10 ფილმი ძლიერ ქალებზე

nugo July 10, 2021

დღევანდელი კოლექცია ძლიერ ქალებს ეძღვნება, რადგან დროდადრო ყველას გვჭირდება გრანდიოზული წარმატებების, ან სირთულეებზე პატარ-პატარა გამარჯვებების ნათელი მაგალითები.

ამ ფილმის გმირები იწყობენ კარიერას, მიჰყვებიან თავიანთ ოცნებებს, იბრძვიან თავიანთი ადგილისთვის და ეძებენ სიყვარულს. არ არის საჭირო თითოეული მათგანის მისაბაძ მაგალითად აღქმა, მაგრამ ეს ქალბატონები საინტერესოები იმითი არიან, რომ სუსტი სქესის და მამაკაცზე დამოკიდებულების სტერეოტიპებს ანგრევენ.

ჯოი (2015)

დევიდ ო. რასელის ფილმი ორი შვილის დედაზე – ჯოიზე მოგვითხრობს, რომელიც მატერიალური პრობლემებითაა გადაღლილი. ამ პრობლემების გადალახვის მცდელობებში ჩაფლულს, გადაავიწყდა თავისი გამომგონებლური ნიჭის შესახებ, რომელიც ჯერ კიდევ ბავშვობაში გამოავლინა. ფილმის სცენარს საფუძვლად ჯოი მანგანოს, მარტოხელა დედის ისტორია უდევს, რომელმაც თვითგამწური იატაკის მოსაწმენდი ჯოხი-საოცრება გამოიგონა. საბოლოო ჯამში ის ქვეყნის ერთ-ერთი ყველაზე წარმატებული მეწარმე გახდა. ჯენიფერ ლოურენსი ჯოი მანგანოს როლისთვის ოსკარზე საუკეთესო მსახიობი ქალისთვის იყო ნომინირებული.

სუფრაჟისტები (2015)

სუფრაჟისტები –  ისინი არ არიან უბრალოდ ექსტრემისტულად განწყობილი ქალები, რომლებიც მაღაზიის ვიტრინებს ქვებს უშენენ. ისინი ჩვეულებრივი ქალები არიან, საყვარელი მეუღლეები და დედები, ვიღაცის ქალიშვილები. მათ მხოლოდ პომპეზური საკითხები არ ადარდებთ აბსტრაქტულ თანასწორობაზე, არამედ პრობლემებიც, რომლებსაც ყოველდღიურად ხვდებიან: შეუძლებლობა, თავი დაიცვან სექსუალური თუ ფიზიკური ძალადობისგან; არ ჰქონდეთ მამაკაცებთან შედარებით ნაკლები სახელფასო ანაზღაურება იმავე გაწეულ სამსახურში; საკუთარ შვილზე უფლების არქონა. მიზნისთვის, რომელიც იმ წლებში მიუღწეველი ჩანდა და ადამიანებში მხოლოდ დაცინვას იწვევდა, ქალები მზად არიან გარისკონ სამსახურის, სახლის, ოჯახისა და საკუთარი სიცოცხლის ფასადაც კი. ფილმში მთავარ როლებს ქერი მალიგენი, ჰელენ ბონემ კარტერი და მერილ სტრიპი ასრულებენ.

სამი ბილბორდი ებინგის საზღვარზე, მისური (2017)

მარტინ მაკდონაჰის ფილმი მოგვითხრობს ისტორიას ქალზე, რომელსაც საერთოდ არ ადარდებდა საზოგადოების აზრი. მილდრედ ჰეისის ქალიშვილი რამდენიმე თვის წინ მოკლეს, დამნაშავე კი ნაპოვნი ჯერ კიდევ არ არის. სასოწარკვეთილი დედა ყიდულობს სარეკლამო ადგილს სამ ძველ ბილბორდზე, რომლებზეც ადგილობრივი შერიფის მისამართით მრისხანე გზავნილს ათავსებს, აწყობს სკანდალს და ასე იქცევს ყურადღებას. ფილმმა, რომელმაც უამრავი ადამიანის სიმპათია დაიმსახურა, ვენეციის კინოფესტივალზე ჯილდო საუკეთესო სცენარისთვის მიიღო. მილდრედ ჰეისის როლისთვის ფრენსის მაკდორმანდმა ოსკარი საუკეთესო მსახიობი ქალისთვის მიიღო, სემ როკველმა კი – ოსკარი საუკეთესო მსახიობი კაცისთვის მეორეხარისხოვან როლში.

