10 ფილმი სიყვარულზე და მასთან დაკავშირებულ სირთულეებზე

nugo July 10, 2021

ცხოვრებაში ყველას ერთხელ მაინც, აუცილებლად გვიყვარდება. სიყვარულს, ისევე როგორც ყველა ამბავს, ორი მხარე აქვს. ბედნიერებასთან ერთად, უბედურების მოტანაც შეუძლია, სიხარულთან, აღტკინებასთან და მუცელში პეპლებთან ერთად, თან ბევრი სირთულეც დაჰყვება და საბოლოო ჯამში სიყვარული – ერთი დიდი გამოწვევაა.

დღევანდელ კოლექციაში გთავაზობთ ფილმებს სიყვარულზე, წარმოუდგენელ ამბებს, უამრავ დაბრკოლებებს და ბრძოლას ამ გრძნობის გადასარჩენად.

ლოლიტა (1997)

სიყვარული ამ ისტორიაში, როგორც იცით, პირობითია, მაგრამ ამ სიაში ყოფნას, რა თქმა უნდა, იმსახურებს. ეს არის ლოლიტას ბევრისთვის კარგად ნაცნობი ეკრანიზაცია, რომელშიც გუმბერტს ჯერემი აირონსი ასრულებს, ლოლიტას დედას კი – მელანი გრიფიტი. ედრიან ლაინის ვერსიის ნახვის შემდეგ, ძალიან რთულია კუბრიკის “ლოლიტას” აღქმა, იმდენად განსხვავდებიან ერთმანეთისგან. ლაინის ვერსია ერთდროულად ტრაგიკული და მხიარული გამოვიდა. ცნობილია, რომ ლოლიტას როლი ნატალი პორტმანს უნდა შეესრულებინა, მაგრამ მშობლებმა და მათმა რელიგიურმა შეხედულებებმა არ მისცეს უფლება გოგონას ეს როლი შეესრულებინა. როგორც ჩანს, მათ გადაწყვიტეს, რომ სამაგალითო ებრაელი გოგონასთვის “ლეონიც” საკმარისია. ფილმი საკმაოდ ბევრ სირთულეს შეხვდა გაქირავებასთან დაკავშირებით, თუმცა უნდა ვაღიაროთ, რომ დღეს ერთ-ერთ კინოკლასიკად ითვლება.

თარგმანში დაკარგულები (2003)

ყველაზე კარგი და ყველაზე ლამაზი ფილმი მარტოობაზე. ბილ მიურეის და სკარლეტ იოჰანსონის პერსონაჟები ერთმანეთს შორეულ ტოკიოში ხვდებიან და განიცდიან იმას, რასაც მარტივად ვერ გადმოსცემ. ისინი უცნობ მეგაპოლისში მოძრაობენ ისე, თითქოს სიზმარში არიან. ამავე სიზმარში იცნობენ ერთმანეთს და ერთხელ შეხვედრილები, უკვე ვეღარასდროს ივიწყებენ ნერთმანეთს. სოფია კოპოლას ფილმში, რომელიც ოსკარის ოთხ კატეგორიაში იყო ნომინირებული და ქანდაკება საუკეთესო ორიგინალური სცენარისთვის მიიღო, მსახიობების არაჩვეულებრივი შესრულება უნდა აღინიშნოს. ოთხი ნომინაციიდან ერთ-ერთში სწორედ ბილ მიურეი იყო წარდგენილი საუკეთესო მსახიობი კაცისთვის.

აკვარიუმი (2009)

კეტი ჯარვისის სადებიუტო როლი, რომელმაც 15 წლის რთულად აღსაზრდელი მოზარდი მია ითამაშა. მიას მეგობრები არ ჰყავს, თანატოლებთან მუდმივი კონფლიქტი აქვს, სკოლიდანაც კი გარიცხეს და ერთადერთი რაც ახალისებს – ცეკვაა. ისტორიის გარდამტეხ მომენტად მიას დედის ახალი ბოიფრენდი იქცა, რომელსაც მაიკლ ფასბენდერი ასრულებს, რომლის გამოჩენის შემდეგაც ახალგაზრდა მეამბოხის ცხოვრება გარკვეულწილად იცვლება. უნდა აღინიშნოს, რომ ეს ფასბენდერის ერთ-ერთი პირველი შესამჩნევი როლი იყო.

ამერიკული სილამაზე (1999)

ეკრანებზე გამოსვლის შემდეგ “ამერიკულმა სილამაზემ” უამრავი ადამიანის გული მოიგო, მათ შორის კინოაკადემიის, რადგან სემ მენდესის ფილმმა ხუთი ოსკარი დაისმახურა, რომელთაგან ერთ-ერთი კევინ სპეისიმ საუკეთესო მსახიობი კაცისთვის მიიღო. მისი პერსონაჟი შუა ხნის ასაკის კრიზისს განიცდის, რომელსაც ცოლი აღიზიანებს, სამსახური ეზიზღება, ქალიშვილი ნელ-ნელა ხელიდან ეცლება და ამ ყველაფერს ის ემატება, რომ ქალიშვილის საუკეთესო მეგობარი უყვარდება…

უკანასკნელი ტანგო პარიზში (1972)

ბერნარდო ბერტოლუჩის ეროტიკული დრამა, რომელიც თავდაპირველად მაყურებელმა მალვით და შიშით იხილა. მარლონ ბრანდოს გმირი ზრდასრული ქვრივია, რომელიც ახალგაზრდა ექსცენტრიულ გოგოს ხვდება, მისი გაცნობის მიზეზი კი, სექსი სულაც არაა. მათი ურთიერთობა ანონიმურობის პირობით გრძელდება. ფილმის შექმნის პროცესი ლეგენდებით და ანეგდოტებით არის მოცული, თავად მსახიობებს გადაღებებზე საუბარი არ უყვარდათ. ცნობილია, რომ ფილმის გადაღებების შემდეგ ბრანდო და ბერტოლუჩი 15 წელი არ ლაპარაკობდნენ. ბრანდო ოსკარზე საუკეთესო მსახიობი მამაკაცისთვის, ბერტოლუჩი კი საუკეთესო რეჟისორისთვის იყვნენ ნომინირებულები.

