10 შესანიშნავი ფილმი, რომლებიც სწავლას და სტუდენტობას მოგანდომებთ

nugo July 10, 2021

ახალი სასწავლო წელი დაიწყო და მოსწავლეები თუ სტუდენტები ენთუზიაზმით შეუდგნენ სწავლა-განათლების მორიგ ეტაპს. თუ ფიქრობთ, რომ თქვენ მათ რიცხვს არ მიეკუთვნებით და ზაფხულის განწყობა ჯერ სულაც არ გაგნელებიათ, ესე იგი, დამატებითი სტიმული გჭირდებათ. ქვემოთ წარმოგიდგენთ 10 მშვენიერ ფილმს სწავლაზე, რომელიც ამ რთულ და ხშირად რუტინულ პროცესს სხვაგვარად დაგანახებთ და ლექციებზე სიარულის, სწავლის, ახლის შემეცნების სურვილს გაგიჩენთ.

1. ისტორიის მოყვარულები (2006)

თავნება, ქარიზმატულ თანაკლასელ ბიჭებს და მათ ორ ექსცენტრულ მასწავლებელს მიზნად აქვთ ოქსფორდის ან კემბრიჯის უნივერსიტეტებში მოხვედრა. საამისოდ მათ რთული გზა უნდა გაიარონ, უპირველესად კი თავიანთი ბობოქარი ხასიათი უნდა დაიმორჩილონ.

IMDB რეიტინგი — 6.9

2. სოციალური ქსელი (2010)

ამბავი იმაზე, თუ როგორ შექმნა ყველაზე პოპულარული სოციალური ქსელი — facebook ჰარვარდის ორმა სტუდენტმა. უნივერსიტეტში გაბმული ვიწრო სოციალური კავშირები მალე მთელ მსოფლიოს მოედო, მისი შემოქმედი მარკ ცუკერბერგი კი ჩვეულებრივი სტუდენტიდან მილიარდელად და უპოპულარულეს ადამიანად აქცია.

IMDB რეიტინგი — 7.7

3. ბრწყინვალე გონება (2001)

ფილმი თავისი თაობის ერთ-ერთ ყველაზე ჭკვიანი მათემატიკოსის, ნობელიატი ჯონ ნეშის ცხოვრების მიხედვითაა გადაღებული. ბრწყინვალე გონების მქონე მეცნიერს მთავრობა საბჭოთა კოდების გაშიფვრაში დახმარებას სთხოვს, რითაც ის სახიფათო კონსპირაციის მონაწილე ხდება და პარანოია იპყრობს.

IMDB რეიტინგი — 8.2

4. ყველაფრის თეორია (2014)

კიდევ ერთი ბრწყინვალე გონება: ასტროფიზიკოსი სტივენ ჰოკინგი და მისი ცხოვრების ისტორია, სამეცნიერო სამყარო, სიყვარული და სიძნელეები. ედი რედმეინი ბრწყინვალედ განასახიერებს ბრიტანელ მეცნიერს, რომლის ცხოვრება დიდი დასტურია იმისა, რომ ადამიანს მართლაც უსაზღვრო შესაძლებლობები აქვს.

IMDB რეიტინგი — 7.7

5. ჭკვიანი უილ ჰანტინგი (1997)

მეთ დეიმონი 20 წლის გენიოსი მათემატიკოსის, უილ ჰანტინგის როლში. არეული წარსულისა და რთული ფსიქოლოგიის მქონე ყმაწვილს ფსიქოლოგი შონი (რობინ უილიამსი) იტარებს თერაპიას და უილის გონებაც ახალ-ახალი იდეებით ივსება. ეს შესანიშნავი ფილმი დაგვარწმუნებს, რა მნიშვნელოვანია ნიჭისთვის ფართო გზის მიცემა.

IMDB რეიტინგი — 8.3

6. როკის სკოლა (2003)

წარუმატებელი მუსიკოსი სრულიად ახლებური აუდიტორიის — სკოლის მოსწავლეების წინაშე. ექსცენტრული მასწავლებელი, რომელიც ბრწყინვალედ მღერის, როკმუსიკა და ბავშვების ბენდი ყველას მოანდომებს როკის სკოლაში სწავლას. ეს ფილმი მაგალითია იმისა, თუ როგორ რადიკალურად შეიძლება შეიცვალოს განათლების სფეროში მოხვედრილი ადამიანი.

IMDB რეიტინგი — 7.1

7. თავისუფლების მწერლები (2007)

ფილმი მასწავლებელ ერინ გრაველის ნამდვილ ამბავს მოგვითხრობს. მან სწავლების უნიკალურ სტილს მიაგნო, რომლის მეშვეობითაც ერთი პატარა ქალაქის მოსწავლეებმა მაღალი აკადემიური შეფასება დაიმსახურეს. ნამდვილად შთამაგონებელია ჰილარი სვონკის პერსონაჟის, როგორც მასწავლებლის შეუპოვრობა და ცოდნის ძალის დემონსტრირება.

IMDB რეიტინგი — 7.5

8. კლუბი — საუზმე (1985)

80-იანების ამერიკული დრამა-კომედია ამბავია 5 განსხვავებულ სტუდენტზე, რომლებიც, მიუხედავად ყველაფრისა, თანდათან უმეგობრდებიან ერთმანეთს. მათი მეგობრობა სრულიად მოულოდნელი და უჩვეულო ამბებით იწყება. საკულტო თინეიჯერული ფილმი სტუდენტური ცხოვრებისა და მეგობრობის მშვენიერებას გვიჩვენებს.

IMDB რეიტინგი — 7.9

9. გაუძლო და მიაღწიო (1988)

რეალურ ამბავზე დაფუძნებული კიდევ ერთი ფილმი. ამბავი მათემატიკის მასწავლებელ ჯეიმი ესკალანტეს შესახებ, რომელიც ცდილობს თავის, ერთი შეხედვით “უიმედო” მოსწავლეს სწავლების უჩვეულო მეთოდებით მიუდგეს. ეს ფილმი ნამდვილად დაგარწმუნებთ, რომ სწავლის უნარი ყველას გააჩნია, მთავარია, როგორ ასწავლი.

IMDB რეიტინგი — 7.3

10. რაღაც მშვენიერი (1987)

უჩვეულო და გარიყული მაღალკლასელი ცდილობს, სკოლის პოპულარულ გოგოს, ამანდას მოაწონოს თავი და ამაში მეგობარი გოგო, უოტსი ეხმარება. სასიყვარულო ვნებათაღელვა პიკს აღწევს, როცა უოტსი გააცნობიერებს, რომ თავად უყვარს მეგობარი. ამბავი, რომელიც გაგვახსენებს, რომ სკოლაში და უნივერსიტეტში მხოლოდ სწავლისთვის როდი დავდივართ — სასიყვარულო ამბები ხომ მთავარია და მათ გარეშე სწავლის პროცესს მართლაც ვერ გავუძლებდით.

IMDB რეიტინგი — 7.1