მოკალათდით და მიუძღვენით დედის დღე ამ ფილმებს დედასთან ერთად.

მისის დაუთფაიერი

გაიცანით ყველაზე სასაცილო ძიძა – რობინ უილიამსი. ფილმი, რომელიც ხმამაღლა გაცინებთ და სასიამოვნო ემოციებით აგავსებთ. ფილმი იკვლევს ისეთ მომენტებს, თუ რას და რატომ აკეთებენ მშობლები ბავშვებისთვის.

დედინაცვალი

კრის კოლუმბუსის ემოციური ფილმი, რომელიც სასიკვდილოდ ავადმყოფი დედის და იმ ქალის ისტორიას მოგვითხრობს, რომელიც მისი შვილების დედინაცვალი გახდება. ისევე, როგორც წინა ფილმის შემთხვევაში, ამ ფილმმაც შეიძლება გამოიწვიოს გულახდილი საუბარი, მაგრამ, ალბათ, უფრო ემოციური…

მამა მია!

ნებისმიერი დედისთვის, რომელიც ჯგუფ ABBA-ს თაყვანისმცემელია, ამ ფილმზე უკეთესს ვერაფერს შეარჩევთ. მოქმედება საბერძნეთის კუნძულზე ხდება და ისტორია 70-იანი წლების პოპულარული ჯგუფის სიმღერებით არის მოთხრობილი: ახალგაზრდა სოფი თხოვდება და დედის გაუფრთხილებლად ნამდვილი მამის მოძებნას ცდილობს. ეს ისტორია გაგახსენებთ, რომ ხანდახან მშობლები ყველაფერს არ უყვებიან შვილებს. ვინ იცის, იქნებ ეს ფილმი თქვენი გულახდილი საუბრის წინაპირობაც გახდეს.

უხილავი მხარე

ეს ფილმი რწმენას დაგიბრუნებთ ადამიანებში. ის უსახლკარო მოზარდი ბიჭის რეალურ ისტორიას ეფუძნება, რომელიც ოჯახმა აიყვანა, მოუარა და მათი დახმარებით ის ამერიკის ეროვნული ლიგის ფეხბურთელი გახდა.

ჯული და ჯულია

ეს ფილმი გურმანი დედებისთვის იდეალურია. ის ორი ქალბატონის ნამდვილ ისტორიაზეა. ორივე მათგანი წერდა მოგონებებს საკუთარ ცხოვრებაზე. ისინი დროში და სივრცეში არიან დაცილებული, ორივე გარკვეული ცვლილების წინაშეა… ერთხელაც აღმოაჩენენ, რომ ვნების, უშიშრობის და კარაქის სწორი კომბინაციით ყველაფერი შესაძლებელია.

ფოლადის მაგნოლიები

ლუიზიანას შტატის პატარა ქალაქში ტრუვი სილამაზის სალონის მფლობელია. ფილმში მოთხრობილია აქ მცხოვრები ექვსი ქალბატონის საოცარი ისტორია. ფილმი სავსეა სახალისო ფრაზებით და ისეთ ვარსკვლავურ სამსახიობო შემადგენლობას მოიცავს, როგორებიც არიან შირლი მაკლეინი, სელი ფილდი, ჯულია რობერტსი და სხვა.

ნაცრისფერი ბაღები

კიდევ ერთი ფილმი, რომელიც რეალურ მოვლენებზეა დაფუძნებული. მსახიობები განასახიერებენ ჟაკლინ კენედი-ონასისის ორ ექსცენტრიულ ნათესავს, რომლებიც აღმოჩნდნენ საყოველთაო ყურადღების ცენტრში.

მუსიკის ჰანგები

ყოფილი გემის კაპიტანი, ბარონ ფონ ტრაპი, ამჯერად ქვრივი თავის შვიდ შვილთან ერთად ზალცბურგის მახლობლად ცხოვრობს. სახლში დისციპლინა და წესრიგი სუფევს, მაგრამ ის მაინც გადაწყვიტავს ბავშვებს აღმზრდელი დაუქირაოს. ლამაზი სიმღერებით გაჯერებული ფილმი ძიძაზე, რომელიც  შვიდი ბავშვის დედა გახდება…

პირველი ცოლების კლუბი

სახალისო და მარტივი საყურებელი ფილმი სამ განქორწინებულ ქალზე, რომლებსაც შეუდარებელი დაიან კიტონი, ბეტ მიდლერი და გოლდი ჰოუნი ასრულებენ. მათ სურთ შური იძიონ ქმრებზე, რომლებმაც ისინი უფრო ახალგაზრდა ქალებში გაცვალეს.

უცნაური პარასკევი

ყველა მოზარდის მსგავსად, ლინდსეი ლოჰანის 15 წლის გმირსაც აქვს უთანხმოება დედასთან. მას სძულს მისი საქმრო. ამ ფილმის ყურება სახალისო იქნება, როგორც თქვენს დედებთან, ისე შვილებთან ერთადაც.