10 ფილმი რომელიც BIAFF2018-ზე აუცილებლად უნდა ნახოთ

nugo July 10, 2021

ბათუმის მე-13 კინოფესტივალი 16-23 სექტემბერს გაიმართება. ეს საერთაშორისო კინოფესტივალი 2006 წელს დაარსდა და მისი ორგანიზატორი ბათუმის ხელოვანთა სახლი “არგანია“. წარმოგიდგენთ იმ ათ ფილმს, რომელიც ჩვენი აზრით აუცილებლად უნდა ნახოთ ფესტივალზე. მოგვიანებით ფილმები net.adjaranet.com-ზეც დაიდება.

10. “დონბასი”, რეჟ: სერგეი ლოზნიცა, 2018; 110 წთ.

ჩვენების დრო: 19 სექტემბერი, 18.00 სთ. კინოთეატრი “აპოლო” (მ. აბაშიძის 17)

რუსი რეჟისორის ფილმი უკვე აჩვენეს კანის, მიუნხენის და ტორონტოს კინოფესტივალებზე. ფილმი ბათუმის კინოფესტივალზე მხატვრული ფილმების საკონკურსო სექციაში მონაწილეობს და ოქროს პრომეთეს მოსაპოვებლად იბრძოლებს.

9. “ექსტაზი“, რეჟ: გასპარ ნოე, 2018; 95 წთ.

ჩვენების დრო: 19 სექტემბერი, 20:30 სთ. კინოთეატრი “აპოლო” (მ. აბაშიძის 17)

ფრანგი რეჟისორის ნამუშევარმა კანის კინოფესტივალზე C.I.C.A.E ჯილდო მიიღო. ზოგიერთი მიმომხილველი იმასაც აღნიშნავდა, რომ ფილმი ნოეს შემოქმედებაში საუკეთესოა. ფილმი დიდოსტატთა კოლექციაში იქნება წარმოდგენილი.

8. “მოუსმინე სიჩუმეს”, რეჟ: მარიამ ჭაჭია, 2016, 80 წთ.

ჩვენების დრო: 20 სექტემბერი, 20:30 სთ. ღია კინოჩვენებები (ერას მოედანი)

ჭაჭიას ფილმს 2017 წელს ბელგრადის კინოფესტივალზე საუკეთესო სცენარის პრიზი გადაეცა. ფილმი ახალგაზრდა ბიჭზე მოგვითხრობს, რომელსაც სმენის პრობლემები აქვს, თუმცა სცენაზე გამოსვლა მაინც ძალიან უნდა. ფილმი ქართული პანორამას სექციით იქნება ნაჩვენები.

7. “ზაფხული”, რეჟ: კირილ სერებრენიკოვი, 2018; 126 წთ.

ჩვენების დრო: 21 სექტემბერი, 22.00 სთ. კინოთეატრი “აპოლო” (მ. აბაშიძის 17)

რუსი რეჟისორის ფილმის პრემიერა კანის კინოფესტივალზე შედგა, თუმცა ის პრემიერას ვერ დაესწრო, რადგან დაპატიმრებული იყო. ფილმი ლეგენდარულ მუსიკოსს, ვიქტორ ცოის ეხება, რომელიც რუსეთში 80-იან წლებში, ე.წ პერესტროიკის პერიოდში მოღვაწეობდა და რევოლუციური ტექსტებით გამოირჩეოდა. ამ ფილმს სპეციალური ჩვენებების ფარგელბში წარადგენენ.

6. “ცივი ომი“, რეჟ: პაველ პავლიკოვსკი, 2018; 88 წთ.

ჩვენების დრო: 20 სექტემბერი, 20.00 სთ. კინოთეატრი “აპოლო” (მ. აბაშიძის 17)

პოლონელი რეჟისორის ფილმი წელს მგონი ერთადერთი ფილმია, რომელიც ყველა არსებულ კინოფესტივალზე უჩვენეს. გამონაკლისი არც ბათუმის კინოფესტივალია. ფილმს სექცია დიდოსტატთა კოლექციაში ნახავთ, ისევე როგორც მომდევნო ფილმს.

5. “ადამიანი, სივრცე, დრო და ადამიანი“, რეჟ: კიმ კი დუკი, 2018; 122 წთ.

ჩვენების დრო: 18 სექტემბერი, 22.30 სთ. კინოთეატრი “აპოლო” (მ. აბაშიძის 17)

კორეელი რეჟისორის სახელი წელს მოძრაბა #MeToo ჰეშთეგში გაჟღერდა. შეიძლება სწორედ ამიტომაც მისი ბოლო ნამუშევარი არცერთ მნიშვნელოვან კინოფესტივალზე იქნა ნაჩვენები ბერლინალეს გარდა, თუმცა ქართველ მაყურებელს ეს კორეელი რეჟისორი განსაკუთრებულად უყვარს.

4. “ჰორიზონტი”, რეჟ: თინათინ ყაჯრიშვილი, 2018; 105 წთ.

ჩვენების დრო: 22 სექტემბერი, 20.30 სთ. კინოთეატრი “აპოლო” (მ. აბაშიძის 17)

ყაჯრიშვილი ერთადერთი ქართველია წელს რომელიც მთავარ საკონკურსო სექციაშია წარმოდგენილი. ვუსურვებთ მას ბიაფზე წარმატებას.

3. “სტიქსი”, რეჟ: ვოლფგანგ ფიშერი, 2018; 90 წთ.

ჩვენების დრო: 21 სექტემბერი, 20.00 სთ. კინოთეატრი “აპოლო” (მ. აბაშიძის 17)

გერმანელი რეჟისორის ფილმი ასევე საკონკურსო სექციაშია წარმოდგენილი. ფილმი დღევანდელი ევროპის პრობლემას, ემიგრანტების თემას ეხმაურება.

2. “მარილი სვანეთს”, რეჟ: მიხეილ კალატოზიშვილი, 1930; 44 წთ.

ჩვენების დრო: 19 სექტემბერი, 22.30 სთ. ღია კინოჩვენებები (ერას მოედანი)

ეს საოცარი დოკუმენტური ფილმი დიდ ეკრანზე აუცილებლად უნდა ნახოთ. ფილმს ქართული კინოს 110 წლისთავის აღსანიშნად აჩვენებენ.

1. “ველური მსხლის ხე“, რეჟ: ნური ბილგე ჯეილანი, 2018; 188 წთ.

ჩვენების დრო: 17 სექტემბერი, 22.30 სთ. კინოთეატრი “აპოლო” (მ. აბაშიძის 17)

თურქი რეჟისორის ბოლო ნამუშევრის გარეშე ბათუმის საავტორო კინოს ფესტივალი ნამდვილად წარმოუდგენელია. სამსაათიანი ფილმი წელს კანის მთავარ საკონკურსო სექციაში მონაწილეობდა, ჩვენთან კი დიდოსტატთა კოლექციაში იქნება წარმოდგენილი.

Tags