მსოფლიოში უამრავი ეკრანიზაციაა, რომლებიც წიგნების და ბესთსელერების მიხედვითაა გადაღებული, მაგრამ სამწუხაროდ ფილმში არ გამოდის ავტორის მიერ აღწერილი განცდების და დეტალების სწორად, ან საფუძვლიანად გადატანა და ასეთ შემთხვევაში მაყურებელს სიცარიელის განცდა უჩნდება და იმედგაცრუებული რჩება, თუმცა არსებობს შემთხვევებიც, როდესაც პირიქით ხდება და ეკრანიზაცია ამართლებს, ან უკეთესი – ჯობია კიდეც წიგნს.
ჩვენ იმ 10 საკულტო კინოფირს გთავაზობთ, რომელმაც იდეალურად გადმოსცა წიგნის სიუჟეტი და შეიძლება თამამადაც ითქვას, რომ აჯობა კიდეც მას.

1. მებრძოლთა კლუბი

დევიდ ფინჩერის ფილმი, რომელიც ჩაკ პალანიკის რომანის მიხედვითაა გადაღებული. როდესაც ფილმი გაყიდვაში გამოვიდა, მაყურებლის და კრიტიკოსების აზრი ორად გაიყო და მხოლოდ 10 წლის შემდეგ გამოქვეყნდა გაზეთში The New York Times სტატია, სადაც “მებრძოლთა კლუბი” ჩვენი დროის საკულტო ფილმად დასახელდა. ფილმში მთავარი როლები ედვარდ ნორტონმა, ბრედ პიტმა და ჰელენ ბონემ კარტერმა შეასრულეს. ჩაკ პალანიკმაც კი აღიარა, რომ ფილმის დასასრული თავის წიგნზე წარმატებული აღმოჩნდა. ფინჩერის ფილმმა ოსკარი საუკეთესო ხმის მონტაჟისთვის მიიღო.

2. ძაღლის გული

მიხეილ ბულგაკოვის წიგნის მიერ გადაღებული ვლადიმირ ბორტკოს ფილმი. ძაღლის ადამიანად გადაქცევის მოთხრობა პოლიტიკურ სატირად განიხილება. ბულგაკოვმა “ძაღლის გული” 1925 წელს დაწერა, თუმცა ის მხოლოდ 1987 წელს გამოაქვეყნეს. ფილმი ვლადიმირ ბორტკომ წიგნის გამოსვლიდან ერთ წელში გადაიღო, რომელიც ბევრ საერთაშორისო კინოფესტივალზე იყო წარდგენილი და უამრავი ჯილდო დაიმსახურა.

3. ფორესტ გამპი

რობერტ ზემეკისის 1994 წლის ნამუშევარი, რომელიც უინსტონ გრუმის რომანის ეკრანიზაციაა. ფილმში მთავარი გმირი კეთილი და მიამიტია, თუმცა წიგნში ის აუტანელი ცინიკოსია. რეჟისორმა გადაწყვიტა რომანისგან ცოტა გადაეხვია და ფორესტ გამპი უწყინარ ადამიანად ეჩვენებინა, რომელიც მაყურებლის სიმპათიას დაიმსახურებდა. მას ეს აშკარად გამოუვიდა და ფილმმა ოსკარზე 13 ნომინაციიდან 6 კატეგორიაში გაიმარჯვა.

4. ვიღაცამ გუგულის ბუდეს გადაუფრინა

კენ კიზის ნაწარმოების მიხედვით გადაღებული ფილმი, რომლის რეჟისორიც მილოშ ფორმანია. წიგნი და ფილმი მოგვითხრობს შეუდარებელი ჯეკ ნიკოლსონის გმირზე, რომელიც ფსიქიატრიულ დაწესებულებაში მოხვედრის შემდეგ არ ეთანხმება მოქმედ რეჟიმს და ცდილობს მის წინააღმდეგ იბრძოლოს. რომანის ეკრანიზაციამ თავად კენ კიზის კრიტიკა დაიმსახურა, რადგან “მთხრობელი” მეორე ხაზზე იყო ჩაწეული. მაგრამ, ამის მიუხედავად, ფილმმა ოსკარის 5 ყველაზე პრესტიჟული ჯილდო მოიპოვა.

