10 შთამბეჭდავი ფილმი მენტალურ ჯანმრთელობაზე

მენტალური ჯანმრთელობა ის საკითხია, რომელსაც კინო ყოველთვის შეისწავლიდა. ჩვენ გვაქვს ფილმები, რომლებიც დიდი სიზუსტით ასახავს მენტალურ დაავადებებს, მათ გამომწვევ მიზეზებსა და შედეგებს. გთავაზობთ 10 შთამბეჭდავ ფილმს მენტალურ ჯანმრთელობაზე:

შინაგანი ცეცხლი (1963)

ალკოჰოლზე დამოკიდებული ახალგაზრდა კაცი სარეაბილიტაციო კლინიკას ტოვებს და ცდილობს, ისწავლოს ცხოვრება სასმლის გარეშე. თუმცა, მისთვის ეს ძალიან ძნელია და კაცს მუდმივ სევდასა და დეპრესიასთან უწევს გამკლავება.

მელანქოლია (2011)

ჩვენ ვუყურებთ ხანმოკლე პერიოდს ორი დის ცხოვრებიდან, რომელთაგან ერთ-ერთი თხოვდება. აშკარაა, რომ მას მენტალური დაავადება აწუხებს, რაც მის ყოველ ქმედებაშიც ნათლად ჩანს. ქორწილი ფიასკოთი სრულდება. ოჯახის წევრებს შორის კონფლიქტს კი წყვეტს პლანეტის მოახლოება, რომელიც დედამიწას განადგურებით ემუქრება.

შმიდტის შესახებ (2002)

როდესაც გაიგებს, რომ მისი ქალიშვილი თხოვდება, შმიდტი მის სანახავად წასვლას გადაწყვეტს. ამ მოგზაურობისას კი მთელ წარსულს, საკუთარ პიროვნებას, ხელიდან გაშვებულ ოცნებებსა და ცხოვრების არჩეულ გზას აანალიზებს.

იმედის სხივთა კრებული (2012)

მენტალური კლინიკის დატოვების შემდეგ, ფილმის მთავარი გმირი მშობლების სახლში გადადის და ყოფილ ცოლთან შერიგებას ცდილობს. სიტუაცია იცვლება, როდესაც მის ცხოვრებაში გამოჩნდება ტიფანი – ახალგაზრდა ქალი თავისი პრობლემებით.

უკეთესი არ არსებობს (1997)

ეს სურათი ასახავს მენტალურ დაავადებას, სახელად ობსესიურ-კომპულსიური აშლილობა. მთავარ გმირს, რომელიც აკვიატებებითაა შეპყრობილი, ეძლევა შანსი, საკუთარი მდგომარეობა და ცხოვრება უკეთესობისკენ შეცვალოს.

ქალი გავლენის ქვეშ (1974)

ჯონ კასავეტესის ბრწყინვალე სურათი გვიყვება ფსიქიკური პრობლემების მქონე ქალზე და მის ქმარზე, რომელიც ყველაფერს აკეთებს ცოლის მხარდასაჭერად. თუმცა, როდესაც ქალის მენტალური მდგომარეობა მათ შვილებს ვნებს, კაცს მტკივნეული გადაწყვეტილების მიღება უხდება.

უნდა ვილაპარაკოთ კევინზე (2011)

კევინი ბავშვობიდან უცნაურია. მას ეზიზღება ოჯახის წევრები, სკოლა, მთელი სამყარო. ეს დაუძლეველი ზიზღი კი წარმოუდგენელი სისასტიკით სრულდება და კითხვებს ტოვებს. რამ განაპირობა კევინის ფსიქიკური მდგომარეობა? არის თუ არა ეს ყველაფერი კავშირში დედის სიყვარულთან? ტილდა სუინტონის გმირი ამ კითხვებზე პასუხის მიღებას ცდილობს.

სუფთა, გაპარსული (1993)

შიზოფრენიის მქონე დამნაშავე საკუთარ დაავადებას და მიდრეკილებებს ებრძვის. ფილმი ნათლად ასახავს იმ ქაოსს, შიშითა და ბრაზით აღსავსე სამყაროს, რომელშიც მთავარი გმირი ცხოვრობს.

გველის ბუდე (1948)

ახალგაზრდა ქალი აღმოაჩენს, რომ ფსიქიატრიულ კლინიკაშია, თუმცა არ ახსოვს, აქ როგორ მოხვდა. კლინიკის თანამშრომლები მას გულგრილად ექცევიან, გარდა ერთი ექიმისა, რომელიც ყველაფერს აკეთებს მისი დაავადების გამომწვევი მიზეზის დასადგენად.

კრისტინი (2016)

ფილმი ნამდვილ ამბავს ეფუძნება და გვიყვება ტელეწამყვანზე, რომელმაც თავი პირდაპირ ეთერში მოიკლა. ფილმში ასახულია ახალგაზრდა ქალის თვითდესტრუქცია, დეპრესია, პიროვნული დეზორიენტაცია, რამაც ის ფატალურ დასასრულამდე მიიყვანა.