10 ყველაზე დასამახსოვრებელი ფილმი სოციოპათებზე

nugo July 11, 2021

რა ხდება ამ ადამიანების თავში? რატომ არიან ისინი ასეთი სასტიკები და დაუნდობლები? შეიძლება ყველას არ აინტერესებს, თუ რატომ არიან სოციოპათები ასეთები, მაგრამ მათზე გადაღებული ამ ფილმებისთვის ზურგის შექცევა ძალიან რთულია. ეს ის ფილმებია, რომლებისთვისაც პოპკორნი არ დაგჭირდებათ – უბრალოდ ჭამის თავიც არ გექნებათ…

მექანიკური ფორთოხალი (1971)

კინემატოგრაფიის ისტორიაში ერთ-ერთი ყველაზე ცნობილი ფილმი, რომელიც ენტონი ბერჯესის ამავე სახელწოდების რომანის მიხედვითაა გადაღებული. მალკოლმ მაკდაუელის გმირი ალექსი ძალადობის პრინციპებს ქადაგებს და მკვლელობებით და გაუპატიურებებით ერთობა. სამართლიანი დასჯა ალექსისთვის გაუსაძლისი აღმოჩნდა, რის გამოც ექსპერიმენტს დათანხმდა: ექიმებმა მას პირობითი რეფლექსი ჩამოუყალიბეს – გაუსაძლისი გულისრევის შეგრძნება, რომელსაც ძალადობის ან სექსის სურვილის გაჩენისთანავე იგრძნობს. სტენლი კუბრიკის ფილმმა მსოფლიო აღიარება, ოსკარის ოთხი და ოქროს გლობუსის სამი ნომინაცია მოიპოვა.

ვიღაცამ გუგულის ბუდეს გადაუფრინა (1975)

კიდევ ერთი ეკრანიზაცია,  რომელიც კენ კიზის ცნობილი რომანის “გუგულის ბუდეზე სხვა გადაფრინდას” მიხედვით არის გადაღებული და რომლის გარეშეც ეს კოლექცია წარმოუდგენელია. სიუჟეტი, დიდი ალბათობით, ყველა თქვენგანს ეცოდინება, მაგრამ ამ ფილმის ნახვა აუცილებლად ღირს იმის გასააზრებლად, რა ხდება, როდესაც სოციოპათი ქალია და როდესაც მის ხელშია აბსოლუტური, უსაზღვრო ძალაუფლება. მილოშ ფორმანის კლასიკად ქცეულმა ფილმმა ოქროს გლობუსის ექვსი ჯილდო, ხოლო ოსკარის ისტორიაში კი შევიდა როგორც პირველი ფილმი, რომელმაც გაიმარჯვა ყველა ძირითად კატეგორიაში: საუკეთესო სურათისთვის, საუკეთესო მსახიობი კაცისთვის, საუკეთესო მსახიობი ქალისთვის, საუკეთესო რეჟისორისთვის და საუკეთესო ადაპტირებული სცენარისთვის.

მიზერი (1990)

საშინელებათა ჟანრის ოსტატის, სტივენ კინგის ამავე სახელწოდების რომანის არაჩვეულებრივი ეკრანიზაცია. ჯეიმს კაანის პერსონაჟი, მწერალი პოლ შელდონი ქარბუქში ხვდება და მისი მანქანა გზიდან ვარდება. საბედნიეროდ მას კეტი ბეითსის გმირი, ენი პოულობს, რომელიც ექთანი აღმოჩნდა და მისი დახმარებაც შეუძლია. ყველაფერთან ერთად ენი პოლის ყველაზე დიდი თაყვანისმცემელი აღმოჩნდა და ის უბედნიერესია, რომ მიეცემა საშუალება მისი ახალი რომანის ხელნაწერი პირველმა წაიკთხოს. სამწუხაროდ, ჯეიმს კაანის გმირი ვერც კი იფიქრებდა, რომ ენის რომანის ფინალი არ მოეწონებოდა და რას გამოიწვევდა ეს… რობ რეინერის ფილმში შესრულებული როლისთვის კეტი ბეითსმა ოსკარი საუკეთესო მსახიობი ქალისთვის მიიღო.

კარგი შვილი (1993)

მაკალეი კალკინის გმირის, ჰენრის სისასტიკეს არავითარი ახსნა არ აქვს. ის “არანორმალური” თამაშებით ერთობა, ხოცავს ცხოველებს და საფრთხეს უქმნის ახლობლების ცხოვრებას. როდესაც მასთან სტუმრად მისი ნათესავი მარკი ჩადის, რომელსაც ელაიჯა ვუდი ასრულებს, ის ხვდება, რომ ჰენრის ფსიქიკური გადახრები აქვს, მაგრამ არავინ აქცევს მის სიტყვებს ყურადღებას.