კურსდამთავრებული (1967)

ფილმი, რომელიც დასტინ ჰოფმანის კარიერის ტრიუმფად იქცა. ჰოფმანის პერსონაჟმა კოლეჯი დაამთავრა და მშობლების სახლში ბრუნდება, სადაც მისის რობინსონს, ზრდასრულ გათხოვილ ქალს ხვდება, რომელსაც ენ ბენკროფტი ასრულებს. ქალი მას გაცილებას სთხოვს, დალევას სთავაზობს და ორაზროვან საუბარს იწყებს. ძალიან მალე კი ყველაფერი სასიყვარულო რომანში გადაიზრდება…ფილმი სავსეა დასამახსოვრებელი ციტატებითა და ეპიკური კადრებით, რომელიც მაყურებელს დღემდე არ ავიწყდება. მაიკ ნიკოლსმა ოსკარი საუკეთესო რეჟისორისთვის მიიღო.

მანჰეტენი (1979)

ბევრი კრიტიკოსის თქმით, ეს ვუდი ალენის საუკეთესო ფილმია. რეჟისორმა მასში მთავარი გმირის როლიც თავად შეასრულა: ისტორია 42 წლის ორჯერ განქორწინებული ისააკ დევისზე მოგვითხრობს, რომელიც ქალებისადმი სიპათიაში არეული და ჩამოუყალიბებელია. ამ ქალების სიაში კი 17 წლის სკოლის მოსწავლე ტრეისიცაა, რომელსაც მარიელ ჰემინგუეი ასრულებს. ყველა მოქმედება შავ-თეთრი მანჰეტენის ფონზე ხდება. ალენის ფილმი ოსკარის ორ კატეგორიაში იყო ნომინირებული: მარიელ ჰემინგუეი საუკეთესო მსახიობი ქალისთვის მეორეხარისხოვანი როლისთვის და ვუდი ალენი და მარშალ ბრიკმანი საუკეთესო ორიგინალური სცენარისთვის.

სკანდალური დღიური (2006)

ეს არის რიჩარდ ეირეს ფილმი, რომელიც მასწავლებლის და მოსწავლის სასიყვარულო ურთიერთობის საკითხს განიხილავს. სკოლის მასწავლებელი, რომლის როლსაც ქეით ბლანშეტი ასრულებს, თავისდა საუბედუროდ ურთიერთობას თხუთმეტი წლის მოსწავლესთან იწყებს. ეს ურთიერთობა, რა თქმა უნდა სადავოა, იმის გათვალისწინებითაც, თუ მთავარი გმირის ცხოვრების ზოგად სურათსაც ავღებთ: სახლში მას მეუღლე და ბავშვი ელოდება დაუნის სინდრომით, სამსახურში კი მისი გასაიდუმლოებული ურთიერთობის შესახებ ხანში შესული მასწავლებელი იგებს. ფილმი ოსკარის ოთხ კატეგორიაში იყო ნომინირებული.

გრძნობების აღზრდა (2009)

ლონე შერფიგის ემოციური ფილმი, რომელიც 16 წლის მოწყენილ მუსიკოსზე მოგვითხრობს, რომელსაც ქერი მალიგენი არაჩვეულებრივად ასრულებს. მალიგენის პერსონაჟი ოქსფორდის უნივერსიტეტის სტუდენტობაზე ოცნებობს, ამიტომ მთელ დროს მეცადინეობაში ატარებს. მაგრამ ყველაფერი მაშინ იცვლება, როდესაც გოგონა მდიდარ და დახვეწილ მამაკაცს ხვდება, რომლის როლსაც პიტერ სარსგარდი ასრულებს. ის გოგონაზე ორჯერ უფროსია, მისი გლამურული ცხოვრება კი ლათინურის ზუთხვაზე უფრო მიმზიდველად გამოიყურება, ამიტომაც ოქსფორდზე მეოცნებე, თავის მიზნებსა და მისწრაფებებში ირევა, გამოსავლის პოვნა კი, ისევ მასზეა დამოკიდებული… ფილმი ოსკარის სამ კატეგორიაში იყო ნომინირებული.

ჰაროლდი და მაუდი (1971)

თამამად შეიძლება ითქვას, რომ ეს ფილმი ჰოლივუდის კიდევ ერთი კლასიკაა. სიუჟეტი, თუ უხეშად მოვხაზავთ, ახალგაზრდა ბიჭის და სიცოცხლით სავსე ბებიის რომანტიკულ ურთიერთობას ეხება. ისე კი, “ჰაროლდი და მაუდი” აღიარებული შედევრი და უამრავი ადამიანისთვის საყვარელი ფილმია, მიუხედავად იმისა რომ ის ორი ადამიანი, რომელთა მეგობრობაც სიყვარულში გადაიზარდა, თავისუფლად შეიძლება ყოფილიყვნენ ბებია და შვილიშვილი. მთავარი როლის შემსრულებლები რუთ გორდონი და ბად კორტი ოქროს გლობუსზე საუკეთესო მსახიობი ქალისთვის და საუკეთესო მსახიობი კაცისთვის მიუზიკლსა ან კომედიაში იყვნენ ნომინირებულები.