13 საინტერესო ფილმი, სადაც მოქმედება სასტუმროში ხდება

nugo July 11, 2021

კარგი მომსახურება, სუფთა თეთრეული და მილიონი საიდუმლო, რომელიც სასტუმროების კარს მიღმა იმალება. სასტუმროების თემა კინემატოგრაფიაში განსაკუთრებული პოპულარობით სარგებლობს. ნახეთ, როგორ შეიძლება სასტუმრო გახდეს მოქმედების ადგილის გარდა, ფილმის მთავარი გმირიც.

ამ შემთხვევაში ვისაუბრებთ მხოლოდ ისეთ ფილმებზე, სადაც მოქმედება სასტუმროში ხდება:

ნათება (1980)

ერთ-ერთი ყველაზე ცნობილი ფილმი სასტუმროზე  – სინამდვილეში სტუდიაშია გადაღებული. რაც შეეხება რეალურ სამყაროსთან კავშირს, არის გარკვეული მსგავსებები სტივენ კინგის მიერ გამოგონილ Overlook-სა და ორეგონში არსებულ Timberline Lodge-ს და იოსემიტის ეროვნულ პარკში სასტუმრო Ahwahnee-ს შორის. 27 წლის შემდეგ კინგის მოტივებზე, მაგრამ სხვა ნაწარმოების მიხედვით, გამოვიდა ფილმი “1408”, რომელშიც მოქმედება ვითარდება არა უბრალოდ ერთ სასტუმროში, არამედ საერთოდ ერთ ოთახში. გადაღებების ნაწილი სასტუმრო Roosevelt-ში მიმდინარეობდა ნიუ-იორკში.

სადღაც (2010)

ამ ფილმისთვის სოფია კოპოლამ ჰოლივუდში არსებული სასტუმროს Chateau Marmont-ის მფლობელთან შეთანხმებას მიაღწია და გადამღები ჯგუფის განკარგულებაში მთელი სართული იყო. რა თქმა უნდა, სასტუმროს მფლობელი ასეთ გამონაკლისს ყველა რეჟისორისთვის არ დაუშვებდა. Chateau Marmont ერთ-ერთი ყველაზე იდუმალი სასტუმროა მთელ მსოფლიოში. იმაზე, თუ რა ხდება მის კედლებს მიღმა, წიგნებს წერენ, ცნობილი ადამიანების შოკისმომგვრელ ქცევებზე ჭორებს კი ბოლო არ უჩანთ. მაგალითად, მომენტი ფილმში, როდესაც მთავარი გმირი ლიფტში ბენისიო დელ ტოროს ხვდება ირონიული მინიშნებაა ჰოლივუდის ერთ-ერთ ყველაზე ცნობილ ჭორზე: თითქოს ერთხელ ამ ლიფტში სკარლეტ იოჰანსონი და დელ ტორო შეხვდნენ ერთმანეთს და იქვე ჰქონდათ სექსი.

ოთხი ოთახი (1995)

დავუბრუნდეთ Chateau Marmont-ს. ამ ფილმის შემქმნელებისთვის სწორედ მისი მაცხოვრებლები გახდნენ შთაგონების წყარო. მათი ყურების დროს საკმაოდ სრულყოფილი წარმოდგენა შეიძლება შეიქმნათ იმაზე, თუ რა ხდებოდა 90-იანებში. მიუხედავად იმისა, რომ “ოთხ ოთახს” და “სასტუმრო “გრანდ ბუდაპეშტს” შორის, ერთი შეხედვით, არაფერი აქვთ საერთო, ლოკაციის გარდა, ატმოსფერულად ფილმები იმდენად ახლოს არიან, რომ “ბუდაპეშტში” პრიველ წუთებში, როდესაც კონსიერჟი უნდა გამოჩნდეს, წამიერ იმედიც შეიძლება გაგიცრუვდეთ, როდესაც დაინახავთ რეიფ ფაინსს და არა ტიმ როთს. სხვათა შორის, ბოლო ოთახის ისტორიისთვის კვენტინ ტარანტინომ “შეუდარებელი მისტერ ფოქსის” ავტორის როალდ დალის ერთ-ერთი ზღაპარი გამოიყენა.

