10 ფილმი, რომელშიც დიალოგებს გადამწყვეტი ადგილი უჭირავს

nugo July 10, 2021

ფილმები, რომელშიც მსახიობებს საინტერესო, დამაფიქრებელი დიალოგები აქვთ, დიდად ფასობს. სწორად შერჩეული დიალოგები განსაკუთრებულ ხიბლს მატებს სურათს და მაყურებელს განსაკუთრებით ამახსოვრდება ის.

დღეს გადავწყვიტეთ, დიალოგებით გამორჩეული ფილმები შეგვეგროვებინა. წარმოგიდგენთ ათ ფილმს, რომელშიც დიალოგებს უმნიშვნელოვანესი ადგილი უჭირავს.

1. იდეალური უცნობები

ფილმი მოგვითხრობს მეგობრების ჯგუფზე, რომლებიც ერთ საღამოს, ერთად შეკრებისას გადაწყვეტენ, ერთმანეთს გაუზიარონ ყველა შეტყობინება თუ მეილი, რასაც მიიღებენ, ტელეფონზე შემოსულ ზარებს კი სპიკერზე უპასუხონ. მთელი ალიაქოთიც სწორედ აქ იწყება. ამ ემოციებით სავსე ფილმში დიალოგები უმთავრესია.

პეპე: ევა, როგორ უნდა მიხვდე, რომ შეყვარებული ხარ?

ევა: მე რატომ მეკითხები?

პეპე: შენ სწავლობ ასეთებს.

ბიანკა: მე გეტყვი: თუ მასზე დღეში 30 წუთს მაინც ლაპარაკობ, ესე იგი, შეყვარებული ხარ.

პეპე: და თუ 60 წუთს ვლაპარაკობ?

კარლოტა: მაშინ სიგიჟემდე შეყვარებული ხარ.

ლელე: თუ მასზე ლაპარაკს წყვეტ, ესე იგი, უკვე დაქორწინებული ხარ.

2. ყავა და სიგარეტი

ფილმს მარტივი სიუჟეტი აქვს: 11 ნოველის გმირები კამათობენ, ხუმრობენ, ბრძნულად საუბრობენ, ფილოსოფოსობენ და ეს ყველაფერი ყავისა და სიგარეტის ფონზე. ჩინებულად შერჩეული მსახიობები და დიალოგები ფილმს განსაკუთრებულ ხიბლს ანიჭებს.

სტივი: ჩემი ნომერი ბევრი გამოჩენილი ადამიანისთვის არ მიმიცია. არც სემ მენდესისთვის, ასე რომ, კარგ კომპანიაში ხარ.

ალფრედი: აჰა. თუ სემ მენდესისთვის კარგი კომპანიაა, ესე იგი, ჩემთვისაც კარგი ყოფილა.

3. მშვიდობიანი მებრძოლი

მთავარი გმირი – ნიჭიერი გიმნასტი, რომელსაც თითქოს ყველაფერი აქვს: ჯილდოები, მეგობრები, გოგონები და თავაშვებული წვეულებები, გარკვეულ მომენტში ერთ ადამიანს შეხვდება და სხვაგვარად აზროვნებას იწყებს. ცხოვრების არსზე ფიქრდება.

ცხოვრებას სამი მთავარი წესი აქვს: პარადოქსი, იუმორი და ცვლილება.

პარადოქსი: ცხოვრება მისტერიაა და მის ამოსახსნელად დრო არ უნდა დაკარგო.

იუმორი: შეინარჩუნე იუმორის გრძნობა, განსაკუთრებით საკუთარი თავის მიმართ. ეს ყველანაირი წნეხის საწინააღმდეგო ძალაა.

ცვლილება: იცოდე, რომ არასდროს არაფერი რჩება იგივე.

4. ტელეფონის ჯიხური

მთავარი გმირი მანიაკი სნაიპერის ხაფანგში ებმება: სატელეფონო ჯიხურში სიკვდილის შიშით გამომწყვდეულს არ შეუძლია ყურმილი დაკიდოს. როგორ უნდა გადარჩე ამ საშინელ თამაშში? მთლიანი ფილმი დაძაბულობითაა მოცული და რასაკვირველია, დიალოგები გადამწყვეტია.

[პერსონაჟი ურეკავს სტიუს მეგობარ გოგონა პემს]

პამელა მაკფედენი: ჰეი, ვინ ხართ?

ხმა ტელეფონში: სტიუს მეგობარი. და მას ჩემნაირი ბევრი არ ჰყავს.

