10 ფილმი, რომელიც ცხოვრების რეალურ მხარეებს გვიჩვენებს

ეს ფილმები დრამის ჟანრს მიეკუთვნება და მაყურებელში ერთდროულად ორივე – პესიმისტურ და ოპტიმისტურ განწყობებს იწვევს. ესაა 10 ფილმი, რომელიც ცხოვრების რეალურ მხარეებს გვიჩვენებს:

დამსხვრეული ყვავილები (2005)

საყვარელ ქალთან განშორების გამო ფილმის მთავარი გმირი დეპრესიაში ვარდება. მერე კი, მოულოდნელად იგებს, რომ შვილი ჰყავს და მის ძებნას იწყებს. ამ პროცესში ის აწმყოთი ტკბობის მნიშვნელობას აცნობიერებს.

მრისხანების მტევნები (1940)

ჯონ სტეინბეკის რომანის ეკრანიზაცია გვიყვება ოკლაჰომაში მცხოვრებ ღარიბ ოჯახზე, რომელსაც, 1930-იანი წლების დიდი დეპრესიის გამო, თავიანთი მიწის დატოვება და კალიფორნიაში სამუშაოდ წასვლა უხდება.

გიყვარდეს ლიზა (2002)

მას შემდეგ, რაც მისმა ცოლმა – ლიზამ თავი მოიკლა, ნიჭიერი ვებ-დიზაინერი ყველაფერს აკეთებს იმისთვის, რომ ცხოვრების გაგრძელება შეძლოს. მისი მცდელობები, ერთი შეხედვით, უჩვეულოა, თუმცა, რეალისტურად გადმოსცემს იმ ტანჯვას, რასაც მთავარი გმირი განიცდის.

განქორწინება (2011)

ნადერი და სიმინი ირანიდან წასვლას აპირებენ, თუმცა, მოგვიანებით ნადერი გადაიფიქრებს და ავადმყოფ მამასთან რჩება. ახლა ცოლ-ქმარს სასამართლოში მოუწევს იმის გარკვევა, თუ ვისთან დარჩება მათი 11 წლის ქალიშვილი.

ქალი გავლენის ქვეშ (1974)

შუახნის კაცი ყველაფერს აკეთებს იმისთვის, რომ ფსიქიკურად გაუწონასწორებელ ცოლს დაეხმაროს და გვერდში დაუდგეს. თუმცა, როდესაც ქალის არასტაბილურობა მათ შვილებს ავნებს, კაცს მტკივნეული გადაწყვეტილების მიღება მოუწევს.

გარღვეული წრე (2012)

ფილმი დიდი ხნის წყვილზე მოგვითხრობს და შეულამაზებლად გვიჩვენებს მათი ურთიერთობის პოზიტიურ და ნეგატიურ მხარეებს; იმ ტკივილს, რომელსაც ყველა ჩვენგანი განვიცდით.

სადგურის ზედამხედველი (2003)

ერთადერთი მეგობრის სიკვდილის შემდეგ, ჯუჯა გადაწყვეტს, დიდი ქალაქიდან საცხოვრებლად ნიუ-ჯერსიში გადავიდეს. მელანქოლიური ატმოსფეროსა და პერსონაჟთა ტანჯვის მიუხედავად, ფილმი შესანიშნავად გვიჩვენებს, რომ პრობლემები და ნაკლოვანებები ცხოვრების განუყოფელი ნაწილია.

ალისა აქ უკვე აღარ ცხოვრობს (1974)

ახალგაზრდა ქვრივი ქალი თავის 12 წლის შვილთან ერთად მონტერეიში მიემგზავრება, რათა დიდი ხნის ოცნების ასრულებას ეცადოს, ოცნების, რომელიც ცხოვრებამ ნამსხვრევებად უქცია…

სიყვარული (2012)

ცოლის ავადმყოფობა მოხუც კაცს ახალ რეალობასთან შეგუებას აიძულებს. მიხაელ ჰანეკეს ეს ბრწყინვალე სურათი ცხოვრების ძალიან ნამდვილ და მტკივნეულ მხარეებზე გვიყვება.

სამი ფერი: ლურჯი (1993)

რთული და ემოციური ფილმი ახალგაზრდა ქალზე, რომელმაც ავტოავარიის შედეგად ქმარი და პატარა ქალიშვილი დაკარგა და რომელიც ცდილობს, როგორმე ცხოვრება განაგრძოს…