10 ფილმი, რომელიც გაზაფხულის დადგომას უკეთ გაგრძნობინებთ

nugo July 11, 2021

და აი, როგორც იქნა დადგა გაზაფხული… მართალია აპრილის ცივი ამინდები ჯერ კიდევ გადასაგორებელი გვაქვს, თუმცა თბილ და გრძელ დღეებამდე სულ ცოტა დრო რჩება. წარმოგიდგენთ მზის სხივებით სავსე ფილმებს, რომელიც უკეთ შეგაგრძნობინებთ გაზაფხულის დადგომას და ზაფხულის მოახლოებას. მოკალათდით, მოდუნდით და დაივიწყეთ ქარიანი ამინდი:

გაზაფხულის იმედები (2012)

გაზაფხული სიყვარულის, ახალი დასაწყისების და იმედების პერიოდად ითვლება, შესაბამისად ჩვენი კოლექციის პირველი ფილმი სწორედ დევიდ ფრანკელის “გაზაფხულის იმედებია”. ფილმი მოგვითხრობს წყვილზე, რომელმაც 30 წლიანი ქორწინების შემდეგ გრძნობების გამოცოცხლება და ოჯახურ ურთიერთობაში სიახლეების შეტანა მოინდომა. მერილ სტრიპის შესანიშნავი პერფომანსი კი, ფილმს კიდე უფრო სასიამოვნოს და მარტივად საყურებელს ხდის.

კარგი წელიწადი (2006)

ფილმი, რომელიც ნამდვილ შვებულებას ჰგავს: პროვანსი, რომანტიკა, მზე, სითბო, ცოტა ღვინო და ნოსტალგიაც. ლირიული, გულწრფელი და მზიანი ფილმი რიდლი სკოტის სხვა ნამუშევრებისგან გამოირჩევა, რაც კიდევ ერთი მიზეზია, რომ ეს ფილმი ნახოთ. ეს არ არის უბრალოდ რომანტიკული ისტორია, მასში არის ყველაფერი: ლამაზი პეიზაჟები თავისი ვენახებით, სასიყვარულო ისტორიები, ლამაზი ქალბატონები, ფრანგული შარმი, კარგი იუმორი და სხვა…

ტოსკანის მზის ქვეშ (2003)

შესანიშნავი ფილმი, რომელიც თბილი და ნათელი ფერებით არის სავსე და მის ატმოსფეროს მაყურებელი პირველივე წუთებიდან შეიგრძნობს. ეს ზუსტად ის არის, რაც გაზაფხულის პირველ, თუმცა საკმაოდ ცივ ამინდში შეიძლება გჭირდებოდეთ. ფილმის თითოეული მომენტი არაჩვეულებრივია და მალევე იგრძნობთ თავს მთავარი გმირის ცხოვრების თანამონაწილედ.

ჭირვეულის მორჯულება (1980)

საკულტო ფილმი ადრიანო ჩელენტანოს მონაწილეობით და არაჩვეულებრივი სიუჟეტით, რომელიც, ალბათ, ყველამ იცით, თუმცა მისი ყურება ყოველთვის სასიამოვნოა. იტალიელებს კინოსადმი განსაკუთრებული თავისებური ჯადოქრობა ახასიათებთ და ეს ფილმი ამის კარგი მაგალითია. ჩელენტანოს და ორნელა მუტის კინოწყვილი დღემდე ერთ-ერთი საყვარელია უამრავი მაყურებლისთვის.

ღრუბლებში გასეირნება (1995)

რა არის ოჯახი? ბავშვები, მშობლები, ახლობლები… ზოგისთვის ოჯახი არის რაღაც, რაც თაობებს საუკუნეების მანძილზე გადაეცემათ. ვიღაცისთვის ეს დიდი ბებიის მედალიონია, ვიღაცისთვის კი ვენახი, რომელიც 400 წლის არის. ტრადიცია – ეს წმინდა რამ არის, განსაკუთრებით კი ოჯახური… მარტივი სიუჟეტის მიუხედავად ფილმი საინტერესოა, თანაც ლამაზი ხედებით და ახალგაზრდა კიანუ რივზის მონაწილეობით.

დიდი თევზი (2003)

არსებობს ფილმები, რომლის ყურების შემდეგ განძრევაც არ გვინდა, რომ შევიანრჩუნოთ ყველა შეგრძნება რაც შეიძლება დიდხანს. ტიმ ბარტონის ფილმი, სწორედ ასეთ ფილმებს ეკუთვნის. ბარტონი საოცარი რეჟისორია თავისი ხედვით, სამყაროს აღქმით, რაც ამ ჯადოსნურ ფილმში განსაკუთრებულად კარგად ჩანს. საოცარი სილამაზე, სიუჟეტი და სამყარო, რომელიც სამუდამოდ აღიბეჭდება თქვენს მეხსიერებაში.

ბურგუნდიაში დაბრუნება (2017)

მზის სხივებითა და ფრანგული ღვინის არომატით გაჯერებული ფილმი მეღვინეობაზე და ოჯახურ ღირებულებებზე. საერთო ჯამში ფილმი გამოვიდა დადებითი, კეთილი, მარტივი, გამორჩეული ატმოსფეროთი, რომელიც შესანიშნავი ბუნების, ვენახის და რა თქმა უნდა, თავად ღვინის ფონზე ოჯახურ და ცხოვრებისეულ ღირებულებებზე მოგვითხრობს, სადაც ჭიქა ღვინის და კამათის დახმარებით ჭეშმარიტება იბადება.

გაზაფხულის მეტრო (2002)

ძალიან ლამაზი ფილმი, რომელიც თავისი გამორჩეული სტილით აუცილებლად დაგამახსოვრებთ თავს. შეუძლიათ აღმოსავლეთში შექმნან ისეთი კინო, რომელშიც ფერებიც მკვეთრია და ისტორიაც, რომელიც თითოეულ მაყურებელს ძალიან ახლოს მიაქვს გულთან. ფილმის კიდევ ერთი დადებითი მხარე მისი მუსიკაა, რომელიც ბუნებრივად ერწყმის საინტერესო სიუჟეტს.

დიდი თვალები (2014)

ტიმ ბარტონის კიდევ ერთი შესანიშნავი, ლამაზი და თბილი ფილმი. მისი ძირითადი ლაიტმოტივი საკუთარ თავთან კონფლიქტი და ბრძოლაა. ბარტონი ოსტატურად ამოგზაურებს მაყურებელს გენდერული უთანასწორობის ატმოსფეროში, რომელიც ამერიკაში 50-იან წლებში მეფობდა. პატრიარქალური ოჯახური წყობა და სხვა სოციალური რპობლემები ულამაზესი პეიზაჟებითა და თბილი ფერებით გადმოგვცა რეჟისორმა.

ბოთლით დარტყმა (2008)

რეალურ მოვლენებზე გადაღებული ისტორია, რომელიც 1976 წელს ვითარდება. ეს იყო პირველი შემთხვევა, როდესაც კალიფორნიულმა ღვინომ ფრანგულ კონკურსში ფურორი მოახდინა და გაიმარჯვა. თუ თქვენ მოგეწონათ კარგი წელიწადი, არ გამოტოვოთ ეს ფილმიც, წინ დადებითი, მზიანი და თბილი ისტორია გელით კარგი მსახიობებით.