტები

ახალგაზრდა ქალბატონი ზოომაღაზიაში ფლირტს გააბამს მამაკაცთან. ის უკან გაჰყვება კაცს, რათა პატარა თუთიყუში აჩუქოს და როდესაც ქალაქში ჩავა, სრულიად უჩვეულო მოვლენა ხდება: მოულოდნელად ჩიტები ადამიანებზე იწყებენ თავდასხმას… ფილმის პიარისთვის, ალფრედ ჰიჩკოკმა პატარა ვიდეო ჩაწერა, სადაც ჩიტებზე საუბრობდა: რა თქმა უნდა, ზოგი მოკვდა, ზოგი დახოცეს – ასეთია ბუნების კანონი… მე ფრინველების მიმართ გრძნობები გამაჩნია… ვიდეოში საუბრისას ჰიჩკოკი ინდაურის ხორცს ჭამდა.

სალო ანუ სოდომის 120 დღე (1975)

სალო

ამ ფილმის ნახვის შემდეგ ფსიქოთერაპევტი კი არა, შესაძლოა, ფსიქიატრი დაგჭირდეთ. სალოში მოქმედება მეორე მსოფლიო ომის დროს, იტალიაში ვითარდება. 4 ფაშისტი 9 თინეიჯერს ატყვევებს და 120-დღიან სოდომს უწყობს. მათი ფიზიკური, მენტალური და სექსუალური წამება პიერ პაოლო პაზოლინისთვის დამახასიათებელი შემაძრწუნებელი რეალისტურობითაა ასახული.

მოდი და ნახე (1985)

მოდი და ნახე

მას შემდეგ, რაც ძველ თოფს იპოვის, ბიჭი საბჭოთა არმიას უერთდება და მეორე მსოფლიო ომის ყველა საშინელებას საკუთარ თავზე გამოცდის. რუსი რეჟისორის, ელემ კლიმოვის მოდი და ნახე ომის თემაზე შექმნილი ერთ-ერთი ყველაზე შემზარავი ფილმია. რეჟისორის თქმით: ის, ვინც თავის საშინელ წარსულს ივიწყებს, მისი გამეორებისთვისაა განწირული.  

წამებულები (2009)

წამებულები

70-იანი წლები. საფრანგეთი. პატარა ლუსი ერთ წელს დაკარგულად ითვლებოდა, მოულოდნელად კი მას სოფლის გზაზე პოულობენ. გოგონა შოკშია და მომხდარზე ლაპარაკს ვერ ახერხებს. სულ მალე პოლიცია იმ ადგილს პოულობს, სადაც ის იყო დამწყვდეული და გოგონას იდუმალი ისტორია კიდევ უფრო იდუმალებით მოცული ხდება…

ცერემონია (1995)

ცერემონია

ახალგაზრდა სოფი მოსამსახურედ იწყებს მუშაობას ლელივრების ოჯახში და სახლში მაშინვე უცნაური მოვლენები იწყება, რაშიც ოჯახის ყველა წევრია ჩართული… კლოდ შაბროლის სულისშემძვრელ კინოსურათში მთავარ როლებს იზაბელ იუპერი და სანდრინ ბონარი თამაშობენ.

უმი (2017)

უმი

ფრანგი რეჟისორის, ჯულია დუკურნაუს სადებიუტო ფილმმა დიდი აჟიოტაჟი გამოიწვია. მას კინოკრიტიკოსთა მხრიდან არაერთგვაროვანი შეფასებები მოჰყვა, მაყურებლის ნაწილს კი პირდაპირ კინოდარბაზში აერია გული… უმი მოგვითხრობს ვეტერინარული სკოლის მოსწავლე ვეგეტარიანელ გოგოზე, რომელიც სკოლის ტრადიციის შესაბამისად, საკუთარ თავს აიძულებს, უმი ხორცი შეჭამოს, რის მერეც გაჩერებას ვეღარ ახერხებს.