10 ყველაზე შოკისმომგვრელი სიკვდილი სერიალებიდან

nugo July 11, 2021

გაფრთხილება: სტატია შეიცავს სპოილერებს!

სერიალების მოყვარულებს ბევრი გმირის სიკვდილმა დაგვწყვიტა გული, თუმცა ზოგიერთის იმდენად წარმოუდგენელი და მოულოდნელი იყო, რომ ამას ვერასდროს დავივიწყებთ. გთავაზობთ 10 ყველაზე შოკისმომგვრელ სიკვდილს სერიალებიდან:

ომარი (მოსმენა)

ომარი

მოსმენაში ბევრი სისხლიანი სიკვდილი ვნახეთ, თუმცა ერთ-ერთი ნამდვილად შოკიმომგვრელი იყო. ომარი (მის როლს მაიკლ კენეტ უილიამსი თამაშობს) მთელი ხუთი სეზონის განმავლობაში ბალტიმორის ქუჩებში მიმდინარე ომის ღმერთი იყო – პრაქტიკულად, უძლეველი და მოუხელთებელი. შესაბამისად, მისი სიკვდილი მაყურებლისთვის ძალიან მოულოდნელი და გულდასაწყვეტი აღმოჩნდა.

ზოუი (ბანქოს სახლი)

ზოუი

ამბიციურმა ჟურნალისტმა – ზოუიმ იცის, რომ არ უნდა ენდოს მასზე უფრო ამბიციურ კონგრესმენს – ფრენკ ანდერვუდს, და მაინც, ის თანხმდება ყოფილ საყვარელს, შეხვდეს სადგურზე, რათა გაიგოს სიმართლე სხვა კონგრესმენის სიკვდილის შესახებ. ანდერვუდისგან მოსალოდნელი საშინელების მიუხედავად, ის, რაც მერე მოხდება, მაინც სიურპრიზი იყო მაყურებლისთვის.

ლორი (მოსიარულე მკვდრები)

ლორი

ლორის თავისი ქმარი რიკი მკვდარი ჰგონია. ამ სიტუაციაში პირველი ტვისტი ცოცხალი და ჯანმრთელი რიკის გამოჩენაა და მერე ორმაგი ტვისტი – ლორის ორსულობა. იმ დროისთვის, როცა გადარჩენილები ციხეში ლტოლვილს იპოვნიან, ქმარი ლორის არ ელაპრაკებოდა, ვაჟს – სძულდა, მას სერიალის გულშემატკივრებიც კი არ თანაუგრძნობდნენ, და მიუხედავად ამისა, ლორის სიკვდილზე მაყურებელმა უამრავი ცრემლი დაღვარა…

ვილი (კარგი ცოლი)

ვილი

ხუთი სეზონის განმავლობაში ვილ გარდნერი ერთ-ერთი მთავარი გმირი იყო –  შესაძლოა, უფრო მეტადაც მნიშვნელოვანი, ვიდრე ერთი შეხედვით ჩანდა, რადგან ის იყო კაცი, რომელიც “კარგ ცოლს” – ალისიას შეუყვარდა (მიუხედავად თითზე საქორწინო ბეჭდისა). სწორედ ამიტომ, ვილ გარდნერის სიკვდილი ერთ-ერთი ყველაზე შოკისმომგვრელი მომენტი აღმოჩნდა სატელევიზიო შოუების ისტორიაში.

მეთიუ (დაუნტონის სააბატო)

მეთიუ

მესამე სეზონის ბოლოს მეთიუ გახარებული ბრუნდება სახლში, რათა ოჯახს აცნობოს, რომ ვაჟი ეყოლა. იმ ტრაგედიების შემდეგ, რასაც გმირმა გაუძლო, ძალიან ბედნიერი და იმედით სავსე ჩანს. შეიძლება სწორედ ამ ბედნიერების ფონზეც აღმოჩნდა ასეთი შოკისმომგვრელი მისი სიკვდილი – ავარია და მანქანის ქვეშ მოყოლილი მეთიუ

ნედ სტარკი (სამეფო კარის თამაშები)

ნედ სტარკი

მათთვის, ვისაც ჯორჯ მარტინის წიგნები წაკითხული არ ჰქონდა, ნედ სტარკის სიკვდილი ნამდვილი შოკი იყო, რადგან HBO-ს სერიალში მოკვდა ცენტრალური ფიგურა, რომელსაც პოსტერებსა და ბილბორდებზე ხედავდნენ… თუმცა, ეს მხოლოდ პირველი შოკი გახლდათ. სამეფო კარის თამაშების ფანებმა დღეს უკვე კარგად იციან, რომ ჯორჯ მარტინისგან ყველაფერია მოსალოდნელი.

ჯორჯი (გრეის ანატომია)

ჯორჯი

ჯორჯ მარტინის არ იყოს, აღარც შონდა რაიმსისგან (გრეის ანატომიის შემქმნელი) უკვირს ვინმეს მთავარი პერსონაჟების სიკვდილი. თუმცა, ჯორჯის სიკვდილი მაინც შოკისმომგვრელი აღმოჩნდა. როცა დასახიჩრებული გმირი საავადმყოფოში მიიყვანეს, მაყურებელიც ვერ მიხვდა, რომ ის ჯორჯი იყო, სანამ სიკვდილის წინ მან მერედიტს ხელზე თავისი ფსევდონიმი – 007 არ დააწერა.

ელისონი (თინეიჯერი მგელი)

ელისონი

თინეიჯერი მგელის სიუჟეტის ცენტრში ელისონისა და სკოტის წყვილი იდგა. მათი სიყვარულის ისტორიას უყურებდნენ და გულშემატკივრობდნენ მაშინაც კი, როდესაც ეს ორი ერთად არ იყო. როცა ისინი, თავიანთ მეგობრებთან ერთად, ლიდიას გადასარჩენად წავიდნენ, არავის გასჩენია შიში, რომ მათ საყვარელ გმირს საფრთხე ემუქრებოდა. პირიქით, მაყურებელი თითქოს ელისონის გამარჯვების მომენტს უყურებდა. სიტუაცია კი ისე შეტრიალდა, რომ ფანები მის სიკვდილს ვერასდროს დაივიწყებენ.

ლოკი (დაკარგულები)

ლოკი

კუნძულზე ლოკის მტკიცე რწმენის მნიშვნელობა არსებითი ჩანდა შოუს ბალანსისთვის. მაშ, როგორ და რატომ მოკლა ბენმა ლოკი? თავად ბენის ახსნა საკმაოდ უჩვეულოა: რომ ლოკი განსაკუთრებული იყო, თავად კი – არა. ამაზე უჩვეულო კი ისაა, რომ ფანების დიდ ნაწილს დღემდე არ სჯერა ლოკის სიკვდილის.

ადრიანა (სოპრანოს კლანი)

ადრიანა

ადრიანა კრისტოფერთან (მის როლს მაიკლ იმპერიოლი ასრულებს) აღიარებს, რომ FBI-ს ინფორმატორი გახდა. ის იმედოვნებს, რომ ახალ ცხოვრებას დაიწყებენ მოწმეთა დაცვის პროგრამით. კრისტოფერი თანხმდება. თუმცა, შემდეგ ჩვენ ვხედავთ, როგორ მიყავს ადრიანა ტყეში სილვიოს და ნათელი ხდება, რომელი ოჯახის ერთგული დარჩა კრისტოფერი

 

წყარო: www.ew.com