ფრიდა (2002)

ჯული ტეიმორის დრამა ცნობილი მექსიკელი მხატვრის ფრიდა კალოს ცხოვრებაზეა, რომლის ბედისწერაც საკმაოდ მძიმე აღმოჩნდა. 18 წლის ასაკში ფრიდა საშინელი ავარიის შემდეგ ერთი წლის განმავლობაში საწოლს იყო მიჯაჭვული და სწორედ ამ პერიოდში აიღო მან პირველად ფუნჯი და საღებავი. ფილმი გამბედავი და ქარიზმატული ქალის ცხოვრებას ამ მომენტიდან დაწყებული სიკვდილამდე ზედმიწევნით გადმოგვცემს. ფილმი ასევე მოგვითხრობს ფრიდას და მისი მეუღლის, მხატვარი დიეგო რივერას ურთიერთობაზე, რომელიც ცოლს ღალატობდა, მაგრამ ყველაფრის მიუხედავად ფრიდას ის მაინც უყვარდა. მექსიკელი მხატვრის როლს არაჩვეულებრივად ასრულებს სელმა ჰაიეკი, რომელიც ოსკარზე საუკეთესო მსახიობი ქალისთვის იყო ნომინირებული. ამის გარდა, ფილმმა ოსკარზე კიდევ 5 ნომინაცია მოიპოვა, რომელთაგან ორში გაიმარჯვა: საუკეთესო ორიგინალური მუსიკისთვის და საუკეთესო გრიმისთვის.

მარია მაგდალინელი (2018)

სრულიად ახალი შეხედულება მარია მაგდალინელის პიროვნებაზე, რომელმაც ოჯახი მიატოვა და შეუერთდა მოციქულებს, რომლებიც ქრისტეს იერუსალიმში მიჰყვებოდნენ. მაგდალინელის როლს უმშვენიერესი რუნი მარა ასრულებს, ქრისტეს როლი კი ხოაკინ ფენიქსმა მოირგო. კრიტიკოსები ფილმს ხშირად გადაჭარბებულ ფემინიზმში დებენ ბრალს, მაგრამ პირველ რიგში, ეს ქალის თვალით დანახული კანონიკური სიუჟეტია, რომელიც შეუძლებელია არ განსხვავდებოდეს მამაკაცის ინტერპრეტაციისგან.

უდაბნოს ყვავილი (2009)

ფილმი სომალელი ტოპ-მოდელის, ვარის დირიეს ისტორიას მოგვითხრობს, მაგრამ ფილმი არ არის პირველ შავკანიან მოდელზე, ეს არის ისტორია პირველ ქალზე, რომელმაც ღიად გააპროტესტა აფრიკულ ქვეყნებში გოგონების წინადაცვეთა. 13 წლის ასაკში მან რაღაცნაირად მოახერხა უდაბნოდან გაქცევა და მოგადიშომდე მიღწევა, მოგვიანებით კი ლონდონში აღმოჩნდა. რამდენიმე წელში მან მოახერხა ერთ-ერთი ყველაზე პოპულარული მოდელი გამხდარიყო, მაგრამ ის ამ წარმატებით არ შემოიფარგლა და თავისი ბავშვობის გათვალისწინებით ვარისმა წამოიწყო კამპანია ქალების წინადაცვეთის წინააღმდეგ, შექმნა ფონდი და დაინიშნა გაეროს ელჩად. ფილმი რეალურ მოვლენებს ეყრდნობა და ვარის დირიეს ამავე სახელწოდების ავტობიოგრაფიული წიგნის მიხედვითაა გადაღებული.

უხილავი მხარე (2009)

კიდევ ერთი ფილმი, რომელიც რეალურ მოვლენებს ეფუძნება. ჯონ ლი ჰენკოკის ფილმი მაიკლ ლუისის წიგნის მიხედვითაა გადაღებული და აფროამერიკელ ბიჭზე მოგვითხრობს, რომელმაც მორიგი საცხოვრებელი ადგილი დაკარგა. ახოვანი მაიკლ ოერი უზრუნველყოფილმა თეთრკანიანმა ოჯახმა შეიფარა. სანდრა ბულოკის სამართლიანი, გონიერი, ნებისყოფიანი და დამოუკიდებელი პერსონაჟი მას საკუთარი თავის რწმენას ჩაუსახავს. ბულოკმა ამ როლისთვის ოსკარი საუკეთესო მსახიობი ქალისთვის მიიღო, ფილმი კი საუკეთესო სურათისთვის იყო ნომინირებული.

