12 ფილმი, რომლებიც 12 წლამდე ბავშვებს აუცილებლად უნდა ჰქონდეთ ნანახი

nugo July 10, 2021

კლასიკური მიუზიკლებიდან, პრინცესების ზღაპრებიდან და ანიმაციური ცხოველებიდან სუპერგმირების თავგადასავლებამდე – ფილმები, რომლებიც აუცილებლად მოეწონება მთელ ოჯახს. უახლესი ფილმების გარდა, წარმოგიდგენთ ყველა დროის გამორჩეულ ნამუშევრებს, რომელიც პოზიტიური გზავნილებით და მისაბაძი პერსონაჟებით არის სავსე, რაც ბავშვებზე მნიშვნელოვან გავლენას ახდენს. ზოგიერთი მათგანი უცხო კულტურას გააცნობს, ზოგი სამყაროს სხვა კუთხით დაანახებს, ზოგი ფილმი ბევრს გაცინებთ, ზოგი კი ცრემლებამდე მიგიყვანთ, მაგრამ თითოეული მათგანი იმსახურებს ბავშვების ყურადღებას და იმ სიას განეკუთვნება, რომლებიც აუცილებლად უნდა ნახო, სანამ ჯერ კიდევ პატარა ხარ.

მერი პოპინსი

მელოდიური მუსიკა, ფანტასტიკური ცეკვები და მულტიპლიკაციური ელემენტები – პამელა ტრევერსის ამავე სახელწოდების საბავშვო წიგნების სერიის 1964 წლის ეკრანიზაცია. ბენქსების ოჯახი თავისი ბავშვებისთვის ძიძას ეძებს და როგორც ყოველთვის ხდება მხოლოდ ზღაპარში, ის არსაიდან გაჩნდება, მშვენიერი, მომხიბვლელი და ისეთი, რომელსაც  არავინ გავს და ის, ვინც არავის ჰგავს. მიუხედავად ფილმის ქაოტური მსვლელობისა, ის არ შეიცავს საშიშ ელემენტებს. მერი პოპინსის შემსრულებელმა ჯული ენდრიუსმა ამ როლისთვის ოსკარი საუკეთესო მსახიობი ქალისთვის მიიღო, ფილმი კი კინოაკადემიის კიდევ 12 კატეგორიაში იყო ნომინირებული, რომლიდანაც კიდევ 4-ში გაიმარჯვა. მერი პოპინსის ახალი ვერსია 2018 წლის დეკემბერში გამოჩნდება და მთავარ როლს ამჯერად ემილი ბლანტი შეასრულებს.

ოზის ჯადოქარი

მოხერხებულად მოეწყვეთ და მოემზადეთ ხანგრძლივი მოგზაურობისთვის. ცისარტყელას რომ გადაცდებით, თქვენ აღმოჩნდებით ყვითელი აგურიდან აგებულ გზაზე. კარგად მოეწყეთ თქვენს პატარებთან ერთად, რადგან გზა მოჯადოებულ ტყეში შეგიყვანთ, ბოროტი ალქაჯების და კეთილი ფერიების სამეფოში. 1939 წლის მუსიკალური ფილმი წიგნის “ოზის საოცარი ჯადოქარი” ყველაზე ცნობილი და წარმატებული ეკრანიზაციაა, რომელიც იმ დროისთვის ახალი სამფერიანი ტექნოლოგიით გადაიღეს. ფილმმა ოსკარზე 6 ნომინაციიდან ორში გაიმარჯვა, თუმცა მშობლებმა ასევე უნდა გაითვალისწინონ, რომ ფილმი შეიცავს რამდენიმე სცენას, რომელმაც ძალიან პატარა ბავშვები შეიძლება შეაშინოს, ამიტომ ფილმი 6 წლამდე პატარებისთვის არ არის რეკომენდირებული.

მუსიკის ჰანგები

კლასიკად ქცეული მიუზიკლი ნებისმიერი ასაკისთვის. კიდევ ერთი შესანიშნავი ფილმი ჯული ენდრიუსის მონაწილეობით. ყოფილი გემის კაპიტანი თავის შვიდ შვილთან ერთად ზალცბურგის მახლობლად ცხოვრობს. მიუხედავად იმისა, რომ სახლში დისციპლინა და წესრიგი სუფევს, ის მაინც გადაწყვეტს ბავშვებს აღმზრდელი დაუქირაოს. რაც მშობლებმა უნდა გაითვალისწინონ ამ ფილმის ყურებისას არის ის, რომ ფილმი მდიდარია საინტერესო პერსონაჟებით, მუსიკით და სიუჟეტით, რომელიც სავსეა პოზიტიური მესიჯებით.