მკვლელებად დაბადებულნი (1994)

ვუდი ჰარელსონის და ჯულიეტ ლუისის გმირებს ძალიან უყვართ ერთმანეთი. გარდა ამისა, მათ ასევე ძალიან უყვართ ლეგენდარული წყვილი – ბონი და კლაიდი. რა თქმა უნდა, ისინი მათ ბაძავენ, დადიან მანქანით და მთელ მსოფლიოს გააცნეს თავი სასტიკი მკვლელობებით. ოლივერ სტოუნის ფილმი ერთგვარი სატირაა მედიაზე, რომელიც რეიტინგის ასამაღლებლად ხშირად ძალადობას იყენებს, და ასევე ზოგადად თანამედროვე საზოგადოებაზე, რომელშიც ძალადობას და სისასტიკეს, განსაკუთრებით ოჯახებში, ასეთი “გმირების” გამრავლებამდე მივყავართ. ოლივერ სტოუნი ოქროს გლობუსზე საუკეთესო რეჟისორისთვის იყო ნომინირებული.

მებრძოლთა კლუბი (1999)

ფილმი მოკლედ რომ აღვწეროთ, დაახლოებით ასე გაიჟღერებს: მოწყენილობისგან დაღლილი მამაკაცი და ნონკონფორმისტი საპნების გაყიდვების მენეჯერი მებრძოლთა კლუბს აყალიბებენ, რომელიც ძალიან მალე ხდება პოპულარული. მაგრამ თუ რეალურად დავახასიათებთ დევიდ ფინჩერის ამ ფილმს, მაშინ ეს იმ ფილმების სიას მიეკუთვნება, რომელიც აუცილებლად შეგიცვლით შეხედულებას ცხოვრებაზე, და რამდენჯერაც არ უნდა უყუროთ მას, აღმოაჩენთ რაღაც ახალს, რაც აუცილებლად მოახდენს თქვენზე გავლენას.

შეწყვეტილი ცხოვრება (2000)

ეს არის ჯეიმს მანგოლდის ფილმი, რომელიც რეალურ მოვლენებზეა დაფუძნებული. ვაინონა რაიდერის გმირი, 18 წლის სიუზან კეისენი სუიციდის მცდელობის შემდეგ სასაზღვრო მდგომარეობის დიაგნოზით ფსიქიატრიულ კლინიკაში ხვდება. ის იქ ანჯელინა ჯოლის გმირს ხვდება, რომელიც არამოტივირებული აგრესიისკენ და სოციოპათიისკენ არის მიდრეკილი. მისმა გაცნობამ სიუზანი აიძულა თავისი ცხოვრებისადმი დამოკიდებულებაზე კიდევ ერთხელ დაფიქრებულიყო. ანჯელინა ჯოლიმ ოსკარი საუკეთესო მსახიობი ქალისთვის მეორეხარისხოვან როლში მიიღო.

ამერიკელი ფსიქოპატი (2000)

კარგად აღზრდილი მოქალაქე, სერიოზული ბიზნესმენი, აქტიური და სიმპათიური ახალგაზრდა, რომელსაც კრისტიან ბეილი ასრულებს, დღისით სრუილად ჩვეულებრივი, სწორი და ჯანსაღი ცხოვრებით ცხოვრობს. ღამე კი… ღამე ის ნამდვილ ურჩხულად იქცევა, რომელსაც მსხვერპლის სწრაფი სიკვდილი სულაც არ აწყობს…

უნდა ვილაპარაკოთ კევინზე (2011)

შეუდარებელი ტილდა სუინტონი კევინის დედის ამპლუაში გვევლინება, რისთვისაც ოქროს გლობუსზე საუკეთესო მსახიობი ქალისთვის დრამაში იყო ნომინირებული. კევინი კი არის ბიჭი, რომელსაც, თითქოს, თავიდანვე ჰქონდა ფსიქოლოგიური პრობლემები: ის ყოველთვის ბევრს ტიროდა, გვიან დაიწყო ლაპარაკი, რადიკალურად განსხვავდებოდა უმცროსი დისგან, რომელიც ჩვეულებრივად ვითარდებოდა და მამამისი იყო ერთადერთი, ვინც მუდამ მის მხარეს იყო. საბოლოოდ, ვუყურებთ ფილმს ბიჭზე, რომელიც ცდილობს, დედას ცხოვრება გაუნადგუროს, ატკინოს, აწყენინოს… ფილმი ძალიან მძიმეა და ღრმა ფსიქოლოგიას ატარებს. ეს არის ფილმი, რომელსაც ალბათ, ბევრჯერ ნახავთ.

გაუჩინარებული ქალი (2014)

დევიდ ფინჩერის ბოლო წლების ერთ-ერთი ყველაზე ხმაურიანი ფილმი, რომელშიც ქორწილის მეხუთე წლისთავის აღსანიშნავ დღეს ცოლი უკვალოდ ქრება… სახლში დარჩენილია ბრძოლის მიმანიშნებელი კვალი და სისხლი, რომლის გაწმენდასაც ცდილობდნენ. ჩახლართული და მოულოდნელობებით სავსე ფილმი, რომელსაც აუცილებლად უნდა უყუროთ. არაჩვეულებრივი როზამუნდ პაიკი ოსკარზე საუკეთესო მსახიობი ქალისთვის იყო ნომინირებული.