მაკბეტი (2015)

შექსპირის ერთ-ერთი ყველაზე ცნობილი პიესის ეკრანიზაცია, რომლის რეჟისორიც ჯასტინ კურზელია. სიუჟეტი ცბიერი შოტლანდიელი ლორდის გარშემო ვითარდება. მაკბეტი, რომლის როლსაც მაიკლ ფასბენდერი ასრულებს, მუდამ ომში იმყოფება, მისმა მეუღლემ, რომლის როლიც მარიონ კოტიარმა მოირგო, ცოტა ხნის წინ შვილი დაკარგა და ახლა მეუღლის დაკარგვისაც ეშინია. მაკბეტის შესანარჩუნებლად ის სამეფო გვირგვინის ბრძოლაში კონკურენტების მოშორების იწყებს.

ველური (2014)

ჟან-მარკ ვალის ფილმი, რომელიც შერილ სტრეიდის ავტობიოგრაფიული წიგნის მიხედვითაა გადაღებული. 26 წლის მწერალი წარუმატებელი ქორწინების და დედის სიკვდილის შემდეგ დეპრესიაშია და მასთან ბრძოლას ალკოჰოლის დახმარებით ცდილობს. შერილი იმ იშვიათი ქალების სიას მიეკუთვნება, რომელმაც ასეთი გაბედული ნაბიჯი გადადგა: ის ფეხით გაუყვა სახიფათო მთების მარშუტს, რომლის სიგრძეც 2650 მილს შეადგენდა – არც ისე კარგი იდეაა სუსტი ქერა ქალისთვის, მაგრამ მთავარი გმირი ამტკიცებს, რომ პატარა და სუსტ ქალსაც ბევრის გაკეთება შეუძლია. სიმშვიდის და საკუთარი თავის თავიდან აღმოსაჩენად მას უამრავი განსაცდელის გამოვლა უწევს, გზად გასაოცარ ადამიანებს ხვდება და ვერანაირი სირთულე ვერ აფერხებს, რადგან სწორედ ეს ეხმარება მას სულიერად განიკურნოს, აღმოაჩინოს ცხოვრების ახალი აზრი და თავიდან ისწავლოს ცხოვრებით ტკბობა. შერილის სტრეიდის როლს რიზ უიზერსპუნი ასრულებს, რომელიც ოსკარზე საუკეთესო მსახიობი ქალისთვის იყო ნომინირებული.

იოანნა ქალი პაპი (2009)

ვატიკანის არქივების ბევრი საიდუმლო ვერასდროს ამოიხსნება, ზოგიერთი ლეგენდა, რომელიც მათთან არის დაკავშირებული, იმდენად წარმოუდგენელია, რომ მათ არც კი ახსენებენ ხოლმე. ისტორია ქალ პაპზე, ლეგენდა, რომელიც წმინდა საყდრის სახელს ლახავს, ვნებიან და ძლიერ ხასიათზე მოგვითხრობს, რადგან სწორედ ასეთი ადამიანი თუ შეძლებდა წასულიყო ასეთ რისკზე. მოვლენები 814 წელს, ვატიკანში ვითარდება, მაშინ, როდესაც გასაოცარი გოგონა იოანა იბადება. ის ბავშვობიდან ჭკვიანი ბავშვი იყო და თანატოლებ ბიჭებს ყოველთვის უსწრებდა ცოდნისადმი მიდრეკილებით. იოანა მალევე მიხვდა, რომ ქალი ვერასდროს მიიღებს მამაკაცების მსგავსად მაღალ თანამდებობას და საზოგადოებრივ აღიარებას. საუკეთესო განათლების მიღების შემდეგ, იოანა ბიჭის ფორმას იცვამს, წყვეტს კავშირს ყველა ოჯახის წევრთან და მიემგზავრება ვატიკანში ეკლესიის მსახურად. ალბათ, ვერასდროს გავიგებთ, მართლა მოხდა თუ არა ასეთი რამ, მაგრამ ეს სიუჟეტი კიდევ დიდი ხანი არ მოასვენებს ისტორიკოსებს, ქალებს კი მათ წარმოუდგენელ შესაძლებლობებში დაარწმუნებს