10 ყველაზე გასაოცარი ფერების მქონე ფილმი

nugo July 11, 2021

ფერები, რომლებიც ქვემოთ ჩამოთვლილ ფილმებშია გამოყენებული, ვიზუალის გარდა, სულ სხვა ძალას ანიჭებს პერსონაჟებსა და ისტორიას. ესაა 10 ყველაზე გასაოცარი ფერების მქონე ფილმი:

მკვლელობისთვის ჩაცმული (1980)

მკვლელობისთვის ჩაცმული

ქალი, რომელიც ფსიქიატრთან დადის, მას სამართებელს ჰპარავს და ექიმს იცვლის. მერე კი სამართებლით პაციენტების მოკვლას იწყებს. მის ერთ-ერთ მკვლელობას შემთხვევით შეესწრება ახალგაზრდა ქალი – ლიზი. ახლა ლიზი როგორც მკვლელის, ისე პოლიციის სამიზნეა…

ჩურჩული და ყვირილი (1972)

ჩურჩული და ყვირილი

სასიკვდილო სენით დაავადებულ ქალს გვერდში დგომა და მზრუნველობა სჭირდება. თუმცა, მისი დები თავად განიცდიან ტანჯვას და დახმარებას საჭიროებენ. ფილმის ფერები პერსონაჟთა შინაგან მდგომარეობას გამოხატავს და აძლიერებს შთაბეჭდილებას მაყურებელზე.

იმოქმედე სწორად (1989)

იმოქმედე სწორად

ღარიბი სამეზობლოს ყოველდღიურობა ირღვევა, როცა ტემპერატურა მაღლა იწევს და აუტანელი სიცხე დგება, რაც მოვლენებს უკონტროლოს ხდის. ფილმი ცხოვრების მარტივ გზას გვიჩვენებს, პერსონაჟთა მთავარ დილემებს, სიამოვნებებსა და პრობლემებს.

სამი ფერი: წითელი (1994)

წითელი

ახალგაზრდა ვალენტინის ყოველდღიური რუტინა მას შემდეგ ირღვევა, რაც ის მანქანით მეზობლის ძაღლს დაეჯახება. მას კითხვები უჩნდება საკუთარ თავთან, საკუთარ სურვილებთან მიმართებით. სამი ფერი: წითელი კშიშტოფ კისლიოვსკის ტრილოგიის ერთ-ერთი ფილმია და სათაურის შესაბამისად, მასში სწორედ წითელი ფერი ჭარბობს.

სამი ფერი: ლურჯი (1993)

ლურჯი

კისლიოვსკის ტრილოგიის კიდევ ერთი ფილმი, რომელიც დაუვიწყარია თავისი ფერებით – სამი ფერი: ლურჯია, ტრაგიკული ისტორია ახალგაზრდა ქალზე, რომელიც ავტოავარიაში მეუღლესა და შვილს კარგავს და ყველაფერს აკეთებს, რათა როგორმე ცხოვრება განაგრძოს.

ნეონის დემონი (2016)

ნეონის დემონი

პროვინციელი ახალგაზრდა ქალი შეპყრობილია იმ აზრით, რომ გახდეს სუპერმოდელი. ის ქალაქებს იცვლის და ყველაფერს აკეთებს მიზნის მისაღწევად. თუმცა, გარშემომყოფები მის მოტივებში დაეჭვებას იწყებენ… ფილმში ძირითადად თბილი ფერებია გამოყენებული, რაც სცენებს უფრო დინამიურს ხდის.

სასტუმრო “გრანდ ბუდაპეშტი” (2014)

გრანდ ბუდაპეშტი

უეს ანდერსონის ფერებისადმი დამოკიდებულება ყველასთვის ცნობილია. რეჟისორი ძალიან დიდ მნიშვნელობას ანიჭებს ფერებს, ნახატებს, ვიზუალურ გამოსახვას. მისი ინდივიდუალური სტილი ორგანულად ერწყმის თხრობის უჩვეულო მანერას და ანდერსონს ერთ-ერთ საუკეთესო თანამედროვე რეჟისორად აქცევს. ფერების ჯადოქრობის ყველაზე ნათელი მაგალითი კი სასტუმრო “გრანდ ბუდაპეშტია”.

თავბრუსხვევა (1958)

თავბრუსხვევა

დეტექტივს, რომელსაც სიმაღლის შიში აქვს, ლამაზი და უცნაური ქალის თვალთვალს ავალებენ, ქალს კი სიმაღლეები იზიდავს. გამოძიების პროცესში კაცი ხვდება, რომ საქმე იმაზე რთულადაა, ვიდრე თავდაპირველად ჩანდა…

სასიყვარულო განწყობა (2000)

სასიყვარულო განწყობა

ვონ კარ-ვაის დაუვიწყარ სურათში ფერები საოცრად ერწყმის ფილმის ატმოსფეროს და გმირების სულიერი მდგომარეობის გამომხატველია. ორი მეზობელი – ორი დაოჯახებული, მაგრამ მარტოსული ადამიანი, რომელიც ხვდება, რომ მეუღლეები ღალატობენ, – უჩვეულო ურთიერთობას იწყებს, რაც სამუდამოდ ცვლის მათ ცხოვრებას.

დიდებული სილამაზე (2013)

დიდებული სილამაზე

ფილმში ჩვენ ვხედავთ ფრაგმენტებს ცნობილი იტალიელი ჟურნალისტის ცხოვრებიდან. ვხედავთ მყიფე ურთიერთობებს, სილამაზეს და სიამოვნებებს, რომლებიც ფულით ადვილად ხელმისაწვდომია, ბურჟუაზიის აბსურდულ ყოფას, – ფასადურ ცხოვრებას, რომელიც პაოლო სორენტინომ საოცარი ფერებით გადმოსცა.