10 ფილმი, რომელსაც თქვენს ოთხფეხა მეგობრებთან ერთად უნდა უყუროთ

nugo July 11, 2021

არეული სახლი, დაფლეთილი ფეხსაცმელი, უძილო ღამეები. ყველას, ვისაც სახლში ოთხფეხა მეგობარი ყავს გულიანად გაიღიმებს და თავს თანხმობის ნიშნად გააქნევს ამ ჩამონათვალის კითხვისას, რადგან აუცილებლად გამოვლილი აქვს ყოველივე ზემოთჩამოთვლილი.

თუმცა, იმაშიც დაგვეთანხმებით, რომ ის სიყვარული, რომელსაც ჩვენი შინაური ცხოველები გვჩუქნიან ყველანაირ დისკომფორტს გვავიწყებს. ისინი  ჩვენთვის ცხოვრებასაც, საყვარელ ძვალსაც და სათამაშოსაც დათმობენ. რთული, გრძელი დღის შემდეგ, როგორი ბედნიერებაა სახლში რომ ერთგული მეგობარი გელოდება, რომელსაც ყურადღება ძალიან სჭირდება.

ჩვენ შეგირჩიეთ 10 ფილმი, რომელსაც აუცილებლად თქვენს ოთხფეხა მეგობართან ერთად  ერთად უნდა უყუროთ.

ბეთჰოვენი 

კომედია, რომელიც გვიყვება ერთი ოჯახის, უზარმაზარი სენბერნარის და ბევრი პატარა ლეკვის ისტორიას. წლების განმავლობაში ფილმის ბევრი ნაწილი გამოვიდა, რადგან მისი ყურების შემდეგ გულგრილი ვერავინ დარჩება. ბევრი დორბლიანი დრუნჩი და დაუმთავრებელი თავგადასავალი, აი რას გვპირდება ეს ფილმი.

მარლი და მე

გულისამაჩუყებელი ფილმი, მსოფლიოში ყველაზე მოუსვენარი ძაღლისა და მისი პატრონის მეგობრობის შესახებ. წყვილი საცხოვრებლად ფლორიდაში გადადის, იქ სახლში ძაღლს მოიყვანს და მათი მხიარული ცხოვრებაც მაშინ დაიწყება. ეს სასაცილო ლაბრადორი კი მაყურებელს სიგიჟემდე შეაყვარებს თავს, თავისი მოურჯუულებელი ხასიათითა და მუდმივი ოინებით. წინასწარ გაფრთხილებთ, მოიმარაგეთ ცხვირსახოცები!

ზოოპარკის მფლობელის ცოლი

ეს საკმაოდ მძიმე ფილმი, არის ომზე, სიკეთესა და ბოროტებაზე, კაცობრიობის ტკივილზე და ადამიანობაზე, რომელიც ხშირად იკარგება ხოლმე. ფილმის მოქმედება პოლონეთში ვითარდება, სადაც ფაშისტური გერმანია უკვე იწყებს თავისი ბოროტების ფესვების გადგმას. ზოოპარკის მფლობელის ცოლი კი ჰუმანურობას გამოიჩენს და ებრაელებს თავშესაფარს მისცემს. ცხოველების სიყვარული მარტივია, რადგან მათ თვალებში მაშინვე ჩანს ის თუ რას გრძნობენ. ადამიანების შემთხვევაში, საქმე უფრო რთულადაა…

საუზმე ტიფანისთან

ფილმები ძაღლებზე უკვე გავიხსენეთ და კიდევ რამდენიმეს შემოგთავაზებთ, მაგრამ ამჯერად დრო კატებს დავუთმოთ. ეს ფილმი ერთი ულამაზესი გოგოს ისტორიას გვიამბობს, რომელსაც ოდრი ჰეპბერნი თამაშობს. ის მდიდარ კაცს ელოდება, რომელიც ყველა კაპრიზს აუსრულებს და იქამდე სანამ მას იპოვის, თავისი ერთგული თანამეგზური სწორედ კატა იქნება.

