10 ფილმი, რომელიც შემოდგომის ცივ ამინდებს გადაგატანინებთ

nugo July 10, 2021

უკვე აცივდა, გარეთ მატყუარა მზეა და შემოდგომა თავისი სუსხიანი ხასიათით, თავისებურ განწყობას გვიქმნის.

ეს სეზონი კი საუკეთესოა იმისთვის, რომ სახლში ცხელ ჩაისთან, სავარძელში მოკალათებულებმა ფილმებს ვუყუროთ, რომელიც სიმყუდროვის შეგრძნებას მოგვიტანს და სუსხიანი თავგადასავლებით, ხასიათს გამოგვიკეთებს.

მაშ ასე, გთავაზობთ 10 ფილმს, რომელსაც სწორედ მაშინ უნდა ვუყუროთ, როდესაც გარეთ, დაახლოებით, აი ასეთი ამინდია და თავისებურად, რომანტიკულ განწყობას გვიქმნის

შვებულება (2006)

ნენსი მეიერსის რომანტიკული კომედია, რომელშიც კამერონ დიაზის და ქეით უინსლეტის გმირები ყოველდღიურობით და წარუმატებელი სასიყვარულო ურთიერთობებით დაღლილები არიან. ისინი ახალი წლის პერიოდში სახლების გაცვლას და იმ ადგილების დათვალიერებას გადაწყვეტენ, რომლებზეც აქამდე მხოლოდ წაეკითხათ: ერთი დათოვლილ  ბრიტანეთში გაემართა, მეორე კი – მზიან ლოს-ანჯელესში. ისინი ახალ ადგილებთან ერთად ახალ ადამიანებსაც პოულობენ. ფილმში ასევე მონაწილეობენ ჯუდ ლოუ და ჯეკ ბლექი. გამორიცხულია, ფილმმა კარგ ხასიათზე არ დაგაყენოთ. სიყვარულის უჩვეულო ისტორია და პერსონაჟები, აუცილებლად გაღიმებულს დაგტოვებენ.

მატარებელი დარჯილინგის მიმართულებით (2007)

მამის გარდაცვალებიდან ერთი წლის შემდეგ სამი ძმა, რომლებსაც დეპრესია აწუხებთ, ინდოეთში სამოგზაუროდ იკრიბებიან. ძმების როლებს ედრიენ ბროუდი, ოუენ უილსონი და ჯეისონ შვარცმანი ასრულებენ. მიუხედავად იმისა, რომ ძმები გამუდმებით კამათობენ, ჩხუბობენ და ბრაზდებიან ერთმანეთზე, ისინი ინდოეთში სულიერი ამაღლებისთვის და თავიანთი თავის თავიდან აღმოჩენას ცდილობენ. ფილმში არსებული ატმოსფერო და თბილი ფერები ნამდვილად შეგიქმნით სიმყუდროვეს ასეთ ამინდში. უეს ანდერსონის ფილმი ინდოელი რეჟისორის სატიაჯიტ რაის ხსოვნას ეძღვნება.

ეგზოტიკური სასტუმრო “მერიგოლდი” (2012)

ინდოეთის ქალაქ ჯაიპურში მოგზაურობა ბრიტანელი პენსიონერების ჯგუფისთვის მიჩვეული კომფორტის ჩარჩოებისგან გაცილებით შორს აღმოჩნდა. ეს მოგზაურობა მათთვის არსებული ღირებულებების გადაფასებებით და, რა თქმა უნდა, არაჩვეულებრივი საკურორტო რომანებით სავსე აღმოჩნდა. ფილმი ოქროს გლობუსზე იყო ნომინირებული კატეგორიაში ოქროს გლობუსი საუკეთესო მიუზიკლისა ან კომედიისთვის, ერთ-ერთი მთავარი როლის შემსრულებელი ჯუდი დენჩი კი – საუკეთესო მსახიობი ქალისთვის მიუზიკლსა ან კომედიაში.

გრანდიოზული აფერა (2013)

თევზაობის აკრძალვის შემდეგ კანადის სოფლის მაცხოვრებლებს ერთადერთი საქმიანობა ჩამოერთვათ. ამასობაში, ერთ-ერთი უმსხვილესი კომპანია ახალი ქარხნის ასაშენებლად ადგილს ეძებს, რომელსაც ყველაზე ღარიბ ქალაქში სიცოცხლის დაბრუნება შეუძლია. ამისთვის მოსახლეობას ქრთამისთვის 100 000 დოლარის მოძიება, მოსახლეობის გაზრდა და ამ მიყრუებულ ადგილას ქალაქის ექიმის დასახლება ესაჭიროებათ. ფილმში მთავარ როლებს ბრენდან გლისონი და ტეილორ კიტჩი ასრულებენ.

კაცი სახელად ოვი (2015)

ხანშიშესული პედანტი, წუწუნა და უბრალოდ მოსაწყენი ოვი, მუდამ იცავს წესებს და იმავეს ითხოვს და აიძულებს ყველა გარშემომყოფს. სინამდვილეში, მას უბრალოდ ძალიან ენატრება გარდაცვლილი მეუღლე, რომელსაც დიდი სიამოვნებით გაყვებოდა, მაგრამ ცხოვრება არაპროგნოზირებადია, ის ყველა გეგმას შლის, თუნდაც ასეთი ტიპის… შვედეთში გადაღებული ფილმი, რომელშიც მთავარ როლს როლფ ლასგარდი ასრულებს, ოსკარზე საუკეთესო გრიმისთვის და საუკეთესო უცხოენოვანი ფილმისთვის იყო ნომინირებული.

