10 ყველაზე დამაბნეველი ფილმი

ქვემოთ ჩამოთვლილი ყველა ფილმი შთამბეჭდავია, დაუვიწყარი ისტორიებით და ჩახლართული სიუჟეტებით. თუმცა, ისინი რთულია და კითხვებს ტოვებს. ესაა 10 ყველაზე დამაბნეველი ფილმი:

მალჰოლენდ დრაივი (2001)

მსახიობობის სურვილით ლოს-ანჯელესში ჩამოსული ბეტი ხვდება რიტას, ქალს, რომელსაც ავტოავარიის შემდეგ არაფერი ახსოვს. ეს სიურრეალისტური სურათი ადამიანის ცნობიერებას იკვლევს და მისი ყველაზე დაფარული მხარეების გამოვლენას ცდილობს.

პი (1998)

დარენ არანოვსკის სადებიუტო ნამუშევარში სიუჟეტი უცნაური მათემატიკოსის ირგვლივ ვითარდება. ის ცდილობს, აღმოაჩინოს კავშირი რიცხვებსა და რეალობას შორის; გადაჭრას ამოცანა, რომელიც, მისი აზრით, სამყაროს შეცვლის.

დასაწყისი (2010)

კრისტოფერ ნოლანის სურათში რეალობა და სიზმრები ერთმანეთშია გადახლართული და საინტერესო თხრობის მიუხედავად, მაყურებლისთვის რთული აღსაქმელია. ფინალთან მიმართებით კი დღემდე კითხვებს სვამენ.

შინაგანი იმპერია (2006)

როლის მიღების შემდეგ მსახიობი ქალი რაც უფრო მეტად ცდილობს პერსონაჟის გათავისებას, მისი სამყარო სულ უფრო სიურრეალისტური და კოშმარული ხდება. მერე კი ირკვევა, რომ ეს პირველი შემთხვევა არ არის…

შეშლილთა კუნძული (2010)

1950-იანი წლები. მეორე მსოფლიო ომის მარშალს მთავრობა აგზავნის კუნძულზე მდებარე ფსიქიატრიულ კლინიკაში, რომელიც გარესამყაროსგან იზოლირებულია. იქ მან გამქრალი პაციენტის საქმე უნდა გამოიძიოს. კუნძულზე ჩასვლიდან მალევე კაცს საშინელი ხილვები ეწყება და ხვდება, რომ კუნძულზე რაღაც უჩვეულო ხდება.

მტერი (2013)

საკუთარი უშინაარსო ცხოვრებით დაღლილი მასწავლებელი ფილმში ნახავს მსახიობს, რომელიც მას გაჭრილი ვაშლივით ჰგავს და ამ ფაქტით შეპყრობილი ხდება. უცნაური ისტორია და ფილმის უნიკალური ატმოსფერო მაყურებელზე წარუშლელ შთაბეჭდილებას ტოვებს.

სოლარისი (1971)

ფსიქოლოგს კოსმოსურ სადგურზე გზავნიან, რათა იქ მყოფი ადამიანების ემოციური პრობლემების მიზეზი დაადგინოს. ეს რთული და ძალიან დამაბნეველი სურათი გვესაუბრება იმაზე, რომ ადამიანის ფიქრებსა და მოგონებებს მატერიალიზების უნარი აქვს.

პერსონა (1966)

ნერვული კრიზისის შემდეგ, მსახიობი ხალხთან კონტაქტს წყვეტს და იზოლირებულად ცხოვრობს. მას ახალგაზრდა მედდა უვლის და ორივე ქალის ცხოვრებაში საკუთარი პიროვნების გაცნობიერების უჩვეულო პროცესი იწყება.

ინტერსტელარი (2014)

მკვლევართა ჯგუფი სახიფათო მისიით მიემართება კოსმოსში დედამიწის გადასარჩენად. ესაა საოცარი ისტორიის და ვიზუალის მქონე ფილმი, რომელიც მაყურებელზე უზარმაზარ ზეგავლენას ახდენს.

საშლელთავა (1977)

ჩვენ ვუყურებთ ნერვული კაცის ყოველდღიურ ცხოვრებას, მის დაბნეულობასა და გაურკვევლობას სამყაროში. როდესაც კაცს მეგობარი გოგონა განუცხადებს, რომ ორსულადაა, მას ის ცოლად მოჰყავს და ასე ხდება მუტანტი ბავშვის მამა.