10 ჩამთრევი დეტექტივი, რომელიც აუცილებლად უნდა ნახოთ

nugo July 11, 2021

იდუმალი მკვლელობები, გაუჩინარებები, ჩახლართული გამოძიებები – თუ ეძებთ ფილმებს დაძაბული სიუჟეტითა და მოულოდნელი დასასრულით, დღევანდელი კოლექცია თქვენთვის არის. წარმოგიდგენთ ფილმებს, რომლებიც დეტექტივის ყველა მოყვარულს უნდა ჰქონდეს ნანახი:

დაბნელება (2015)

ემა უოტსონის გმირი გამომძიებლებს ოჯახურ საიდუმლოს უმხელს, რომლის უკანაც, როგორც ჩანს, არანაკლებ შემზარავი სატანისტური რიტუალები დგას. ასეთ სიტუაციაში თავი არაკომფორტულად ყველაზე გამოცდილმა დეტექტივმაც კი შეიძლება იგრძნოს. მის გამოძიებას იმდენად მოულოდნელი ფინალი აქვს, რომ მაყურებელი არავითარ შემთხვევაში არ დარჩება იმედგაცრუებული. უოტსონთან ერთად ფილმში მთავარ როლს ითან ჰოუკი ასრულებს.

მკვლელობა ვინდრივერში (2017)

ინდიელი გოგონას მკვლელობის არანაკლებ სახიფათო გამოძიება. მკვლელობას ადგილობრივი მონადირე და დანაშაულის ადგილზე ჩამოსული გამოძიების ფედერალური ბიუროს აგენტი იძიებენ. მათი წარმატების თითქმის არავის სჯერა, მაგრამ მთავარმა გმირებმა მაინც მოახერხეს საქმის ბოლომდე მიყვანა. ფილმი, რომელშიც მთავარ როლებს ჯერემი რენერი და ელიზაბეტ ოლსენი ასრულებენ, რეალურ მოვლენებს ეფუძნება.

გოგონა დრაკონის ტატუთი (2011)

დევიდ ფინჩერის ნამუშევარი, რომელიც ნამდვილად იმსახურებს თქვენს ყურადღებას, თუ ფილმი ჯერ კიდევ არ გინახავთ. შვედი მწერლის სტიგ ლარსონის წიგნის ეკრანიზაცია, რომელშიც ჟურნალისტი ახალგაზრდა ჰაკერ გოგოსთან ერთად 40 წლის წინ გაუჩინარებული ქალის საქმის გამოძიებას იწყებს. უნდა აღინიშნოს რუნი მარას შესანიშნავი გარდასახვა, მისი ცნობა ფილმში, ფაქტობრივად, შეუძლებელია. მსახიობს ლიზბეტ სალანდერის როლმა ოსკარის პირველი ნომინაცია მოუტანა კატეგორიაში ოსკარი საუკეთესო მსახიობი ქალისთვის.

შეშლილთა კუნძული (2010)

1950-იან წლებში ფსიქიკური აშლილობის მქონდე დამნაშავეების კლინიკიდან, რომელიც მოშორებულ კუნძულზე იყო განთავსებული, ერთ-ერთი პაციენტი გაუჩინარდა. მის გაქცევას ერთდროულად ორი დეტექტივი იძიებს. მარტინ სკორსეზეს ფილმი ერთ ამოსუნთქვაზე იყურება, ლეონარდო დიკაპრიოს შესანიშნავი შესრულება კი არ მოგცემთ ყურადღების გადატანის საშუალებას. (ფილმი საკმაოდ რთულად გასაგებია, თუმცა არც ამ შემთხვევაში შეშინდეთ, ჩვენს რუბრიკაში #ვერგავიგე, ყველაფერი ავხსენით)

საიდუმლო მათ თვალებში (2015)

ბილი რეის ნამუშევარი ამავე სახელწოდების ესპანურ-არგენტინული ფილმის რიმეიქია, რომელმაც 2009 წელს ოსკარი საუკეთესო უცხოენოვანი ფილმისთვის მიიღო. ფილმი საზარელი მკვლელობით იწყება, რომლის გამოძიებაც ვერ ხერხდება და ამ საქმესთან დაბრუნებას დეტექტივი 13 წლის შემდეგ ახერხებს. ფილმი მაყურებლის მთელ ყურადღებას მოითხოვს, რის დახმარებითაც შეძლებთ სრულად ჩაერთოთ ამ ისტორიაში.

