10 ფილმი, რომელიც ინსომნიაკებს ჩაძინებაში დაგეხმარებათ

ინსომნია ჩვენი საუკუნის გავრცელებული სენია. თუ სხვები შორეულ ქვეყნებში მოგზაურობაზე, კარიერულ წარმატებებზე, სიყვარულზე და ა.შ. და ა.შ. ოცნებობენ, ინსომნიაკებს ერთი მთავარი ნატვრა აქვთ: დაძინება. გთავაზობთ 10 ფილმს, რომელიც ჩაძინებაში დაგეხმარებათ:

ბეჭდების მბრძანებელი: ბეჭდის საძმო (2001)

დიახ. როგორც უნდა გაგიკვირდეთ, ეს ბეჭდების მბრძანებელი: ბეჭდის საძმოა, რომელიც მგონი მთელ სამყაროს ნანახი აქვს და ალბათ, თქვენც ნანახი გექნებათ. თუმცა, თუ დაძინება გიჭირთ, გირჩევთ, კიდევ ერთხელ ჩართოთ. ტოლკინის ჯადოსნური სამყარო, რომლის ასევე ჯადოსნური, 4-საათიანი ეკრანული ვერსია შემოგვთავაზა პიტერ ჯეკსონმა, ძილს მოგგვრით.

უოლ-ი (2008)

არსებობს კი სამყაროში უოლ-იზე საყვარელი რობოტი? სრულიად მარტო ადამიანებისგან მიტოვებულ, ნაგვით სავსე დედამიწაზე, რომლის დასუფთავებასაც უკვე 700 წელია ცდილობს, სანამ ერთხელაც კოსმოსური ხომალდი არ დაეშვება… და უოლ-ის გვერდზე გადახრილი თავი… Pixar-ის ყველა დროის ერთ-ერთი საუკეთესო ანიმაცია წამალია ინსომნიაკებისთვის.

მოჩვენებების მიერ გატაცებულნი (2002)

სხვა წამალი ჰაიაო მიაძაკის ნამდვილი შედევრი – მოჩვენებების მიერ გატაცებულნია, ისტორია ღმერთების, ჯადოქრებისა და სულების სამყაროში მოხეტიალე 10 წლის გოგონაზე. მიაძაკის ამ სურათმა 2003 წელს ოსკარი მიიღო წლის საუკეთესო ანიმაციის კატეგორიაში.

პონიო (2009)

ჰაიაო მიაძაკის კიდევ ერთი ანიმაცია, რომელიც ჩაძინებაში დაგეხმარებათ, პონიოა – ამბავი 5 წლის ბიჭსა და პრინცესა ოქროს თევზზე, რომელსაც ის შეუყვარდება და მოისურვებს, ადამიანი გახდეს…

მგზავრები (2016)

კინოზე გადმოვერთვებით და ინსომნიაკებს 2016 წლის სურათს – მგზავრებს შემოგთავაზებთ, მთავარ როლებში – კრის პრატითა და ყველასთვის საყვარელი ჯენიფერ ლოურენსით. ფილმი მოგვითხრობს კოსმოსურ ხომალდზე, ათასობით მძინარე მგზავრით, რომელიც შორეულ პლანეტაზე მიემგზავრება. სიტუაცია მას შემდეგ იცვლება, რაც ერთ-ერთი მგზავრი პლანეტაზე მისვლამდე 90 წლით ადრე გაიღვიძებს და მიხვდება, რომ სიცოცხლის ბოლომდე მარტოს მოუწევს ყოფნა ხომალდზე.

შადრევანი (2006)

გასაოცარი ვიზუალის ფილმი, სადაც ისტორია სამ სხვადასხვა დროში ვითარდება, დარენ არანოვსკიმ ბუდისტური მოძღვრების გავლენით შექმნა. ტრაგიკული სიუჟეტური ხაზის მიუხედავად, ფილმის ნათელი ფერები და მთავარი გმირის ძიების გზა სწორედ იმ შინაგან სიმშვიდეს ქმნის, რაც ბუდიზმში ძირეულია.

გარიყული (2000)

რობერტ ზემეკისის ფილმში ჩვენ ერთი ადამიანის ისტორიას ვუყურებთ, ადამიანის, რომელიც ავიაკატასტროფის შემდეგ კუნძულზე მარტო აღმოჩნდა; გარიყული ადამიანის, რომელმაც, თვითგადარჩენისთვის ბრძოლის პროცესში, სრული ფიზიკური და ფსიქოლოგიური ტრანსფორმაცია განიცადა.

ბაღების ქვეყანა (2004)

გარეგნულად მშვიდი, მაგრამ შინაგანად მშფოთვარე ენდრიუ, რომელიც მორჩილად მიყვება ცხოვრების დინებას, დიდხნიანი განშორების შემდეგ, მშობლიურ ქალაქში ბრუნდება დედის დაკრძალვაზე. დეპრესიაში მყოფი, ვერც კი წარმოიდგენს, რომ სწორედ ეს დაბრუნება გახდება მის ცხოვრებაში დიდი ცვლილებების დასაწყისი.

ზღვარს იქით (2006)

1920-იანი წლების ლოს-ანჯელესი. გარეუბნის საავადმყოფოში დაჭრილი კასკადიორი პატარა ხელმოტეხილ გოგონას მაგიურ ისტორიას უყვება ხუთ მითიურ გმირზე. კაცის შინაგანი მდგომარეობისა და გოგონას ნათელი წარმოსახვის წყალობით, ზღვარი ფანტაზიასა და რეალობას შორის უფრო და უფრო იშლება.

შეუდარებელი მისტერ ფოქსი (2009)

და კვლავ ანიმაცია. და თან თანამედროვეობის ერთ-ერთი ყველაზე გამორჩეული რეჟისორის – უეს ანდერსონის ანიმაცია შეუდარებელ მისტერ ფოქსზე, რომელმაც თავისი მოდგმა ფერმერების შურისძიებას უნდა გადაარჩინოს. იმედია, ანდერსონის ინდივიდუალური სტილი და ფერები ინსომნიაკებს დაგეხმარებათ, ტკბილად დაიძინოთ.