სასტუმრო “შევალიე” (2007)

ეს ფილმი უეს ანდერსონის მინი-რეპეტიცია იყო “სასტუმრო “გრანდ ბუდაპეშტამდე”, მოკლემეტრაჟიანი პროლოგი ფილმისთვის “მატარებელი დარჯილინგის მიმართულებით”, რომელშიც ნატალი პორტმანი და ჯეისონ შვარცმანი იღებენ მონაწილეობას. თავდაპირველად ფილმი ჩაფიქრებული იყო როგორც დამოუკიდებელი პროექტი. ანდერსონმა ფილმი თავად დააფინანსა, მსახიობებმა ანაზღაურების გარეშე ითამაშეს, კოსტიუმებით და აქსესუარებით გადაღებებისთვის მარკ ჯეკობსი და Louis Vuitton დაეხმარათ. გადაღებები ფრანგულ სასტუმროში Raphael მიმდინარეობდა, რომელიც მანამდეც არაერთმა რეჟისორმა დააფასა: მასშივეა გადაღებული, მაგალითად, “9 ½ კვირა” და 1998 წელს გადაღებული “Place Vendôme”.

ბარტონ ფინკი (1991)

ეთან და ჯოელ კოენების გენიალური ფილმის მოქმედებაც სასტუმროში ვითარდება. მართალია გადაღებები ბევრ ადგილზე მიმდიანრეობდა, არაჩვეულებრივი ლაინდერიდან “დედოფალი მარია” დაწყებული, რომელიც ახლაც არაჩვეულებრივად გამოიყურება, მაგრამ აღარ მოქმედებს, უბრალო სასტუმროთი დამთავრებული, ძირითადი სცენები მაინც სტუდიაშია გადაღებული – კოენებს სურდათ, რომ კადრებში განსაკუთრებული მიტოვებულობის ატმოსფერო ყოფილიყო. სხვათა შორის, კონსიერჟის როლს ფილმში სტივ ბუშემი ასრულებს, რომლისთვისაც იყო თავდაპირველად დაწერილი კონსიერჟის როლი “ოთხ ოთახში”.

სასტუმრო ნიუ ჰემფშირი (1984)

ამერიკელი მწერლის ჯონ ირვინგის ამავე სახელწოდების ნაწარმოების ეკრანიზაცია, რომელიც კანადაშია გადაღებული. სასტუმრო “ნიუ ჰემფშირის” როლში კანადური სასტუმროა Tadoussac კვებეკში. თავად ირვინგი ეკრანიზაციით კმაყოფილი დარჩა, მაგრამ ჯოდი ფოსტერმა, რომელიც ერთ-ერთ მთავარ როლს ასრულებს, მოგვიანებით უკმაყოფილება გამოთქვა, თითქოს ამ ფილმის შემდეგ მისმა კარიერამ უკუსვლა დაიწყო –  ამ ფილმის გამო მან უარი თქვა ფილმებში “ტერმინატორი” და “კლუბი – საუზმე” მონაწილეობაზე.

იდუმალი მატარებელი (1989)

ჯიმ ჯარმუშის ფილმი, რომელიც მემფისის მოჩვენებებს ეძღვნება, ელვისის სამშობლოშივეა გადაღებული, სასტუმრო Arcade-ში. 1993 ის დაანგრიეს, რესტორანი კი ამავე სახელწოდებით, რომელშიც ასევე მიმდინარეობდა გადაღებები, ისევ არსებობს და მისი მონახულების საშუალებაც არის. ღამის პორტიეს როლი სკრიმინ ჯეი ჰოუკინსმა შეასრულა.

ფსიქო (1960)

Bates Motel დღეს ბევრისთვის ამავე სახელწოდების სერიალთან ასოცირდება და არა სასტუმროსთან ფილმიდან “ფსიქო”. სინამდვილეში ასეთი სასტუმრო არ არსებობდა, ის სტუდია Universal-ის შექმნილია სრულად. მეორე სასტუმრო, რომელიც ფილმის დასაწყისში სულ ცოტა ხნით ჩნდება, სადაც მთავარი გმირი საყვარელს ხვდება, სასტუმრო Jefferson-ია არიზონაში, რომელიც ნამდვილად არსებობს. ჰიჩკოკის შესწავლა უსასრულოდ შეიძლება სასტუმროების გადაღების თემაზე: მაგალთად, ფილმში “ჩრდილოეთისკენ, ჩრდილო-დასავლეთიდან” ნიუ-იორკის Plaza ჩნდება, “სიგიჟეში” ლონდონის Hilton და ა.შ.

გრანდ ოტელი (1932)

ეს არის ერთ-ერთი ის ფილმი, რომელიც უეს ანდერსონისთვის “სასტუმრო “გრანდ ბუდაპეშტის” შთაგონების წყაროა. უბრალოდ აქ მოქმედება გერმანიაში ვითარდება, მთავარ როლებს კი გრეტა გარბო, ჯონ ბერიმორი და ჯოან კროუფორდი ასრულებენ. სინამდვილეში არავითარი “გრანტ ოტელი” არ არსებობს, ყველაფერი სტუდია MGM-ში არის გადაღებული.

