10 ფილმი, რომელიც დეკემბერს იდეალურად უხდება

nugo July 11, 2021

ახალი წლის დღესასწაული უფრო და უფრო გვიახლოვდება. თქვენ გაქვთ საახალწლო განწყობა? თუ ნაძვის ხეები ვიტრინებში და განათებები ქუჩებში არ არის თქვენთვის საკმარისი საზეიმო განწყობის შესაქმნელად, მაშინ ჩვენ უკეთეს ხერხს შემოგთავაზებთ – საახალწლო ფილმებს! დაგვიჯერეთ, არაფერია იმაზე უკეთესი, ვიდრე დეკემბრის ცივ ამინდში თემატური ფილმების ყურება.

კაი, არც შესავლით მოგაწყენთ და პირდაპირ შემოგთავაზებთ კოლექციას. მაშ ასე, დავიწყოთ:

ელფი (2003)

ჯონ ფავროს საოჯახო კომედია, რომლის საუნდტრეკები, გარემო და მთავარი გმირები აუცილებლად შეგიქმნით საახალწლო განწყობას. ფილმის თბილი ატმოსფერო და სიუჟეტი დაგავიწყებთ ყველა პრობლემას და საშუალებას მოგცემთ, თქვენს პატარებთან ერთად უბრალოდ სასიამოვნო საღამო გაატაროთ. ასე რომ კარგად მოეწყვეთ, წინ სახალისო ისტორია გელით უილ ფარელის მონაწილეობით.

ნარნიას ქრონიკები

ნარნია წიგნის ეკრანიზაციაა, რომელიც პარალელურ სამყაროზე მოგვითხრობს. მისი მთავარი შესასვლელი ჯადოსნურ კარადაშია. რა თქმა უნდა, ეს არ არის ფილმი უშუალოდ ახალ წელზე, მაგრამ მარტივი, საინტერესო, ულამაზესი და ნებისმიერი აუდიტორიისთვის მისაღები ისტორია სიკეთეზე და ბოროტებაზე, ნამდვილად იმსახურებს თქვენს ყურადღებას ასეთ პერიოდში.

ახალი საშობაო ზღაპარი (1988)

რიჩარდ დონერის სატირა, რომელიც დიკენსის “საშობაო სიმღერის” თანამედროვე ვერსიაა. აქ ატმოსფერო ირონიულია, ტრაგიკომედიური და საკმაოდ სენტიმენტალური სცენებით. ფილმში არსებული ჭეშმარიტებები ყველასთვის ცნობილია და თითქმის ყველას ავიწყდება ისინი. მაღალი დონის სცენარი, მსახიობების არაჩვეულებრივი შემადგენლობა და უბრალოდ კარგი საშობაო ზღაპარი, მშვენიერი მიზეზია ზამთრის საღამოს სახლში გასატარებლად.

8 ქალი (2002)

ალბათ, მხოლოდ ფრანგები თუ მოახერხებდნენ ინგლისური მკვლელობის ისტორიიდან ქალური სილამაზის და ცხოვრების ზეიმის მოწყობას. მოდი ვაღიაროთ, ეს ერთ-ერთი საყვარელი საშობაო ფილმია, რომელსაც ბუხართან ყოველ წელს სიამოვნებით ვუყურებთ, მიუხედავად იმისა, რომ უკვე ვიცით, რა მოხდა, რა ხდება, ან რითი დასრულდება…

ცუდი სანტა (2003)

ტიპური ამერიკული კომედია სულელური ხუმრობებით და შავი იუმორით, მაგრამ როგორ უცნაურადაც არ უნდა მოგეჩვენოთ, მიუხედავად ამ ყველაფრისა, ფილმში იგრძნობა საშობაო და საახალწლო დღესასწაულების სასიამოვნო ატმოსფერო. უნდა გამოვარჩიოთ ბილი ბობ ტორნტონის არაჩვეულებრივი შესრულება, რომელიც ნამდვილად შეუდარებელია. ასეთი ტიპის კომედიის ყურების დროს რთული წარმოსადგენია მასში საახალწლო სიმღერები, მაგრამ შავი იუმორის და ულამაზესი საშობაო მუსიკის შეხამება, ნამდვილად განუმეორებელ შთაბეჭდილებებს დაგიტოვებთ.

P.S. სხვა ფილმებისგან განსხვავებით, ეს ნამდვილად არ არის ფილმი, რომელიც მთელმა ოჯახმა ერთად უნდა ნახოთ…

საშობაო ზღაპარი (2008)

ფრანგული ტრაგიკომედია, რომელიც აბსოლუტურად ევროპულია თავისი ატმოსფეროთი, მსოფლმხედველობითა და გმირების რეაქციებით სხვადასხვა გარემოებებზე. კომედიის ელემენტებით გაჟღენთილი ცხოვრებისეული დრამა დიდ ოჯახზე, თავისი საიდუმლოებით და ინტრიგებითა და განსხვავებული აზრებით, ზამთრის დღესასწაულების ფონზე ვითარდება.

გაყინული (2013)

ის, რაც Disney-ს ძალიან კარგად გამოსდის – ეს ვიზუალია. ის ზღაპრული გარემო, რომელშიც მულტფილმის მოვლენები ვითარდება, ულამაზესია. თითოეული სცენა თავისი არაჩვეულებრივი საუნდტრეკებით აოცებს არამარტო პატარა მაყურებელს, არამედ ზრდასრულ ადამიანებსაც. ეს არის იდეალური ანიმაციური ფილმი, რომლის ყურებაც ნამდვილად გესიამოვნებათ ოჯახთან ერთად, პლედებში თბილად გახვეულებს.

თვითმფრინავები, მატარებლები და ავტომობილები (1987)

80-იანი წლების კომედიების ერთ-ერთი საუკეთესო მაგალითი. ჯონ ჰიუზის გამორჩეული ნამუშევარი, რომელშიც მთელი სულია ჩადებული. ამერიკული კომედია, რომელიც შეძლებს გაგამხიარულოთ და დადებითი შთაბეჭდილება დაგიტოვოთ მისი ყურების შემდეგ. ეს არის ისტორია მეგობრობაზე. მეგობრობაზე, რომელიც, ალბათ, არასდროს აეწყობოდა, რომ არა ექსტრემალური სიტუაცია.

ედვარდ მაკრატელხელება (1990)

ისტორიას, რომელიც ამ ფილმშია მოთხრობილი, მაყურებელი ზღაპრულ ატმოსფეროში გადაჰყავს. ტიმ ბარტონის ნამუშევარი არის ისტორია ყველა დროისთვის, ყველა ასაკისთვის, რომელიც გულგრილს არც ერთ მაყურებელს დატოვებს. ისტორია ადამიანების გულგრილობაზე, ბოროტებაზე და ამავე დროს სიკეთეზე, რომელიც გაგათბობთ თავისი ემოციებით.

მარტო სახლში (1990)

და რა იქნებოდა საახალწლო კოლექცია ყველასთვის საყავრელი კევინის გარეშე?! ალბათ, ყველა ადამიანს აქვს ტრადიციად ქცეული ყოველ ახალ წელს კევინის და მისი თავგადასავალის ყურება. სადღესასწაულო ატმოსფეროს ამ ფილმს ნამდვილად ვერ წავართმევთ და თუ აქამდე ჩამოთვლილმა ფილმებმა ვერ მოახერხეს თქვენთვის საახალწლო განწყობის შექმნა, მაშინ ისევ და ისევ კლასიკას მივმართოთ, რას იტყვით?