შუაღამე პარიზში (2011)

ვუდი ალენის ზღაპრული ატმოსფერო, რომელიც რეალობას და სიცივეს ცოტა ხნით მაინც დაგავიწყებთ. ოუენ უილსონის პერსონაჟი ჰოლივუდის წარმატებული სცენარისტი და გამოუსწორებელი რომანტიკოსია, რომელიც მე-20 საუკუნის დასაწყისის ბოჰემურ ცხოვრებაში აღმოჩენაზე ოცნებობს და პარიზში ჩადის თავის მეგობარ გოგონასთან ერთად( რეიჩელ მაკადამსი). ეს ხომ იდეალური ადგილია შეყავრებული წყვილისთვის? როგორც უმეტესად ხდება ალენის ფილმებში, სურვილი რეალობად იქცევა და უილსონის გმირი ღამის ქუჩებში სეირნობის დროს წარსულში აღმოჩნდება, სადაც ნებისმიერ კუმირთან შეუძლია ისაუბროს. ოსკარის ოთხი ნომინაციიდან ვუდი ალენმა ოქროს ქანდაკება საუკეთესო ორიგინალური სცენარისთვის მიიღო.

სანელებლები და ვნებები (2014)

ინდოელი ემიგრანტების ოჯახი კაფეს გახსნას გადაწყვეტს აღმოსავლური სამზარეულოთი. როდესაც მათმა მეზობელმა მადამ მელორიმ, რომელიც სახელგანთქმული რესტორნის “მტირალა ტირიფის” მფლობელია, ემიგრანტების გეგმის შესახებ შეიტყო და ყველანაირად შეეცადა მათთვის ხელი შეეშალა. მისი მორიგი ხრიკის შემდეგ ოჯახის უფროსი მადამს ომს უცხადებს და რესტორნების ბრძოლას აწყობს, რათა ერთხელ და სამუდამოდ გაარკვიონ, რომელი რესტორანი ურჩევნიათ მომხმარებლებს. მადამ მელორის როლისთვის ჰელენ მირენი ოქროს გლობუსზე საუკეთესო მსახიობი ქალისთვის მიუზიკლსა ან კომედიაში იყო ნომინირებული.

ოსტინლენდი (2013)

ჯერუშა ჰესის ბრიტანულ-ამერიკული რომანტიკული კომედია, რომელიც მომხიბვლელი, მაგრამ ცოტა უცნაური ამერიკელი ჯეინი ისტორიას მოგვითხრობს. ჯეინი, რომელსაც კერი რასელი ასრულებს, ჯეინ ოსტინის რომანებითაა შეპყრობილი და თავის მცირედ დანაზოგს ოსტინლენდში მოგზაურობას ახარჯავს, სადაც ჭეშმარიტი ლედის და კეთილშობილი ჯენტლმენების სამყაროში აღმოჩენაზე ოცნებობს, რათა საკუთარი მისტერ დარსი იპოვოს. ფილმი სტეფანი მაიერის ამავე სახელწოდების რომანს ეფუძნება.

ვეძებ მეგობარს სამყაროს აღსასრულისათვის (2012)

რა უნდა გავაკეთოთ, როდესაც სამყაროს აღსასრულამდე სამი კვირაა დარჩენილი? სტივ კარელის გმირი სასოწარკვეთილ და, ამავდროულად, რომანტიკულ ნაბიჯს დგამს: ის ნამდვილი სიყვარულის მოსაძებნად მიემგზავრება. დამღლელი გზა ძალიან მოსაწყენი რომ არყოფილიყო, კარელის პერსონაჟმა თან მეზობელი წაიყვანა, რომელსაც კირა ნაითლი ასრულებს, რომელსაც მეწყვილესგან განსხვავებით, აპოკალიპსის საპატივცემულოდ არაფერი ჰქონდა დაგეგმილი. ფილმი თბილ ლოს-ანჯელესშია გადაღებული, ასე რომ, მიუხედავად სამყაროს აღსასრულის მოახლოებისა, თავს მყუდროდ და თბილად იგრძნობთ.

მარტივი სირთულეები (2009)

კიდევ ერთი თბილი, სახალისო და ცოტა ჩახლართული რომანტიკული კომედია ნენსი მეიერსისგან. მერილ სტრიპის გმირმა, სამი შვილის დედამ და მისმა მეუღლემ, რომელსაც ალეკ ბოლდუინი ასრულებს, კვლავ გააბეს რომანი. პრობლემა იმაშია, რომ ბოლდუინის გმირი უკვე სხვა ქალზეა დაქორწინებული, სტრიპის გმირს კი ახალი თაყვანისმცემელი გამოუჩნდა. მეიერსის ფილმი, რომელიც ოქროს გლობუსის სამ კატეგორიაში იყო ნომინირებული, მათ შორის ნომინაციაში ოქროს გლობუსი საუკეთესო მიუზიკლისა ან კომედიისთვის, კიდევ ერთხელ შეგახსენებთ, რომ ცხოვრება მოულოდნელობებით არის სავსე…