მესამე მკვლელობა (2017)

ჰიროკაძუ კორეედას ფილმი ერთგვარი ანტიდეტექტივია, იმის გათვალისწინებით, რომ მკვლელის ვინაობა მაყურებლისთვის პირველივე წუთებიდანაა ცნობილი. მაგრამ მთავარი გმირი, ადვოკატი, რომელიც ჩვეულებრივ საგამოძიებო მოქმედებებს მიჰყვება, აღმოაჩენს ფაქტებს, რომლებიც ეჭვის ქვეშ აყენებს ყველაზე მთავარს – დანაშაულის მოტივს. ასეთი ძლიერი სცენარი და რეჟისურა თანამედროვე მსოფლიო კინემატოგრაფიაში საკმაოდ იშვიათია.

სხვენი (2015)

ჩახლართული სიუჟეტი, არათანმიმდევრული თხრობის მანერა და მოვლენების საინტერესო განვითარება. მართალია, ამ ტიპის ფილმების ყურების დროს შემზადებულები ვართ, რომ ყველაფერი მარტივი გამოსაცნობი არ არის, ფილმის ფინალის გამოცნობა მაინც არ არის მარტივი. დამაინტრიგებელი ატმოსფერო, კარგი ოპერატორული ნამუშევარი და სამსახიობო ანსამბლი იმსახურებს თქვენ დროს.

პირველყოფილი შიში (1996)

ამ ჟანრის ერთ-ერთი საუკეთესო ნამუშევარი. სასამართლო პროცესის ისტორია, სადაც წარმატებული ადვოკატი ცდილობს ურთულესი და სასტიკი მკვლელობის გამოძიებას. გრეგორი ჰობლიტის საინტერესო, დაძაბული ფსიქოლოგიური თრილერი, დეტექტივი და დრამა. ინტრიგა, გამაოგნებელი ფინალი და შესანიშნავი სამსახიობო შესრულება. ედვარდ ნორტონი ოსკარზე საუკეთესო მსახიობი კაცისთვის მეორეხარისხოვან როლში იყო ნიმინირებული.

იდუმალი მდინარე (2003)

დენის ლიჰეინის ამავე სახელწოდების რომანის ეკრანიზაცია, რომელიც ყველა დეტექტივის მოყავრულმა უნდა ნახოს. კლინტ ისტვუდის ფილმი, რომლის სიუჟეტიც თავშეკავებულად, მაგრამ დინამიკურად ვითარდება, მაყურებელს კი დაძაბულობა ფილმის ბოლომდე მიჰყვება. კარგად იგრძნობა პერსონაჟების ემოციები, რის გამოც მაყურებელს გამუდმებით უჩნდება თანაგრძნობის განცდა. შონ პენი ოსკარზე საუკეთესო მსახიობი კაცისთვის, ტიმ რობინსი კი საუკეთესო მსახიობი კაცისთვის მეორეხარისხოვან როლში იყვნენ ნომინირებულები.

ზოდიაქო (2007)

ნუ შეგაშინებთ ფილმის ქრონომეტრაჟი! დევიდ ფინჩერის ფილმი რეალურ მოვლენებს ეყრდნობა და სერიული მკვლელის ისტორიას მოგვითხრობს. ფინჩერი, როგორც ყოველთვის, ახერხებს ისეთი ატმოსფერო შექმნას, რომ მაყურებელმა მიმდინარე მოვლენების თანამონაწილედ იგრძნოს თავი. ფილმში შეხვდებით საიტნერესო პერსონაჟებს, რომლებსაც თანაბრად აქვთ დრო დათმობილი იმისთვის, რომ თავიანთი პიროვნების რამდენიმე მხარე დაგვანახონ.