10 ფილმი ჩარლზ ბუკოვსკის ფანებისთვის

nugo July 11, 2021

ერთ-ერთი გამორჩეული ავტორი ლიტერატურაში, რომელსაც ინდივიდუალური სტილი და რთული ცხოვრება ჰქონდა, რომელიც სოციალურ ნორმებს დასცინოდა და იშვიათი გულწრფელობით ხასიათდებოდა – ჩარლზ ბუკოვსკია. მის ფანებს ქვემოთ ჩამოთვლილი ათი ფილმი აუცილებლად მოგეწონებათ:

ფაქტოტუმი (2005)

ფაქტოტუმი

ჩვენ მივყვებით ახალგაზრდა, წარუმატებელი მწერლის ყოველდღიურობას, რომელიც ათასი საშინელი სამუშაოს შესრულებას გულისხმობს და ამის მიზეზი ისაა, რომ მთავარი გმირი საკუთარ ლიტერატურულ მისწრაფებას არ თმობს. ის საზიზღარ საქმეებს აკეთებს, იმისთვის, რომ წეროს.

უდარდელი ბაიკერი (1969)

უდარდელი ბაიკერი

ორი ჰიპი ბაიკერი ამერიკაში მოგზაურობს, მათ თავგადასავლებს კი დაუვიწყარი საუნდტრეკები აფორმებს. ჯეკ ნიკოლსონმა, რომელიც მთავარ როლს თამაშობს, მოგვიანებით თქვა: მახსენდება, უდარდელი ბაიკერის პირველი ჩვენება კანის კინოფესტივალზე. როდესაც დარბაზში ვიჯექი, უკვე ვიცოდი, რომ ეს ჩემი, როგორც კინოვარსკვლავის დაბადების მომენტი იყო…

ზაფრა და გულისრევა ლას-ვეგასში (1998)

ზაფრა და გულისრევა ლას-ვეგასში

მარიხუანა, კოკაინი, ტრანკვილიზატორები და ა.შ. – მთავარი გმირები გამუდმებით ნარკოტიკული ნივთიერებების ზეგავლენის ქვეშ იმყოფებიან. ჰანტერ ს. თომპსონის რომანის ეკრანიზაციამ შეიძლება მომენტებში დისკომფორტი შეგიქმნათ, მაგრამ დაუვიწყარ შთაბეჭდილებას დაგიტოვებთ.

მარკიზ დე სადის კალამი (2000)

მარკიზ დე სადის კალამი

ფილმი ჰედონისტი, შეშლილი მწერლის ცხოვრებაზე გვიყვება. რეჟისორი არ ცდილობს, ნამდვილი ისტორიის შემსუბუქებას. პირიქით, რეალობასთან მიახლოებულად აღწერს მოვლენებს, რომლებიც უსიამოვნო და ზოგჯერ – შემზარავია.

განტევების ვაცი (1976)

განტევებიც ვაცი

ფილმის მთავარ გმირს, რომელიც მოლარედ მუშაობს, ჰოლივუდის “შავ სიაში” შეყვანილი მეგობარი დახმარებას სთხოვს – გაასაღოს მისი სცენარი თავისად. ამ დიდი ტყუილით დაწყებულ ამბავში კი მთავარი გმირი საკუთარ ცხოვრებისეულ მისწრაფებას აღმოაჩენს.

დაბოლილები (1978)

დაბოლილები

მარიხუანას მოყვარულ დრამერს მშობლები პირობას წაუყენებენ, რომ თუ სამსახურს არ იშოვის, სამხედრო სკოლაში გააგზავნიან. ის კი, უბრალოდ, სახლიდან მიდის და ჰიჩჰაიკერი ხდება. ერთ-ერთი მძღოლი, რომელიც ჩაისვამს, ასევე მარიხუანას მოყვარულია და ისინი სრულიად გიჟურ თავგადასავალს წამოიწყებენ.

იდიოტები (1998)

იდიოტები

ლარს ფონ ტრიერის ფილმის მიზანი ილუზიაზე უარის თქმა და რეალობის მკაცრი ასახვაა. მისი გმირები თვლიან, რომ ყველა ადამიანი იდიოტია, უარს ამბობენ მოცემულ ნორმებზე და საკუთარი წესებით ცხოვრობენ.

ყოფის აუტანელი სიმსუბუქე (1988)

ყოფის აუტანელი სიმსუბუქე

მილან კუნდერას შესანიშნავი რომანის შესანიშნავი ეკრანიზაცია 1960-იანი წლების პრაღას აცოცხლებს. სიუჟეტი სასიყვარულო სამკუთხედის ირგვლივ ვითარდება და ცხოვრების მრავალფეროვან ასპექტებს – ყოფის აუტანელ სიმსუბუქეს გვიჩვენებს.

ნემსზე (1996)

ნემსზე

ირვინ უელშის რომანის ეკრანიზაცია, რომელიც ბუკოვსკის ფანებს ნამდვილად მოგეწონებათ, 1996 წელს გამოვიდა და საკულტო ფილმად იქცა. ნარკოტიკებზე დამოკიდებული ადამიანების ყოველდღიურობის, ყოველგვარი აზრისა და სურვილებისგან დაცლილი ყოფის რეალისტურმა ასახვამ დიდი როლი ითამაშა იმ დაავადების გაანალიზებაში, რასაც ნარკომანია ჰქვია.

სიმთვრალე (1987)

სიმთვრალე

ეს სურათი კი თავად ჩარლზ ბუკოვსკის ცხოვრების ფრაგმენტებს აცოცხლებს – იმედგაცრუებული ლოთი მწერლის, რომელიც საარსებო ლუკმა-პურს მუშტი-კრივით შოულობს.