უცხოპლანეტელი

ნუ შეგიყვანთ ფილმის დასახელება შეცდომაში და ნუ იფიქრებთ რომ წინ მძაფრსიუჟეტიანი ფილმი გელით. სტივენ სპილბერგის ეს ფილმი გამორჩეული საოჯახო ფილმია, რომელიც ისტორიის მანძილზე ერთ-ერთი საუკეთესოა. ფილმის თემები ერთგულებაზე, ნდობაზე და მზრუნველობაზე გულის ამაჩუყებელი და მარტივად გასაგებია, ელიოტის და უცხოპლანეტელის უჩვეულო მეგობრობა კი ყველაზე მტკიცეა კინემატოგრაფიის ისტორიაში. ფილმმა ოსკარის 9 ნომინაციიდან ოთხში გაიმარჯვა.

ჰარი პოტერი და ფილოსოფიური ქვა

ფენტეზის ჟანრის ფილმების სერია, რომელიც ჯოან როულინგის ამავე სახელწოდების 7 წიგნს ეფუძნება. იგი ჰარი პოტერის, ახალგაზრდა ჯადოქრის თავგადასავლებს ასახავს და ძირითადად ბავშვებისთვისაა განკუთვნილი. მიუხედავად ამისა, მშობლებმა უნდა გაითვალისწინონ, რომ “ჰარი პოტერი და ფილოსოფიური ქვა” რამდენიმე საშიშ მომენტს შეიცავს, რის გამოც ის ბავშვებისთვის 7 წლის ზევით არის რეკომენდირებული. ფილმი ოსკარის 3 კატეგორიაში იყო ნომინირებული.

ჰუგო

მარტინ სკორსეზეს 2011 წლის ფილმი, რომელიც რომანს „ჰიუგო კაბრეს გამოგონება“ ეფუძნება. მოქმედება 30-იანი წლების პარიზში ვითარდება. 12 წლის ობოლ ჰუგოს მამამისისგან მხოლოდ საიდუმლო მექანიზმი დარჩება, მის ასამოქმედებლად ფილმის გმირი გასაღებს ეძებს. მშობლებმა უნდა გაითვალისწინონ, რომ “ჰუგო” ხელოვნებაზე და ფილმების მაგიაზეა, რაც ძალიან პატარა ბავშვებისთვის, შეიძლება, გაურკვეველი იყოს, ამიტომ ფილმი რეკომენდირებულია სკოლის მოსწავლეებისთვის ან უფრო დიდებისთვის. ფილმში ბავშვებისთვის ისეთი მესიჯებია, როგორიცაა შიშის დაძლევა, მიზანდასახულობა და დაჟინებულობა. ფილმმა ოსკარზე 5 კატეგორიაში გაიმარჯვა.

ისტორია ძაღლ ჰაჩიკოზე

ეს არის ლას ჰალსტრომის ფილმი ძაღლის ერთგულებაზე, რომელიც სავსეა ემოციებით. ისტორია კოლეჯის პროფესორის და ლეკვის სიყვარულზე, რომელსაც ის თოვლიან ღამეს გადაარჩენს. ეს არის ძალიან თბილი ფილმი, რომელიც მაყურებლის ყურადღებას თავიდანვე იპყრობს. ფილმი ეფუძნება ძაღლის ისტორიას, რომელიც იაპონიაში 1930-იან წლებში ცხოვრობდა. ნამდვილი ჰაჩიკოს ქანდაკება დღემდე დგას რკინიგზის სადგურზე. მიუხედავად იმისა, რომ ოფიციალურად ფილმი ნებისმიერი ასაკის მაყურებლისთვისაა გათვლილი, უნდა გაითვალისწინოთ, რომ ფილმი იმ ბავშვებს უფრო მოეწონებათ, ვინც უპირატესობას სევდიან ფილმებს ანიჭებს.

მელნიანი გული

მარტორქები, ფრინავი მაიმუნები, ჩირაღდანები მაგიური შესაძლებლობებით – ეს ყველაფერი არის ამ ფილმში თავმოყრილი და ისინი წიგნის ფურცლებიდან გადმოვიდნენ: მთავარმა გმირმა წიგნის წაკითხვისას მთელი სამყარო გააცოცხლა და ახლა საკუთარ სამყაროში უნდა დაბრუნდეს. ფილმი გერმანელი მწერლის კორნელია ფუნკეს ნოველის მიხედვითაა გადაღებული. უნდა გაითვალისწინოთ, რომ ფილმი, როგორც წიგნი, შეიცავს როგორც სასაცილო მომენტებს, ისე გარკვეულ ძალადობის სცენებს და ზოგიერთმა პერსონაჟმა პატარა ბავშვები შეიძლება შეაშინოს. ფილმი არ არის რეკომენდრიებული 9 წლამდე პატარებისთვის.