5. შინდლერის სია

სტივენ სპილბერგის ფილმი ავსტრალიელი მწერლის თომას კენილის წიგნის “შინდლერის კიდობანი” მიხედვითაა გადაღებული, რომელიც ჰოლოკოსტის პერიოდში მომხდარ რეალურ მოვლენებს ეყრდნობა. მთავარმა გმირმა, ოსკარ შინდლერმა, რომელსაც ლიამ ნისონი განასახიერებს, 1200 ებრაელი გადაარჩინა. ეს ფილმი ისტორიაში ყველაზე ძვირადღირებული შავ-თეთრი კინოა, რომელმაც ოსკარი 7 კატეგორიაში მიიღო.

6. დიდი გეთსბი

 

ფრენსის სკოტ ფიცჯერალდის რომანი 5-ჯერ იყო ეკრანიზებული, მაგრამ 2013 წელს ბაზ ლურმანის გადაღებული ფილმი განსაკუთრებულად კარგი აღმოჩნდა. რთული სათქმელია, კონკრეტულად რისი დამსახურებაა ეს: მთავარ როლში ლეონარდო დიკაპრიოს გამოჩენის, თუ ძვირადღირებული სპეცეფექტების. ფილმმა ოსკარი საუკეთესო კოსტიუმების დიზაინისთვის და საუკეთესო მხატვრული გაფორმებისთვის მიიღო.

7. ნათლია

ფრენსის ფორდ კოპოლას ფილმი, რომელიც მარიო პიუზოს ნაწარმოების მიხედვთაა გადაღებული, უდიდეს განგსტერულ ფილმადაა აღიარებული. ის სიცილიის მაფიოზური ოჯახის, კორლეონეს ცხოვრების ისტორიას მოგვითხრობს. ფილმმა სამი ოსკარი მიიღო, მათ შორის ოსკარი საუკეთესო მსახიობი კაცისთვის, მაგრამ მარლონ ბრანდომ უარი თქვა მასზე ინდიელთა უფლებების დასაცავად.

8. მექანიკური ფორთოხალი

 

ეს არის ენტონი ბერჯესის ანტიუტოპიური რომანი, რომელიც ადამიანების აგრესიის არსზეა, რომელთაც ციხეც კი ვერ გამოასწორებს. სტენლი კუბრიკმა ფილმის გადაღება მაშინვე ვერ გაბედა, მაგრამ გარკვეული პერიოდის შემდეგ შეიცვალა აზრი. ფილმმა 4 ოსკარის, 3 ოქროს გლობუსის და 7 ბრიტანეთის ფილმისა და სატელევიზიო ხელოვნების აკადემიის ნომინაცია მოიპოვა.

9. მწვანე გზა

მიუხედავად იმისა, რომ სტივენ კინგის ზედმეტი სახელი “საშინელებათა მეფეა”, “მწვანე გზაში” უფრო მისტიკა და გამოუვალი მდგომარეობაა, ვიდრე კოშმარი. ციხის ყოფილი ზედამხედველი პოლ ეჯკომბი, რომელსაც ფრენკ დარაბონტის ფილმში ტომ ჰენკსი ასრულებს, გვიყვება პატიმარ ჯონ კოფის ისტორიას, რომელსაც მაიკლ კლარკ დუნკანი განასახიერებს. სამწუხაროდ, ამ კეთილ ადამიანს უსამართლოდ მიუსჯიან სასიკვდილო განაჩენს. ფილმი ოსკარზე 4 კატეგორიაში იყო ნომინირებული.

10. გაქცევა შოუშენკიდან

სტივენ კინგის ნაშრომის კიდევ ერთი საკულტო ეკრანიზაცია, რომელიც ყველა დროის საუკეთესო ფილმებში ლიდერობას დღემდე ინარჩუნებს. ფილმის რეჟისორი კვლავ ფრენკ დარაბონტია და მისი ეს ნამუშევარი ოსკარზე 7 კატეგორიაში იყო ნომინირებული.