10 ფილმი, რომელიც სიყვარულის სირთულეებზე გვიყვება

nugo July 10, 2021

არსებობს უამრავი რამ, რაც ჩვენს ადამიანურობას განსაზღვრავს, მაგრამ შეუძლებელია სამყარო, რომელშიც ჩვენ ვცხოვრობთ, შევიცნოთ, იმ ფაქტის დავიწყების გარეშე, რომ ჩვენ ძალიან ემოციური არსებები ვართ.

მთელი ჩვენი ისტორია ორ ძირითად სვეტზეა აგებული: ემოცია და გონება, რომელიც ხელოვნებასა და მეცნიერებაში გამოიხატება. ჩვენს ბუნებაში არსებობს გარკვეული დიალექტიკური წინააღმდეგობა, ბრძოლა ჩვენს გრძნობებსა და აზრებს შორის, რომელიც ცხოვრებას თავისებურად ართულებს და თან უფრო სასიამოვნოს და საშიშს ხდის.

ჩვენ წარმოგიდგენთ ფილმებს, რომლებიც წარუმატებელი სიყვარულის ისტორიებს მოგვითხრობენ, სადაც პერსონაჟები ტკივილისგან გამოწვეულ გაუსაძლის ემოციებს ხვდებიან და სადაც სიყვარული იმდენად იზრდება, რომ თავად ცხოვრება მასთან შედარებით ძალიან პატარა ჩანს.

ლობსტერი

ბერძენი რეჟისორის გიორგოს ლანთიმოსის არაჩვეულებრივი ფილმი, რომელიც ერთი შეხედვით, შეიძლება, უცნაურ კომედიად მოგეჩვენოთ, სიყვარულის იდეაზე შექმნილი სატირაა, მაგრამ სინამდვილეში ის ბევრად ღრმაა და ეჭვის ქვეშ აყენებს თავად სიყვარულის შესაძლებლობას პოსტმოდერნიზმში, აკურატულად ორგანიზებულ სამყაროში, რომელშიც ჩვენ ვცხოვრობდით ბოლო ათწლეული, სადაც ყველაფერი სტანდარტულია, სპონტანურობა თითქმის აღარ არსებობს, სიმართლის გააზრება კი რთული დავალებაა. ეგოისტურ საზოგადოებაში სიყვარულიც ეგოისტური ხდება, ამიტომ საკუთარი თავის ძებნას სხვაგან ვიწყებთ და ეს ჩვენი მთავარი მოტივატორი ხდება. ფილმი დაგაფიქრებთ იმაზე, თუ როგორ ვუახლოვდებით მისაკუთრების გრძნობას და სოციალური რიტუალების დავიწყებას. ფილმი ოსკარზე საუკეთესო ორიგინალური სცენარისთვის იყო ნომინირებული.

ველური დღეები

“ველური დღეები” ვონ კარ-ვაის მეორე ფილმია, რომელიც რამდენიმე ახალგაზრდის განსაცდელის და უბედურების ისტორიას მოგვითხრობს, ახალგაზრდებზე, რომლებიც სიყვარულსა და მწუხარებაში ეფლობიან. მის ისტორიებს უიმედო დასკვნამდე მივყავართ – სიყვარული რთულია, მწუხარება გარდაუვალი, და მაინც, ეს ერთ-ერთი ყველაზე ლამაზი გრძნობაა, რაც კი შეიძლება განვიცადოთ. ფილმი სევდიანი სასიყვარულო სიმღერასავითაა: მისი ატმოსფერო რაღაც განსაცდელთან, მელანქოლიასთან არის დაკავშირებული.

ჯული და ჯიმი

ფრანსუა ტრიუფოს ფილმი “ჯული და კიმი” ერთ-ერთ შედევრად არის აღიარებული. ფილმი ორი მეგობრის ისტორიას მოგვითხრობს, რომლებიც პირველი მსოფლიო ომის წინა პერიოდში პარიზში ცხოვრობდნენ. მათ ცხოვრებაში ჩნდება კატრინი, რომელიც მათ თავიანთ საყვარელ ქანდაკებას ახსენებთ. ფილმი აღწერს, თუ როგორ იცვლება სასიყვარულო სამკუთხედში სამი ადამიანის ურთიერთობა. როდესაც ეს სამკუთხედი კიდევ უფრო ჩახლართული ხდება, ჩნდება რთული კონფლიქტური გრძნობები. ფილმში დეტალურად განიხილება ურთიერთობა, რომელიც სტანდარტული ბინარული კონვენციის საზღვარს სცდება. ტრიუფოს ნამუშევარი BAFTA-ზე საუკეთესო ფილმისთვის იყო ნომინირებული, კატრინის შემსრულებელი ჟანა მორო კი – საუკეთესო მსახიობი ქალისთვის მთავარ როლში.

წარმოსახვითი სიყვარული

ეს ფილმი ქსავიე დოლანის მეორე ნამუშევარია და მიუხედავად იმისა, რომ ტექნიკურად დახვეწილი არ არის, ის გვიჩვენებს მისი წარმოსახვის უნარს და უჩვეულო ინტუიციას. ფილმის ძირითად ისტორიას თან სდევს ადამიანების ჩვენებები, რომლებიც სულიერად იტანჯებიან. მათი დანგრეული სიყვარულის ისტორიები, საკუთარ გრძნობებთან გამკლავების სირთულეების ხაზის გასმას ემსახურება. რთულია ჩვენი ოცნებები და ილუზიები რეალობას შევუსაბამოთ.