სასტუმრო “გრანდ ბუდაპეშტი” (2014)

სამწუხაროდ, ისეთი სასტუმრო, როგორიც ფილმშია, რეალობაში არ არსებობს. პრინციპში, ისევე, როგორც სხვა ბევრი რამ უეს ანდერსონის სამყაროდან: არ არსებობს საკონდიტრო Mendl’s, რაც ძალიან სამწუხაროა და “ბიჭი ვაშლით”, ის სპეციალურად ფილმისთვის დახატა მხატვარმა მაიკლ ტეილორმა. სასტუმრო “გრანდ ბუდაპეშტი” – მინიატურაა. მართალია გადაღებები სტუდიაში არ მიმდინარეობდა, მაგრამ არც სასტუმროებში: ანდერსონს ძალიან უნდოდა “ცოცხალი” სივრცე, ამიტომ გადამღებმა ჯგუფმა იპოვა უდიდესი უნივერსალური მაღაზია საქსონიაში: მისი ერთი მხარე გერმანულ მიწაზე დგას, მეორე – პოლონეთის. ამ მაღაზიაში გადაიღეს სასტუმროს უდიდესი ჰოლის სცენები.

ახალგაზრდობა (2015)

“დიდებული სილამაზის”, სადაც მთავარი გმირი რომია, პაოლო სორენტინომ “ახალგაზრდობის” მოვლენები ალპების კურორტზე გადაიტანა. ამისთვის შესაფერისი გარემო ხუთვარსკვლავიან Waldhaus Flims-ში იპოვეს, სადაც სიუჯეტის მიხედვით უკვე ოცი წელია ჩამოდიან დასასვენებლად გენიალური კომპოზიტორი და რეჟისორი, რომლის როლებსაც მაიკლ კეინი და ჰარვი კეიტელი ასრულებენ. სხვა დამსვენებლებს შორის რუსი ოლიგარქები, მარადონა და მის სამყარო არიან.

ლობსტერი (2015)

ფილმი სასტუმროზე, რომელშიც ალბათ არ მოგინდებოდათ აღმოჩენა, თუ დეპრესიის და სასოწარკვეთის უკიდურეს დონეზე არ აღმოჩნდებოდით. თუმცა თქვენი სურვილები უახლოეს მომავალში ყველასთვის სულ ერთი იქნებოდა. ყველა მარტოხელა ადამიანს, რომლებმაც გარკვეულ ასაკამდე ვერ მოახერხეს მეორე ნახევრის პოვნა, აპატიმრებენ და ძალის გამოყენებით ათავსებენ სპეციალურ სასტუმროში. სასტუმროში მაცხოვრებლებს 45 დღეს აძლევენ იმისთვის, რომ შეიყვარონ და ურთიერთობები დაალაგონ სასტუმროს სხვა მაცხოვრებლებთან. თუ ამ თვე-ნახევრის მანძილზე პირადი ცხოვრების დალაგება არ გამოუვათ, მარტოხელებს ცხოველებად აქცევენ და ტყეში უშვებენ. მაცხოვრებელი თავად არჩევს, რომელ ცხოველად გადააქციონ. რა თქმა უნდა, არსებულ რეჟიმს ყველა არ ეთანხმება. ტყეში იმალება ადამიანების გარკვეული ჯგუფი, რომლებსაც არ სურთ ძალით შეყვარება ან ცხოველებად ქცევა. ფილმის ყურება თუნდაც არაჩვეულებრივი სამსახიობო შემადგენლობის გამო ღირს: კოლინ ფარელი, რეიჩელ ვაისი, ლეა სეიდუ და სხვა.

ცუდი მოგონებები სასტუმრო ელ როიალთან (2018)

ერთ-ერთი ბოლო ფილმი სასტუმროზე. აქ წარმოუდგენელი ატმოსფერო გელოდებათ. 60-იანი წლები დღევანდელ კინემატოგრაფიაში ასე კარგად, იშვიათადაა გადმოცემული. დეტალები იდეალურადაა გათვალისწინებული: კოსტიუმები, ინტერიერი, ვარცხნილობები, ქცევები. ასევე უნდა აღინიშნოს არაჩვეულებრივი სამსახიობო შემადგენლობა, სიუჟეტი, რომელიც ბევრ კითხვას გაგიჩენთ ყურების დროს. მოკლედ, წინ საინტერესო, ინტრიგებით და საიდუმლოებით სავსე ისტორია გელით.