10 შესანიშნავი ფილმი ლგბტ თემატიკაზე
17 მაისი – ჰომოფობიასა და ტრანსფობიასთან ბრძოლის საერთაშორისო დღე; დღე, რომელიც კიდევ ერთხელ გვახსენებს ლგბტ პირთა უფლებებისა და იმის შესახებ, რომ ჩვენ ყველანი თანასწორნი ვართ, ჩვენი სექსუალური ორიენტაციის მიუხედავად. სინემანია გთავაზობთ 10 შესანიშნავ ფილმს ლგბტ თემატიკაზე:
პრაიდი (2014)
ფილმი ნამდვილ ამბავს ეფუძნება და გვიყვება ლგბტ აქტივისტების ჯგუფზე, რომელიც1984 წელს, ბრიტანელი მეშახტეების დაზარალებული ოჯახების დასახმარებლად იბრძვის.
კუზიანი მთა (2005)
1960-იანი წლები. ვაიომინგის კუზიანი მთა. სწორედ აქ იწყება ორი კოვბოის სიყვარული და მერე მთელი ცხოვრება გრძელდება, შინაგანი წინააღმდეგობების და მომავალში განვითარებული მოვლენების მიუხედავად. ჰიტ ლეჯერისა და ჯეიკ ჯილენჰოლის ბრწყინვალე შესრულებამ ფილმი სრულიად დაუვიწყარი გახადა.
ბიჭები არ ტირიან (1999)
ერთ-ერთი საუკეთესო ფილმი ლგბტ თემატიკაზე. ბრენდონ ტინა ცდილობს, თავისი იდენტობა მიიღოს და საზოგადოებაში დამკვიდრებულ წესებს მიჰყვეს, თუმცა, მან ბავშვობიდან იცის, რომ შინაგანად ქალია და ამას ვერსად გაურბის…
ფილადელფია (1993)
როდესაც აივ-ინფექციით დაავადებულ მამაკაცს მისი მდგომარეობის გამო სამსახურიდან უშვებენ, ის სამართლიანობისთვის ბრძოლას გადაწყვეტს. ადვოკატი, რომელსაც ქირაობს, ჰომოფობია. თუმცა, იმ ტკივილთან პირადი შეხება, რომელსაც დაზარალებული განიცდის, მის ჰომოფობიურ განწყობებს ცვლის და ადვოკატი ხედავს მთავარს – მისი კლიენტი, პირველ რიგში, ადამიანია.
შენი სახელი დამიძახე (2017)
17 წლის მოზარდი ზაფხულს მშობლებთან ატარებს. ის უკრავს, კითხულობს, ერთობა მეგობრებთან და შეყვარებულთან ერთად. მერე კი ამერიკიდან მამამისის მეგობარი ჩამოდის და ყველაფერი იცვლება: ბიჭს თავს პირველი სიყვარული ატყდება.
ჰარვი მილკი (2008)
გას ვან სენტის ბიოგრაფიული ფილმი რეალურ ამბავს ეფუძნება და მოგვითხრობს ამერიკელი პოლიტიკოსის, ჰარვი მილკის ისტორიას – პირველი გეი მამაკაცის, რომელიც ამერიკელმა ხალხმა მმართველად აირჩია.
ცუდი აღზრდა (2004)
1960-იანი წლების ესპანეთი. ორი ბიჭი კათოლიკური სასწავლებლიდან, რომელთაც ერთმანეთი უყვარდებათ და რომელთა ცხოვრებასაც სამუდამო დაღს დაასვამს მამა მანოლოს სასტიკი დამოკიდებულება…
120 დარტყმა წამში (2017)
ეს არის ფილმი სიყვარულზე, სიცოცხლეზე – სიცოცხლეზე, რომელიც სიკვდილზე ძლიერია… – ასე შეაფასეს ფილმი კინოკრიტიკოსებმა. რობინ კამპილოს სურათში მოქმედება 90-იანი წლების საფრანგეთში ვითარდება, როდესაც ჯგუფმა Act Up აივ-ინფექციის მსხვერპლთა დასაცავად სამოქალაქო მოძრაობა წამოიწყო.
დანიელი გოგონა (2015)
კოპენჰაგენი. 1920-იანი წლები. მხატვარი ცოლის თხოვნით, ეინერი ქალივით გამოეწყობა. ხატვის პროცესში კი თანდათან აცნობიერებს, რომ თავს კომფორტულად სწორედ ამ ფორმაში, ამ იდენტობაში გრძნობს. ის ხდება პირველი ადამიანი, რომელიც სქესის შესაცვლელად ოპერაციას გაიკეთებს.
ლოცვა ბობისთვის (2009)
მორწმუნე დედისთვის შვილის სექსუალური ორიენტაცია დიდი დარტყმა აღმოჩნდება და ყველანაირად ეწინააღმდეგება მის სურვილს, იყოს ის, ვინც არის. თუმცა, მოვლენათა ტრაგიკული განვითარება ყველაფერს ცვლის და დედა სექსუალურ უმცირესობათა ინტერესების დამცველი ხდება.