ფავორიტი

იცოდით, რომ ცხენები, მსოფლიოში ერთ-ერთი ყველაზე ერთგული ცხოველები არიან? ტობი მაგუაერს კი მათი გახედვნა ეხერხება. ფილმის ყურებისას ჭეშმარიტი მეგობრობის, პრობლემების გადალახვის, ამაღლებული სულისკვეთების, პატიოსნების და ბევრი ადამიანური სისუსტის მოწმენი ვხდებით. მთავარია არ დანებდე! ფილმის ნახვის შემდეგ ეს ფრაზა ხშირად ამოგიტივტივდებათ გონებაში.

წვეულება 2: ვეგასიდან ბანკოკში

ამჯერად წვეულებამ ვეგასიდან ბანკოკში გადაინაცვლა და 3 მეგობარს კიდევ ერთი მაიმუნი შეემატა, რამაც მაყურებლები აღაფრთოვანა. ფილმი ისევ ისეთი სასაცილო და ჩამთრევია, უბრალოდ ახლა ეკრანზე საყვარელი არსება დარბის და ყველაფერს ახალისებს. სამი მეგობარი ისევ ისეთ უხერხულ სიტუაციაშია, როგორც წინა ფილმში, ამიტომაც ცხოველი ფილმის ნათელი წერტილია.

ლილო და სტიჩი

მიუხედავად იმისა, რომ ლილოს უცნაური მეგობარი სტიჩი არც კატაა, არც ძაღლი და არც სხვა რაიმე ჩვენთვის ნაცნობი ცხოველი, ის მაინც საუკეთესო საჩუქარია ლილოსთვის. საქმე იმაში კი არაა, თუ 6 ფეხი გაქვს, გარშემო ყველაფერს აფუჭებ, მოუქნელი ხარ თუ საერთოდ კოსმოსიდან ჩამოვარდი. არა, მთავარი მხოლოდ ისაა, რომ ოჯახის ნაწილი ხარ, ეს კი იმას ნიშნავს, რომ არასდროს მიგატოვებენ და ყოველთვის ეყვარები.

რაღაც

თქვენ და თქვენს ოთხფეხა მეგობარს თუ საშინელებათა ფილმები გიყვართ, მაშინ ეს ნამდვილად სათქვენო რამ არის.  ბევრი ჰასკი ამ ფილმს საყვარლობას არ მატებს. ერთადერთი რისი თქმაც შეგვიძლია – ჰასკები ამიერიდან საყვარლები აღარ არიან ! დანარჩენს თქვენით ნახავთ  და მიხვდებით.

გარფილდი

თუ თქვენს სახლშიც კატებსა და ძაღლებს შორის გაუთავებელი ომი მიდის, და ვერ ხვდებით, როგორც შეარიგოთ ისინი, მაშინ იქნებ ერთი საღამო დასვათ, აყურებინოთ “გარფილდი” და ამით მაინც რამე შეაგნებინოთ?! თან თქვენც იხალისებთ სასაცილო ისტორიის ყურებისას. მსუქანი კატა, რომელიც ყველასათვის საყვარელ პერსონაჟად იქცა და მისი ცხოვრების კრედოც რომ არ დაგავიწყდეთ : “მაჭამე. გიყვარდე. არასდროს მიმატოვო.”

ისტორია ძაღლ ჰაჩიკოზე

რა თქმა უნდა… ეს ფილმი სულ რომ 100-ჯერ გქონდეთ ნანახი, მაინც ხელახლა უნდა ნახოთ. სევდიანი ისტორია, მსოფლიოში ყველაზე ერთგულ ძაღლზე აუცილებლად აქვითინებულს დაგტოვებთ. რიჩარდ გირისა და ჰაჩიკოს მაგიური, აუხსნელი ურთიერთობა სუნთქვას შეგიკრავთ და კიდევ დიდი ხანი უცნაურ და სევდიან ხასიათზე გამყოფებთ. რიჩარდ გირისა და გენიალური ძაღლის გარდა, ფილმის ერთ-ერთი საუკეთესო ნაწილი მისი მუსიკალური გაფორმებაა.

ჩვენ ძალიან ვეცადეთ თქვენთვის და თქვენი ოთხფეხა მეგობრისთვის საუკეთესო ფილმები აგვერჩია და ყველანაირი გემოვნება გაგვეთვალისინებინა, რომ ერთმანეთში არ გეკამათათ. აბა, სასიამოვნო საღამოს გისურვებთ