პამელა მაკფედენი: იცნობთ სტიუს?

ხმა ტელეფონში: ვიცი, რომ ის იტყუება.

5. მზის ჩასვლიდან განთიადამდე

ორი ყაჩაღი ძმა, რომლებიც პოლიციელებს გაურბიან, მძევლად მღვდელს და მის შვილებს იყვანენ, შემდეგ კი გზისპირა ბარში აფარებენ თავს. ამ საკულტო ფილმში, რომელიც რობერტ როდრიგესმა კვენტინ ტარანტინოს სცენარით გადაიღო, დიალოგები სიუჟეტის მნიშნელოვან ნაწილს წარმოადგენს.

სანტანიკო პანდემონიუმი: დღეიდან მონობაში იქნები.
რიჩარდ გეკო: არა, გმადლობ, უკვე ცოლიანი ვარ.

6. ოთხი ოთახი

ოთხი ნოველისაგან შემდგარი ფილმის სიუჟეტი, რომელიც მთავარ გმირს – მეკორიდორე ტომს უკავშირდება, ექსცენტრული გმირებითა და ამბებითაა სავსე. ფილმში უხვადაა ხუმრობები და შესანიშნავი დიალოგები, რომლებითაც შავი იუმორის მოყვარულები დიდად ისიამოვნებენ.

მეკორიდორე ტომი: ისეთ სიტუაციაში ვარ, არც კი ვიცი, საიდან დავიწყო.

7. თქვენთვის წერილია

ჯომ და კეტლინმა ერთმანეთი ინტერნეტით გაიცნეს და ურთიერთსიმპათიებიც გააჩნიათ, თუმცა რეალობაში ისინი ბიზნესმეტოქეები არიან. მათი მიმოწერა და ურთიერთობა ფილმის მთავარი ხიბლია.

კეტლინ კელი: მიყვარს გვირილები.
ჯო ფოქსი: უკვე მითხარი.
ჯორჯ პაპასი: ისინი ისეთი მეგობრულები არიან. არ ფიქრობ, რომ გვირილა ყველაზე მეგობრული ყვავილია?

8. აგური

ბრენდანის უღიმღამო ცხოვრებაში უეცრად გამოჩნდება და შემდეგ გაუჩინარდება გოგონა. მისი ადგილმდებარეობის დადგენას ბიჭი ყველანაირი ძალებით ცდილობს. საინტერესო დეტექტივი, რომელიც ბოლომდე ინარჩუნებს დაძაბულობას, ჭკვიანური დიალოგებით გამოირჩევა.

ბრენდან ფრაი: სიგარეტი გაქვს?

ტუგერი: არ ვეწევი.

ბრენდან ფრაი: დაგინახე, რომ ეწეოდი.

ტუგერი: სიგარეტს არ ვეწევი.

9. ზოდიაქო

დევიდ ფინჩერის ეს თრილერი ჩადენილი დანაშაულის რეალურ მასალებს ეყრდნობა – ეს ერთ-ერთი ყველაზე დამაინტრიგებელი, გაუხსნელი საქმეა ამერიკაში. “ზოდიაქო” მოგვითხრობს სერიულ მკვლელზე, რომელიც შიფრებითა და წერილებით პოლიციას თავგზას უბნევს. ფსიქოლოგიური ზემოქმედება, სიტყვებით თამაში – დიალოგებს მართლაც მნიშვნელოვანი დატვირთვა აქვთ.

რობერტ გრეისმითი: პოლ, კარგად ხარ?

პოლ ეივერი: არა… მაგრამ გმადლობ, რომ მკითხე.

10. უკეთესი არ არსებობს

ექსცენტრული და ახირებული ხასიათის მწერალი მელვინი ფაქტობრივად ვერავის იტანს. თუმცა ოფიციანტი კეროლის გაცნობის შემდეგ მისი ცხოვრება და ჩვევები თანდათანობით იცვლება. მსახიობებმა ამ ფილმში წარმატებით გახსნეს საკუთარი პერსონაჟის ხასიათი, თითოეული დიალოგი კი სწორად შერჩეული და დროულია.

მელვინ უდალი: შენთვის დიდებული კომპლიმენტი მაქვს. მართლა.

კეროლ კონელი: ვშიშობ, რომ რაღაც საშინელებას მეტყვი.

მელვინ უდალი: ნუ იქნები პესიმისტი, შენი სტილი არაა.