პიტერ პენი

ეს ის პიტერ პენი არ გეგონოთ, 2015 წელს რომ ჩავარდა გაქირავებაში, არა, ეს ყველაზე ზღაპრული პიტერ პენია, რომელიც 2003 წელს გადაიღეს. დარლინგების ოჯახი მეგობრული და მოწესრიგებულია, თუმცა მშობლები უფროს ქალიშვილს ვენდის გაზრდისკენ მოუწოდებენ, პიტერ პენი კი ბავშვებს საშუალებას აძლევს ბავშვობა გაიხანგრძლივონ. ეს ძალიან ლამაზი და კეთილი ისტორიაა, რომელიც გვეუბნება, რომ გაზრდის მიუხედავად, ჩვენში ბავშვის შენარჩუნება აუცილებელია. ასეთი ისოტირა პატარებს ნამდვილად მოეწონებათ, მშობლებს კი გაახსენებს, რა კარგია იყო ბავშვი და დაეხმარება მათი პატარების სამყაროს უკეთ გაგებაში. გაითვალისწინეთ ისიც, რომ ფილმში არის გამოყენებული იარაღები, ხმლები, მოკლე კოცნები, სიგარეტი და სასმელი როგორც გამოგონილ, ისე რეალურ სამყაროში. ფილმი რეკომენდირებულია 8 წელზე უფროსი ბავშვებისთვის.

მისტერ მაგორიუმის საოცარი სამყარო

ბავშვებისთვის ეს ფილმი ძალიან საინტერესო იქნება, რადგან ის ფერებით და სანახაობებთაა სავსე. თქვენს თვალწინ უამრავი სათამაშო გაცოცხლდება, მანქანები თავისით ივლიან, ვერტმფრენები კი იფრენენ… ფილმი სავსეა პოზიტიური გზავნილებით მეგობრობაზე, ნდობაზე, საკუთარი თავის შესაძლებლობების ძიებაზე და რწმენაზე. ფილმში არის რამდენიმე სევდიანი სცენა, რამაც ძალიან პატარა ბავშვებში შეიძლება დამატებითი კითხვები გააჩინოს სიკვდილთან დაკავშირებით. ფილმის ყურება შეუძლია ნებისმიერ ბავშვს 6 წლის ზევით.

საოცრება

2017 წლის ფილმი ჯულია რობერტსის, ოუენ უილსონის და უნიჭიერესი პატარა ჯეიკობ ტრემბლის მონაწილეობით. ისტორია პატარა ბიჭზე, რომელიც გენეტიკური დეფორმაციით დაიბადა და 30 ოპერაცია გადაიტანა, მაგრამ მიუხედავად ამისა, მაინც არ ჰგავს სხვა ბავშვებს. გაითვალისწინეთ, რომ რაკელ პალასიოს ნოველის მიხედვით გადაღებული ფილმი ძალიან ემოციური საოჯახო დრამაა. ფილმში მკვეთრადაა დაფიქსირებული პოზიტიური მესიჯები სიკეთის არჩევანზე, ნამდვილ მეგობრობაზე და იმაზე, რომ ადამიანი შინაგანი მდგომარეობით უნდა დავაფასოთ და არა ვიზუალურად. ამ ყველაფრის გათვალისწინებით ფილმი არ არის რეკომენდირებული 10 წლამდე ბავშვებისთვის.

ჩარლი და შოკოლადის ქარხანა

კეთილი ზღაპარი, როგორც ბავშვებისთვის, ისე უფროსებისთვის. პატარა ბიჭი, სახელად ჩარლი მსოფლიოში ყველაზე გრანდიოზული შოკოლადების ქარხანაში მოგზაურობას მოიგებს. ქარხანას ასევე მსოფლიოში ყველაზე უცნაური კონდიტერი ვილი ვონკა მართავს, რომლის როლსაც ჯონი დეპი ასრულებს. ჩარლის გარდა ამ ქარხანაში კიდევ ოთხი ბავშვი მოხვდა, სწორედ ისინი გახდებიან თქვენი პატარებისთვის იმის მაგალითი, თუ როგორ არ უნდა მოიქცნენ, ჩარლი კი მათში მორიდებულობას და მეგობრულობას გააღვივებს.