დაცემული ანგელოზები

ისევე როგორც “ველურ დღეებში”, ამ ფილმშიც რამდენიმე შეწუხებული საყვარლის ცხოვრებაში ჩავიხედებით. ყველა ისტორიას ერთი საერთო ელემენტი აქვს – გატეხილი გული. ვონ კარ-ვაი თავის პერსონაჟებს მუდამ აშკარა მგრძნობიარობით განასახიერებს: ისინი ემოციურად ღრმა და კონფლიქტურები არიან, მათ უყვარდებათ მთელი გულით ტკივილამდე, სასოწარკვეთილება კი აუძლურებს მათ.

ლურჯი ყველაზე თბილი ფერია

2013 წლის კანის ფესტივალის ოქროს პალმის რტოს გამარჯვებული ფილმი, რომელიც ადელის ცხოვრებაზე მოგვითხრობს, რომელსაც ადელ ეგზარქოპულოსი ასრულებს. ახალგაზრდა ფრანგ ქალს, მხატვარი ემა უყვარდება, რომელსაც ლეა სეიდუ ასრულებს. ჩვენ თვალს ვადევნებთ ადელის სურვილებს და რამდენიმე ჰეტეროსექსუალური ურთიერთობის შემდეგ ის ემასადმი, რომელიც ამოუცნობი და ემანსიპირებული ქალია, ძლიერ დამოკიდებულებას გრძნობს. მათი რომანი სწრაფად ვითარდება, მაგრამ ყველაფერი მალევე მთავრდება ცრემლებით და ახალი დასაწყისით. ფილმი ოსკარზე საუკეთესო უცხოენოვანი ფილმისთვის იყო ნომინირებული.

სიყვარული

დღესდღეობით “სიყვარული” გასპარ ნოეს ბოლო ფილმია, რომელიც მერფის, პარიზში მცხოვრები კინოს სტუდენტის, და მხატვრის, სახელად ელექტრა, სიყვარულის ისტორიას მოგვითხრობს. მათი სიყვარული ვნებიანი და განუმეორებელია, მაგრამ საბოლოო ჯამში მაინც ინგრევა, რომელიც მხოლოდ მოგონებების და სინანულის გრძნობას ტოვებს კვალად. ისტორია მერფის პერსპექტივიდან არის მოყოლილი, როდესაც ყვეალფერი დამთავრდა, ელექტრა გაუჩინარდა, თავად კი ომისთან ერთად ცხოვრობს, გოგონასთან, რომელიც შემთხვევით დააფეხმძიმა.

ენი ჰოლი

ეს ვუდი ალენის ფილმია, რომელიც იწყება მონოლოგით, სადაც ალენს ელვი სინგერის სახელით გავიცნობთ, კომიკოსი, რომელიც თავის ცხოვრებაზე და ენი ჰოლთან, რომელსაც დაიან კიტონი ასრულებს, ურთიერთობაზე ფიქრობს. ელვი თავის ურთიერთობაზე გვიყვება ენისთან და ცდილობს გაიგოს, სად დაიმსხვრა ყველაფერი, სად დაუშვა შეცდომა, თან საკუთარ ბავშვობას და სხვა მისი ცხოვრების მნიშვნელოვან მომენტებს იხსენებს. ვუდი ალენის საფირმო ნიშნებით სავსე ფილმი, როგორიცაა, მაგალითად, ინგმარ ბერგმანისადმი, ფილოსოფიისადმი, ფსიქოლოიისადმი და ებრაული რელიგიისადმი გზავნილები, ფილმი უდარდელი და სახალისოა, რომელიც ჩვენც მსგავს მდგომარეობაში გვაყენებს და გაურკვეველს ტოვებს, თუ რატომ იყო გარდაუვალი იმ სიყვარულის დაკარგვა, რომელმაც ამდენი ბედნიერება მოიტანა… ფილმმა ოსკარის ხუთი ნომინაციიდან ოთხ კატეგორიაში გაიმარჯვა.

ნათელი გონების მარადიული ბრწყინვალება

გულის ტკენა და ტკივილი, სიყვარული და სასოწარკვეთილება, ტანჯვა იმდენად დიდია, რომ გაიძულებთ დაივიწყოთ ყველაფერი და გაექცეთ საკუთარ თავს. ეს ის გრძნობებია, რომლებიც მიშელ გონდრის ფილმში ვლინდება. სცენარი ჩვენი დროს ერთ-ერთი ყველაზე დიდი წარმოსახვის მქონე სცენარისტის ჩარლი კაუფმანის დაწერილია, რომელიც ჯიმ კერის პერსონაჟის ისტორიას მოგვითხრობს, რომელმაც, როდესაც გაიგო, რომ მისმა შეყავრებულმა ის მეხსიერებიდან ამოშალა, გადაწყვიტა იგივე გაეკეთებინა. ფილმმა ოსკარი საუკეთესო ორიგინალური სცენარისთვის მიიღო.

მოკლე ფილმი სიყვარულზე

ეს ფილმი კისლიოვსკის “დეკალოგის” ნაწილია, რომელიც ბიბლიურ ათ მცნებას ეძღვნებოდა. ფილმი გვიჩვენებს ახალგაზრდა ადამიანის, ტომეკის გულში არსებულ არეულობას, რომელსაც თავისი მეზობელი უიმედოდ უყვარს. ის ქალს ყოველღამე ჩუმად უთვალთვალებს და რამდენიმე შეხვედრის შემდეგ, რომელიც ტომეკის ეშმაკობით შედგა, ისინი პაემანზე მიდიან. ფილმი ტომეკის სიყვარულის და სექსის სამყაროსთან პირველ შეხვედრაზე მოგვითხრობს. ტომეკი ხვდება, რომ ხანდახან შეუძლებელია იმ დაბრკოლების გადალახვა, რომელიც სიყვარულს და სექსს ერთმანეთისგან ყოფს.